Knowing

Gester si ig, ds pinki, de winti, de Schäggu u ires Näbegrüsch (tolle Name, he? ;-)) zäme is Pathé-Cinema im Westside de Föum "Knowing" ga gugge. Womer is Westside iche gange si het im Food-Court grad no d Stefanie Heinzmann es Konzert gä. Wir si de aber witer für is Chino, schliesslech hani d Tickets scho reserviert ghäbe!

De Föum isch super gsi! Ha scho lang nüm sone guete Föum gseh. Spannend u actionrich! Chani uf jede Fau empfähle!

Nachem Föum si mer de no churz uf Lyss i Kreisu, d Stammbar vo de Baud-Sisters! ;-)

Isch e gmüetliche u lustige Abe gsi mit euch, müesse mer baud umi mau mache!

Hagel zum Erste

Für hüt isch ja scho sit lengerem e Wätteränderig vorgsit worde. No woni am Mittag heigfahre bü isch aber vo au dem nüd in Sicht gsi, im Gägeteil: D Sunne het sogar no schüüch dür d Wolke gugget. De aber isch es uf ds mau rabeschwarz worde. Churz später isch de uf ds mau zimlech windig gsi u de Niederschlag het wie uf Chnopfdruck agfange. Da isch aber nid nur Räge debi gsi, sondern o Hagelchörner. D Temperaturazeig vom Smart het sagehafti 2 Grad azeigt woni losgfahre bü für umi ga ds schaffe. Innert wenige Minute hi d Strasse usgseh wie Bachbett. Öppe e haub Stund später isch de ganz Spuk umi verbi gsi.

Ostere

Jaja, u scho si sie umi verbi, die paar freie Täg. Zyt für es chlises Resümee.

Am Donschtig Abe büni sit langem umi mau is Outisde, das isch e Club wo grad mau 4 Autominute vo mir weg isch, aber bü glich nie det. Das wü eigentlech nume am Donschtig det öppis los isch u i denn nach de Schuel aube nüm gross lust ha wäg ds ga. Aber dismau hani ja weder Schuel ghäbe no hani am Fritig Morge ufmüesse. Isch no cool gsi det. Vöu bekannti Gsichter gseh u zäme mit de Madlen, Fabienne u Co. hani de no chli bis id Morgestunde tanzet. Am Fritig isch äbe de Höck gsi woni scho gäge Nami uf Lyss bü. Am Samschtig büni mitem Nicolas u paarne andere uf Sugiez wo mer meh oder weniger de ganz Nami uf de Garteterrasse vomene Resti verbracht hi. Am Suntig büni mit de Familie uf Montreux u am Abe mit de Lea is Westside ga Fast & Furious gugge. Dernah si mer no uf Bern is Eclipse, aber det isch leider nid so vöu los gsi. U hüt schlussendlech mit Pascal u Rotsch ufe Jaunpass. I würd säge, isch meh oder weniger jede Tag öppis interessant los gsi. Schad, dass jetz umi de Alltag zruggkehrt! ;-)

Jaunpass-Fährtli

Hüt si de Rotsch, de Pascal u ig umi mau zäme underwägs gsi. Am 14.30 hi wir üs ds Granges-Paccot troffe.

Ufem Wäg det häre het de Tüüfu grad no es chlis Jubiläum ghäbe. Allerdings hanis grad chli verpasst fürs Foto!  ;-))

D Route het üs de via Gruyères, Saanen u Zweisimmen zum Jaunpass gführt. Uf hauber Strecke himer de e Haut bimene chline gmüetliche Beizli gmacht wo mer das tolle Panorama gnosse hi.

De Bewiis!

...o de Tüüfu isch ab und zue suber!!!! ;-))

April-Höck

Gester isch es umi mau so wit gsi. MPC Höck in Niederbipp. Am Nami büni de uf Lyss bis zum Pinki u de simer zäme mitem Spaci u am Schäggu gmüetlech ufene Sunneterrasse u hi de Früehling gnosse.

Denn isch es aber de langsam aber sicher losgange. Am 18.45 isch no de Päscu bis uf Lyss cho, u de hett üse Konvoi chöne starte.

Nüi Version vo The Italian Job:

Houptrolle: Spacemachine, Tüüfu u Schnute

Näbedarsteller: Spaci, ig us pinki.  ;-)

Mi Tüüfu isch ready fürs United, de Sticker isch aber bim Publikum nid grad guet acho! ;-)

Am Höck isch es umi mau so richtig Rund gloffe. Üs darf me nid mau es Tischtuech ue Schriber id Hän ga! Churzerhand hi mer üser ganz eigete Vorstellige vo MINI-TOWN kreiert, u wer de MPC kennt, de wiss: Da isch d Fantasie grenzelos!

Uf jede Fau het üsi Vison sicherlech gueti Zuekunftsussichte: Schliesslech isch ja die erst Skizze vom Ur-Mini o ufere Serviette imene Restaurant entsande, u was drus isch worde wüsse mer ja alli!  ;-))

3D-Kino

Letscht Fritig hani umi mau mitem Thomas Gygax abgmacht für i Usgang. Eigentlech hi mer zersch welle ga bowle, schlussendlech simer de aber Pathé Cinéma Westside glandet. De Film "Knowing" wer ds Ziel gsi, da de aber Vorpremiere gfieret het, het me ne nume im Package zäme mit "Fast and Furious" chöne ga gugge wo ebefaus e Vorpremiere isch gsi. Dumerwis het dä aber scho agfange ghäbe. Wohl oder übel hi wir üs de für ne andere Film müesse entscheide, u so simer de uf d Idee cho wir chönti Monsters vs. Aliens ga gugge.

Natürlech nid würklech wägem Film, sondern wü me dä im Pathé in 3D cha gugge. Das isch uf jede Fau mau es anders Kino-Abentüür gsi! ;-)

MINI John-Cooper-Works Cabrio

211 PS u es Dach zum Ufmache... was söu da no scheif ga? S Wätter!!!!

De Slogan für d MINI Präsentation isch gsi "Pfeif auf die Wetterprognosen - Always Open". Grad sooo wörtlech hetti me das ja o nid müesse nä! Am weekend vor Cabrio-Präsentation hets nämlech gschiffet wie us Chüble. Bü de glich schnäu bir Garage Marti verbi ga das nüe Prachtsexemplar besichtige. U als Zückerli hani de ds Cabi grad no chöne ga probefahre. Nid öppe de Cooper, o nid de Cooper S, sondern the one and only MINI John-Cooper-Works Cabrio hani dörfe ga teste. 

...allerdings isch ds Dach die meist Zyt zue blibe. Defür hani mi chöne devo überzüge dass er uf de Autobahn trotz Stoffkaputze weniger lut isch aus de Tüüfu!

Ha de natürlech schnäu müesse hei ga teste wie sech sone Cabi uf mim Parkplatz würd mache *lach*

Würd nid schlächt usgseh, oder?!  ;-))

Ha de ds Dach glich no schnäu müesse ufmache, süsch isch es doch ifach nid s gliche! Ds Fazit isch schnäu gmacht: Troumouto!!! U de Works-Motor isch eifach es Sahnestück, egau ob im gschlossene oder offene MINI: Power pur!

Fremdgänger

Ja genau! So ine büni! Ke Angst, isch nur e churzi Sach gsi! De Michu het am 22. März unbedingt bir Auto-Usstellig vor Fiat-Garage verbi welle. Er interessiert sech uf ds mau fürne 500er. Muess säge, mir gfalle die Dinger ja eigentlech o nid schlächt, aber i blibe glubi vorlöufig MINI treu! ;-)

Nach langem Warte hi mer de endlech öpper gfune wo üs de Schlüssel fürne Probefahrt gä het. Zersch si mer de ganz normal 1.2l ga fahre. Isch natürlech ke Rennsemmel, aber füre täglech Wäg zur Arbeit würd er eigentlech länge. Als Verglich si mer de aber no de 1.4l ga fahre, de het mer säubstverständlech scho besser gfalle. Aber we mer de scho grad det gsi si, hani de o no d Abarth-Version wölle ga teste. De chli Cheib git rächt ab! Bü erstunt gsi, wie lebendig de isch für dass er nume 135 PS het. Allerdings het das Ganze e zümleche Hacke: D Siteneigig ide Kurve wer mer definitiv ds gross u d Länkig het mer gar nid gfalle. Meilewit entfernt vor Diräktheit wie mers vom MINI gwöhnt bü. Das isch extrem schad für das Auto. Gradus macht er nämlech zimlech Spass, aber sobauds id Kurve git chönti me glatt angst becho. Uf jede Fau hets mer umi mau zigt, dass ebe doch ke Wäg am MINI dra verbi führt! =)

23. Geburtstag

Am 17. März büni scho wieder es Jahr älter worde. Git mer langsam baud chli ds schnäu, aber da chame ja nüd mache! ;-))

Am Mentig u Dsischtig hani vo vielne Bsuech ghäbe u vieli hi mer per SMS, PN, Facebook und und und gratuliert. Merci vöumau! Ha mi riesig gfreut dass so vöu a mi deicht hi!

März-Höck

Am Fritig, de 13. März isch üse erst regulär Höck im nüe Lokal ds Niederbipp gsi. Leider nid im Saal wü det scho öpper anders reserviert ghäbe het. Drum si wir haut de eifach ir Gaststube gsi. Isch natürlech scho nid ds gliche wie we mer e Saal für üs allei hi, aber was sölls! Wir hi emu glich a gmüetliche Abe ghäbe!

Autosalon

Am Fritig, 6. März (isch scho lenger här merki grad... ;-)) büni sit langem umi mau mitem Michu i Usgang gange. Spontan hi wir de beschlosse am Sunntig mitem Zug a Autosalon ds ga. Gesagt, getan: Am Suntig si wir de gäge Mittag nach Genf greist. Äbefaus vor Ort gsi det isch de Rohri woni scho sit Jahre nüm gseh ha. Natürlech hi wir üs am MINI-Stand troffe wo ds Cabrio Premiere gfieret het, wo süsch! ;-)

Am Mittwuch druf büni de nomau a Salon gange. Dismau mitem Teri. Sie isch bis zu mir cho u de simer mitem Tüüfu zäme nach Genf gfahre. Womer binere Autobahnraststätte churz Halt gmacht hi isch de promt scho ine cho u het de MINI vo aune Site betrachtet u gfotelet. De isch vo Schwede cho u het mer de no e Flyer vomene schwedische MINI-Club zigt. In Genf acho hi wir üs de gmüetlech vo Stand zu Stand garbeitet bis mer de am Schluss umi bi MINI glandet si.

Hie no paar Böuder vom Salon:

ds nüe MINI Cooper S Cabrio

äbefaus es Cabrio, aber nid ganz die glichi Prisklass:

Rolls Royce Phantom Drophead Coupé

Lotus Exige

gits jetz o oben ohne:

De Bugatti Veyron mit 1001 PS wo meh aus 400 km/h schnäu isch

die Sonderversion vom Lamborghini Murciélago gseht o nid grad langsam us!

Union Jack ufeme MINI Cabi

am Stand vom Verdeck-Lieferant isch es wisses Cooper S Cabrio gstane!

Het Wältpremiere gfieret:

MINI John-Cooper-Works Cabrio!!!!  *sabber*

bi MINI het me ganz offesichtlech o as pinki deicht!  *grins*