Samstag, 15. November 2008

November-Höck

Gester isch es umi mau so wit gsi. De MPC-Höck in Mühlau het statt gfunde!

Lut inoffizielle Agabe sis dismau satti 31 MINIs gsi, wo hinderem Restaurant parkiert hi. Bsunders gfreut hani mi, dass de Thomas wieder mau cho isch, mit ihm büni denn as erste MINI United anno 2005 in Misano (I) gange. Natürlech hani mi o gfreut alli anderi wieder ds gseh, isch würklech wie ne Familie mittlerwile! Es isch umi mau e ganz gmüetliche Abe gsi, so gmüetlech dass i glatt vergässe ha Fotos ds mache. Sorry! Aber die meiste wo da mitläse si ja eh debi gsi, oder?! ;-))

De Smart Club isch o wieder awesend gsi, u im andere Teil vom Saal isch e Füürwehrverein am Ässe gsi.... da isch ganz schön öppis los gsi det! Nur die 4 im chline Sääli hi anschinend nid so freud ghäbe. D Tür zu üs isch no nid offe gsi, hi sie scho reklamiert: "Tüet d Tür zue!!!" Jaaaa, Maaaann, graaad! Muess doch zersch o no dedür... cha emu nid iche ohni d Tür ufdsmache..... Ehja, es git haut heikli Mensche! Debi, glube vo üs isch niemer giftig... jänu, was söus! ;-)

Bir Heifahrt het de West-CH-Konvoi anschinend no rächt Glück ghäbe. Vor üs het es Polizei-Auto grad ine ufe Parkplatz use gnoh u churzi Zyt später himer uf de Gägefahrbahn e Grosskontrolle gseh wo sie sämtlech Autos ufe Rastplatz use gnoh hi. Shit, das het grad e chlinere Stau gä det, u das irgendwenn am Morge am 01.00..... Guet... wir hetti ja nüd ds verstecke ghäbe, aber es hetti mi glich chli agschisse det no i Stau ds cho um die Zyt.

Schlussendlech hani mi de uf Reserve grad no bis zur Tankstell uf Flamatt chöne rette. Det hani mi ganz erstunt d Auge grübe.



Dank 5 Rp. / l Weekend-Rabatt het bir Avia ds 98er Benzin grad no 1.49 Fr. kostet! Boah, so "billig" het me glubi scho sit langem nüme chöne tanke!!!

Fazit: De letscht regulär Höck vom Jahr isch i mine Auge e volle Erfolg gsi! Jetz freui mi scho uf ds Pirate-Wiehnachtsässe und uf hoffentlech vieli witeri tolli Events im 09, mau gugge was d Pipeline härgit! =)

Montag, 10. November 2008

Sunntigsfährtli

De Reni het sech gwünscht am Suntig umi mau i das Resti ga ds ässe womer bir West-CH Usfahrt denn de Mittagshaut gmacht hi. Kes Problem, das isch ufem Schalleberg gsi.

Suntig Morge, 11.00, in Flamatt bir Comet träffe sech de Reni, Spaci, Chrigu u ig, genau für das Vorhabe: Ufe Schallberg ga ds Mittag ässe! =)



no paar obligati Fotos, u de gits los. Via Ueberstorf, Schwarzenburg, Steffisburg, Schallenberg.



Obe acho wärdi ersch mau fründlech empfange vo es paar Wanderer wo grad no bim Auto stöh ud Schueh alege. Ires Kommentar: "Hoffentlech si die Autos o zahlt".... o we si nid mitere Antwort grächnet het, es "Ja klar si die zaut" muessi unbedingt loswärde..... die dummi Zwätschge konteret: "Ja genau so gsehsch us".... Shit hani mi villicht ufgregt, was het die mi überhoupt so blöd adsmache???? Uf jede Fau isch besser gsi hi das die andere nid kört u i ha de o nüd meh druf gsit. Git däre ja e Scheiss an, u jaaa, mis Auto isch zaut, jede Rappe vo mier säuber!!!! Egau, was söus... söu sie doch nidisch si ;-))



Wir his uf jede Fau sehr gmüetlech ghäbe ds viert. So gmüetlech dass mer d Zyt völlig vergässe hi det im Resti.


Es üppigs Dessert het natürlech nid dörfe fehle, u die si ide Tat sehr grosszügig usgfalle! :-)

Dernah hi wir de glich mau e Blick uf d Uhr gwagt, und siehe da: Uf ds mau isch scho 15.3o gsi u wir hocke immer no da....
Nachdem mer de zaut hi simer mau zrugg zu de Autos, det hi wir üs de entschide ds Chuderhüüsi für hüt mau usdslah u grad diräkt no zum Gurnigel ds fahre, süsch wers öppe de baud knapp worde mit de Zyt.

Es paar Kurve später simer de ufem Gurnigel u näme det no es Kafi.


U de isch de scho wieder Zyt gsi zum sech verabschiede. Het Spass gmacht u isch mega gmüetlech gsi!

Vampires Alive

Am Samschtig Abe het de DJ BoBo sis letschte Konzärt vor Vampires-Alive-Tour gä, das in Bern.

Auso ab is Auto u richtig Bärn gfahre. Zuefälligerwis hi wir grad näbe me bekannte Gsicht parkiert: De Christian alias Microcar vom MPC isch o am Konzärt gsi. Chum ide Halle inne, hani mi uf d Suech nachem pinki gmacht. Sie isch mitem Schäggu u de Mueter det gsi. Während sech miner Eutere uf de Tribüni es guets Plätzli ergatteret hi büni mitem Baud-Clan ganz unde gsi. Det hi wir äbefaus perfekti Sicht uf d Bühni ghäbe.

Über d Musig cha me sich minetwäge strite, Fakt isch aber: D Shows vom BoBo köre immer no zu de Beste, das het er mit "Vampires-Alive" wieder mau bewiese. 30 Lüt stöh uf de Bühni, Tänzer, Akrobate, Band, und und und.... Sorry Madonna, aber da cha dis Konzert nid mithaute.... ;-))

Zum Uftakt "Rock the Night" u ds erste Mau Blick uf die ufwändegi Bühni.

video

Wie immer kört zu sire Show o e fulminanti Pyro-Show

zwüschedüre e romantischi Ballade woner mit sire Ehefrou Nancy singt.

denn umi ganz e böse Blick vom Drache


De BoBo bim Intro vo "Where is your love" uf sim schwebende Flügel wo sech no um die eiget Achs dreiht het.

reichlich Füürwerch bi "Pray", o de Wasserfall chunt es zweits Mau zum Zug.
Ha da uf YouToube no es guets Viedo gfune: http://www.youtube.com/watch?v=2Rfg8MbOiuc
Lohnt sech inedsgugge! (Besser in "high quality" ;-))


wer jetz deicht dä wo rächts unde die falsch richtig guggi setti ner kenne.... cha guet si! Isch die ganz Show diräkt vor üs gstane: De Ritschi vo Plüsch.


Nach guet 2 Stund Show u paar Zuegabe isch de ds Spektakel verbi gsi.

Irgendwie het sech de e liechte Hunger bemerkbar gmacht. Leider hi d Ständ ir Postfinance-Arena aber scho au zue ta, auso simer de churzerhand no bim Food-Court vom Westside bim Spiga-Restaurant gane Pizza ässe. ;-)

Burn after reading

D Fabienne u i hi scho lenger abgmacht für am Fritig zäme i Chino ds ga. Sehr baud hi mer de o scho gwüsst wo dass mer wi ga: Ja klar, natürlech is brandnüe Panthé, de Chinokomplex mit de 11 Sääl im Westside. Nume welle Föum dass mer wi ga gugge isch no nid klar gsi. Schlussendlech hi wir üs uf "Burn after reading" geeiniget.


Aso i muess säge, de Föum isch meh oder weniger katastrophal, frage mi wiso da so grossi Näme wie Brad Pitt u George Clooney mitmache.... die hi ds Drehbuech sicher nid gläse vorher ;-))
Wo bitte isch d Handlig? Wo de rot Fade? U wenn isch de Föum lustig? Irgendwie hani das awäg verpasst ;-))
Egau, wir hi üs die gueti Lune uf jede Fau nid lah verderbe u hi de nachem Föum im McCafé bim Food Court no es feins Frappé gno u so de Abe lah usklinge.

Rückblick

Huch, isch umi mau Zyt fürne nüe Itrag...
aso.. was isch so glüfe die letschte Tage?!

Am 1. November büni bir Firmgotte zumene gmüetliche Abe miteme feine Fondue iglade gsi.

Am Sunntig simer de bim Westside is Bernaqua ga bade. Hie de Link zum Erlebnisbad: http://www.bernaqua.ch/


Es het sehr vöu verschiedeni Bäder, lut Prospekt sis 16, i bü ömu bim mitzelle uf 10 cho, aber uf jede Fau hets mer guet gfalle det, bü ja eh chli Westside-Fan! ;-))
Ds spezielle im Bernaqua isch, dass die meiste Bäder Salzwasser hi, u alli bis uf eis si über 30, zum Teil gar fasch 40 Grad warm, o die zwei Ussebäder! Aaaaah tuet das guet!



Vo de 3 längste Wasserrutsche vor Schwiz si leider nume 2 offe gsi, aber die hani natürlech beid usprobiert. Schad het me chli lang müesse astah. Äbefaus hets e Wildwassercanyon, det gits ganz schön rund! ;-) Uf jede Fau isch d Zyt im Bad wie im Flug vergange!

U de het eim am Mentig de Alltag scho wieder fest im Griff ghäbe....