Clubby-Tour

Das schöne Wätter hüt! Klar, chum chäme die erste Sunnestrahle uf wird d Sehnsucht nachere chlini Usfahrt wieder gaaaaaanz gross! =)

Spontan schribt de Rotsch ob mer nid Lust ufes Ründeli hetti. U so hi sech am 14.30 de Rotsch, d Jasmine, de Pascal ud Simone mit Noah u ig ds Granges-Paccot troffe. D Clubbys si für inisch ir Mehrheit gsi!



Zäme simer de via Givisiez u Payerne richtig Ins gfahre wo sech no de Nicolas zu üs gsellt het. Ziel isch ds Städtli vo Aarberg gsi wo mer de no e churze Kaffihalt gmacht hi.

Det ufem Parkplatz hi de die zwe Cooper Clubbys de guet aut Tüüfu id Mitti gno fürs Gruppefoto! ;-)

Barstreet

Am Samschtig Morge isch am 06.00 de Wecker gange. Wir hi vo 08.00 - 10.00 in Bern 2 Prüefige zum Thema Produktion / Logistik u Beschaffung ghäbe. Üse Lehrgang isch de erst wo die Prüefig muess schribe. Drum hi o d Dozente no ke Erfahrige mit Prüefige uf dem Gebiet ghäbe. Me hets de guet gmerkt. Ade Prüefig isch nur e Bruchteil vo de ganz Theorie dra cho, defür hets det jede Menge Ufgabe ghäbe wo wir no nie gseh hi. Dementsprechend gfrustet si wir de o all gsi nach de Prüefig. Um abdschalte si mer de no zäme id Markthalle is ga zieh u hi später im Pickwicks no e Teil vom Skirenne mitverfougt.



Am Abe büni de mit de Fabienne u Camille as Barstreet gange. De MINI-Päscu hani o no atroffe. Eigentlech hett no die haub HFW-Klass selle det si, aber vo dene hani hani niemer gseh. Macht nüd, wir hi o so de Fun ghäbe. Vorallem wo de DJ Antoine ufgleit het, de Sound isch wie immer bi ihm Hammer gsi!

Ufs Glattis gführt

Gester hani wie letscht Samschtig o scho vo 08.00 - 16.00 vor Schuel us Kurs ghäbe. Dernah si de no es paar vo üs is Don Camillo is ga zieh, öppis muess me sech ja gönne nach somene Tag! ;-)

Am Abe büni de mit de Madlen u de Fabienne uf Bern gange. Ufem Bundesplatz isch ja momentan wieder d Eisbahn wome cha ga schlöfle. Isch natürlech d Idee vo de Ladies gsi, i wer doch niemaus friwillig ufs Glattis gange! ;-)) Nachere churzi Igwöhnigszyt büni de glich no einigermasse ds schlag cho. ;-) D Kulisse isch natürlech ganz toll, wie me da uf däne Böuder o gseht woni im Internet gfune han.

D Madlen wer dernah no gär as Barstreet gange. Auso si wir de zrugg zum Auto u richtig Wankdorf gfahre. Wir hi aber grad e super Zyt verwütscht. De Eishokeymatch isch grad fertig gsi u die wo nid mitem Auto d Strasse verstopft hi, si direkt zum Igang vom Barstreet gange. Wo wir de det acho si isch e riese Schlange vorem Igang gsi. Da hetti mer sicher e zimleche Moment lang chöne warte u de ersch no demit müesse rächne dass de usverchouft gsi wer bis mer bir Kasse acho were. Auso si wir de churzerhand umi zrugg id Stadt u schlussendlech no im Desperados glandet.

Wätter

D Wättervorhersage köre no zu de wenige Live-Sendige. Kes Wunder cha da ab und zue öppis schief ga, so wie vo letscht wo sech e Chatz is Fernsehstudio gschliche het:



De Kater und de Kachelmann meistere die Situation beid extrem professionell, glube us däre Chatz chönt no e richtige Fernsehstar wärde! ;-)

Mi absolut Favorit blibt aber de Lachafall vor Maxi Beaver bim RTL-Wetter, dä isch ja scho legendär! Macht sie irgendwie sympathisch! Da muess me fasch eifach mitlache. Für au die wo ne nomau wi gseh:



Eifach geniau!!! =)
Säute si es Biskayatief u chräftegi Gwitter derart amüsant gsi!

Apropos Wätter..... hüt Abe hets bi üs wieder mau gschniit ud Strasse si umi alli wiss. Hoffe nur dass de Summer dieses Jahr mindestens genau so leng wird wie jetz de Winter isch! ;-)

De Januar-Höck

...het ohni mir stattgfunde. Es het nid sölle si. Sit am Mittwuch büni gar nid zwäg gsi. U woni de am Fritig Mittag vorsorglech glich fangs mitem MINI ha welle ga schaffe (hetti ja chöne si dass es mer bis am Abe besser git! ;-)) streikt no däm sini Batterie. Da chame ja nid mau bös si, schliesslech hani ne sit ende Dezember nüm brucht u er het dusse bi dene isige Temperature uf si nächscht Isatz gwartet. Zudem hani grad chürzlech gläse dass e Autobatterie e durchschnittlechi Läbesduur vo 3 Jahr het. Mini wird am März 5 jährig.... Jänu, uf jede Fau bini de nid uf Mühlau gfahre, aber es het mer auso scho gfehlt... Schliesslech hani sit November 06 woni im Club bü no nie e reguläre Höck verpasst! Die gueti Nachricht no zum Schluss: Mit chli Hilf vomene Ladegrät isch de Tüüfu de glich wieder zum Läbe erwacht. Us Fazit isch o gmacht: Ab sofort bruchi de MINI wieder mind. 1 ir Wuche zum ga schaffe, damit er nid ds letscht no Standschäde bechunt. ;-)

Samschtigs-Marathon

Am 3. Januar isch ganz schön öppis los gsi.

Vorem Mittag si wir richtig Schwarzsee gfahre. Sit über 11 Jahr stah ni ds erste Mau umi uf Skis. Vorher hani ja boardet, aber irgendwie hani glich mau welle probiere ob Carving nid öppis für mir wer. Aso hani de Nami uf de Piste verbracht.

Am Abe simer de uf Rechthaute as Theater gange. Zäme mit de Rita wo o mit uf Rom isch cho. Das het scho fasch Tradition so. Isch ging amüsant wobi ds Stück anderi Jahr o scho besser isch gsi.

Aschliessend büni als Abschluss vo dene paar frie Täg nomau mitem Päscu is Liquid: "Rendez-vous in Hell", das bedütet feinste House u Electro! Kes Wunder isch es fasch haubi füfi gsi bis i dehei gsi bü.
;-)

Silvester

Pünktlech zum 31. Dezember hets ja wieder müesse afah schnie! Bravo! Danke!!!

Scho am Morge am 07.00 woni zum Huus use bü hets gflöcklet. U ds Courtepin hets frisch fröhlech de ganz Morge witergschniit. Am Mittag wo o wir uf de Bank ds Arbeitsjahr beendet hi si d Strasse wieder imene kritische Zuestand gsi. Es isch extrem glatt gsi. D Folge chame sich ja öppe vorstelle. Ds Bundtels isch mer e Frou imene Suzuki Jimny entgäge cho, umd Kurve bricht uf ds mau ds Heck us und sie chunt gröber is Schleudere. Schlussendlech fahrt sie voller Wucht überne Steimuur u landet näbeusse im Gärteli vore Kapelle. Das het ganz schön krass usgseh, die Steine si nur no dür d Luft gfloge, i ha zum Glück grad no chöne brämse, süsch wer i no i sone Stei drin gfahre. Da chame ja nid eifach witerfahre, auso parkieri 50m witer vor u wott ga gugge was passiert isch. Zum Glück isch die Frou scho usgstige u es het scho paar Lüt um sie ghäbe. Unter anderem o e Bekannte vo Wünnewil. Er sig churz vorher genau ar gliche Stell scho is Schleudere cho. U tatsächlech: Si Audi het Achsbruch erlitte u het o süsch nid grad e schöni Büle uf de Site. Vorsichtig wies nur git machi mi de witer ufe Heiwäg.

Ds Erläbte het sicher o dezuegführt dassi mi de entscheide statt mitem MINI per Zug ad Silvesterparty ds fahre. Im Radio chäme im Haubstundetakt Nachrichte vo Eisräge u extrem rütschegi Strasse o uf de Autobahn. Nei, so wotti de Tüüfu nid riskiere. Per Zug gits de nach Zürich-Flughafen wo mi de Sven grad cha mitnäh wo det no d Katja vor Arbeit abhout. D Reis führt us de nach Oberembrach wo de Mike ud Dominique dehei si. Sie hi wieder die glichi Truppe vom letschte Silvester in Schwellbrun iglade. Det gömer de die Sach ganz gmütlech miteme Apéro an.



Anschliessend gits es Fondue Chinoise ide feudali Stube. D Dominique u ig als Vegis hi üs uf Ego es Raclette gönnt. Aschliessend simer no mau in Erinnerige gschwelgt mit de DVD vom United in Zandvoort, hi üs la überzüge vor Full-HD-Bildqualität, PlayStation 3 usprobiert und uf de Carrera-Bahn d Mini-MINIs la flitze. kes Wunder hi wir no baud de Countdown verpasst! ;-)




Ds nüe Jahr het de grad miteme Dessert agfange, besser git ja gar nid! *lach* Dernah hi wir de no Tischbombe losglah u es paar Rundene "Alpe-Flipper" gpöut, u wer d MPC-Rasselbandi kennt, wiss: Da isch Action garantiert!

So uf die 04.00 si wir de o langsam i de Bett u Schlafsäck verschwunde. ;-)