Mfk, nid Mfg!

Hüt het de Tüüfu zur obligatorischi Untersuechig müesse. Debi hani grad d Glägehit gnützt, endlech mau miner Sache lah idstrage. D JCW-Brämse sie ja scho im Fahrzüguswis drin gsi, hi auso no d Fäuge uds KW2-Fahrwerk gföut.

Ohni vorher no mau ir Garage gsi ds si, büni mau uf guet Glück a dä Termin gange, ide Hoffnig, dass es de Tüüfu o ohni grossi Vorbereitige ds erste Mau schafft. De Experte het de das Auto zümlech genau under d Lupe gnoh. Woner churz um ds Huus gfahre isch het er no d Brämse ud Länkig überprüeft. Ha scho gmint dä wöu nüme ufhöre im Kreis ds fahre mit mim MINI! Het anschinend o ihm Spass gmacht. ;-)
Denn het er aber de e ganzi haub Stund jedes Detail agugget. Vorallem bir Tieferlegig u bi de Schinwärfer het er lang de Chopf gschüttlet u i ha mer scho langsam afah Sorge mache.

Am Schluss het er de eifach no d Schinwärfer ds bemängle ghäbe. Het eifach nid welle ha, dass das originali Xenon-Schinwärfer vo MINI si. Ersch wo ihm a zweite Experte bestätigt het, dass da dran alles völlig original isch, het ers welle glube. Schlussendlech isch de das Ganze ohni Problem über d Bühni glüfe. Nachdem i nomau e witeri haub Stund am Schalter agstane bü, hani de de nüü Fahrzüguswis mit sämtliche Itragige becho, ude Tüüfu het jetz de offiziell Säge vom Strasseverkehrsamt! =)

MINI-Challenge Schueh

Nach langem Warte und zig Mails hin und her si sie am Dsischtig endlech acho: Die originale Schueh us de MINI-Race-Challenge!!!!! *sabber*

Topspeed

Klein-Smartie in Höchstform! ;-)

Bergbuire-Tour

Eigentlech hetti ja de o langsam gnue Kilometer ufem Tacho, aber es reizt ihm haut glich ging wieder. So o am Pfingstmentig. De Spaci het e Route i sire Region zämegstöut, u bi däne Kurve hani eifach nid chöne nei säge. Auso hani mer de Tüüfu gschnappt u bü richtig Ennetbürgen gfahre. Underwägs hani no e sone fahrende Wandschrank vor mer ghäbe uf de Autobahn... ;-)

Start am 14.00 in Ennetbürgen: Nachdem alli volltanket hi, chas losgah!

Üse erst Fotostopp ufem Glaubebärgpass

Troumhafti Ussichte underwägs

Bi Flüeli churz vorem Sörebärg himer üs u de MINIs es Pöuseli gönnt.

Uf de Terrasse himer bimene Coup chli gschwätzt.

Dernah isch es no via d Panoramastrass vom Glaubebüehlepass richtig Giswil witergange. Eigentlech isch no vorgseh gsi übere Ächerlipass ds ga. Es paar hi de aber scho früener d Heireis aträte. U nachdem de Spaci, de Reni, de Dome u i no lang ufem Parkplatz miternander quatscht hi, himer de o gfune, mi göngi gschider no ines Restaurant is ga zie statt de letscht Hügel no in Agriff ds näh.

Öppis nach de 19.30 hi sech de o üser Wäge wieder trennt u mi hi d Heireis aträte. Cooli Strecki gsi u super Lüt, het umi mau Spass gmacht! Da chame so richtig abschaute ude Alltag vergässe.

Muetertag

Am Sunntig isch de no Muetertag gsi. Vorem Mittag simer richtig Morges am Genfersee gfahre. Gäge Namitag simer de no uf Montreux gange. Allzu lang simer det jedoch nid gsi. Scho churz speter si Gwitterwolche ufzoge u mi hi üs ufe Heiwäg gmacht. Ir Region Bulle hets anschinend sogar ghaglet. D Wiese si uf jede Fau zum Teil richtig wiss gsi. Zum Glück isch de Tüüfu woubehalte dehei im Understand gstane! =)

Reni's Geburtstagsparty

De Reni het für hüt e grossi Fete agseit. De Pascal, ds Heidi u i hi grad bi ihm chöne übernachte. Isch nach de 02.00 gsi womer is Bett si. Punkt 09.00 simer wieder alli wach und früsch am Zmorgetisch ghocket. Dernah hi ds Heidi u de Pascal no paar Sache für sech erlediget u i bü mitem Reni ga d Sache parat mache für d Party. Tüsch und Bänk häretue, de Grill parat mache, ds Brot ga hole, de Küehlschrank, d Getränk, d Gasfläsche füre Grill organisiere. Da isch ächt öppis glüfe, het aber Spass gmacht.

Bir Tankstell womer d Gasfläsche si ga chufe isch mer no dä krass 3er BMW vor d Linse grate:

Zersch hani gmint es sig dä 3er wos bim Dähler git, mitem ufgmotze M5-10 Zylinder. De Bsitzer het aber chöne entwarnig gä: Drunder steckt "nume" e normale 3er! Schaaaad!

Zrugg bim Pavillon wo d Party söu stige: Damit mer nid aus bis ganz ufe müesse schleppe, parke mer em reni si Ford churzerhand grad ds mitz ir Wiese! =)

De Kofferrum isch bis uf die letscht Rille gfüllt gsi!

Am Nami het sech de Reni de o no chli parat gmacht für sis grosse Fest. Ir Zwüschezyt si de Pascal, ds Heidi u i no e grossi Gärtnerei ga besichtige u hi vorusse die warme Temperature u de puur Sunneschin gnosse. Churz speter trudle de die erste Gäst i u es cha losga! Let's Party!

MINI- und Z-Mania... nume em sparda si Golf passt nid so rächt häre! *grins*

Dylan, Petra, Schäggu, Bleru, Pinki ud Ariane gniesse d Ussicht uf üsi Parkordnig

o im Pavillon inne isch es rund gange.

Hie no üse Gastgeber, de reni u rächts vo ihm de MINI-Challenge Rennfahrer Hans

Isch es super Fest gsi, merci vöumau für aus, reni! Ganz e coole Abe gsi! Bis öppe am viertu vor zwü himer gfieret. Dernah hi ds pinki u ig d Heireis richtig West-CH aträte. Öppe am 03.00 büni de dehei acho.

Mai-Höck

Es isch umi mau Höck-Zyt. Eigentlech hani ja de Nami welle fri näh damit i mitem pinki chli früener cha losfahre, aber wies haut so isch: Natürlech muess i schaffe, wü süsch scho au ander fri hi! Punkt 17.00 u ke Sekunde speter machi d Bank zue, u de würd gstresset dass i möglechscht schnäu richtig Mühlau cha losdüse. Bim Grauholz hani mitem Pascal u em Rotsch abgmacht. Jaaa, genau: Dismau si satti 3 Fribuger am Höck!!! =)

Da Pfingstwuchenänd isch, hani mitem allerschlümmschte grächnet. Stau ohni Ende. Aber siehe da: Es stocket zwar ab und zue chli, aber so schnäu büni no nie amene Höck gsi. Zum Träffpunkt in Aarau West erschine mer sogar e haub Stund früener aus süsch aube. Um 19.30 simer de ufem Parkplatz vorem Restaurant in Schoren. Ds geniale Wätter ladet dezue i, die viele verschiedene MINIs umi mau genauer ds betrachte. Mind. 27 Stück sis gsi, glube sogar no es paar meh. U kine gseht glich us wie de ander, das machts äbe us!

Respekt! Wäge irgend anere unsinnige Diskussion ir Chatbox hani im Dylan gsit är muess am nächschte Höck mit Helm erschine, und siehe da: Är het sech voll dran ghaute! Cooli Sach gsi, Dylan! ;-)

Hossa! Eine vo üsne MINIs röhret mit satte 118.4 Dezibel us de Endrohr! Vorsichtshauber sägi jetz nid welle dass es isch. Nume sovöu: Mine isch es leider nid! ;-)

Hie no paar Pics vo üsem gmüetliche Abe:

Ging wie ging: De Höck isch ifach Hammer! Da freut me sich scho jetz umi uf ds nächschte mau! Hoffentlech denn o umi mit so wenig Verkehr u so tollem Wätter! =)

Smart vs. Dodge RAM

Ds Courtepin ufem Parkplatz vor Bank. Ha eifach grad näbe däm muesse parkiere, woni gseh ha wie wit dä usem Parkfäld useragt! =)

Mitem Bäri unterwägs

Am Morge am haubi zwöufi (*g*) wärdeni vor Mueter gweckt. Mi ehemalig Chef het e Velotour dür Wünnewil gmacht u hocket jetz bi üs hinderusse im Garte. No so haub verschlafe touchi de chli speter uf. Ihn hani ging guet möge als Chef. Het mi gfreut ihn umi mau ds gseh.

Nachem Zmittag machi mi de parat. Am 14.00 hani im Grauholz mitem Spaci u de Monika abgmacht. Mit ihre büni denn uf Spreitebach ads MINI-Träffe gange woni ds erste Mau d Lüt vom MPC gseh han. I freue mi riesig, sie umi mau ds gseh! Schad, himer de Konakt dernah chli verlore! Ds dritt fahre mer de richtig Chüderhüsi wo mer üs as Dessert gönne. Det ufem Parkplatz simer aber nid die einzige "Exote": BMW Isettas u ähnlechi Autos hi sech det anschinend o troffe! Cooooool! =)

De Tüüfu ud Spacemachine

Ds wunderschöne Panorama wo mer vor Terrasse us gnosse hi

paar Impressione vom Tüüfu, de Spacemachine u em Bäri:


Ires Bäri isch übrigens genau dä MINI wo anno dazumal bim Genfer Salon gstane isch wo 26 MINIs mit jedere Kantonsflagge sich zumene Schwizer-Chrüz formiert hi. Sie isch die einzegi wo miteme Bärner-Wappe ufem MINI umenand fahrt!!!

Hie no paar Fotos ufem Schallenberg:

Ufem Rückwäg himer die Classic-MINI Carrosserie entdeckt:

Troumhaft, die Chline!!! :-)

"You never forget your first MINI"

wie wahr!!!!!!!

Dernah simer no uf Langethal ganes Kafi triche. Leider simer uf de Autobahn dethäre gröber i Stau cho. Mi hi üs aber bestens amüsiert. D Schibe dune, d Soundalag ufdreiht, u stets in Kontakt über ds Walkie Talkie. Uf üsere Höchi isch e Jaguar XKR uf de anderi Spur gsi. Dä het ständig zu üs übere gugget u debi Täfeli kätschet. Woner churz speter d Schibe o dune het, himer ne ohni ds zögere aquatscht u gfragt ob wir o sones Täfeli dörfe ha. U so isch es cho, dass wir unternand Sugus zuegworfe hi. Dä het awäg nid schlächt gstuned ab üs! So macht Staufahre richtig Spass!

Isch a mega schöne Tag gsi! Bis zum nächschte Träffe vergit emu sicher nid umi so vöu Zyt! =)