"D Hintercher Bande"

Am Fritig büni mit de Familie ganes Freiliechttheater gugge mitem Titel "D Hintercher Bande". Es handlet ide 30er Jahr im Kanton Friburg wo e Serie vo Ibrüch u Diebstähl d Gägend unsicher gmacht hi. E Bande wo zersch fürs nackte Überlebe Ess- u Trinkware gstohle het, het sech nach und nach zure organisierte Räuberbandi entwicklet. Das Ganze beruht ufere wahre Gschicht u het sech bi üs ir Region Sensebezirk abghandlet.

Bereits bim Igang isch alles im alte Stil ghaute. Sehr originell!

d "Bühni" isch e aute, unbewohnte Buurehof in Alterswil. Uf de verschiedene Plattforme werde unterschidlechi Orte dargsteut.

hie z.B. de Polizeiposte vo Tafers

ds Heim vo de Hintercher Bande

da de Tatort nachdem id Poststell ibroche isch worde

zum a Gäud ds cho het die Bande sogar Buurehöf in Brand gleit um d Lüt abdslänke

später hi sie de mit gstohlene Töffe grösseri Reise chöne uf sech nä zum neui Ibrüch ds mache

zwüschedür hi zwei Erzähler immer wieder d Situation erklärt u Originalzitat us de "Freiburger Nachrichten" vo anno dazumal vorgläse, wo wieder mau über die Bande isch brichtet worde.

Das ganze Theater het öppe 2.5 Stund duuret u isch Unterhaltig pur gsi. Me isch sich richtig i die auti Zyt zruggversetzt vorcho u het mitgfieberet. Natürlech hi haut o d Kulisse ud Kostüm perfekt gstumme. Schad nur, het ds Wätter nid ganz welle mitmache. De grösst Teil vom Abe hets meh oder weniger chräftig gschiffet. D Zueschauer si zwar im Trochene ghocket, aber mengisch het me de scho fasch chli mitbeduure mit de Darsteller ghäbe wo bi dem Wätter dusse hi müesse schauspielere.

Meh Idrück gits übrigens uf dere Site: http://www.theater-hintercher.ch/

Westschwizerusfahrt - The third.

Zum dritte Mau het sech de MPC gester troffe für d Westschwiz unsicher ds mache.

Treffpunkt isch am 09.00 bir Comet in Flamatt gsi. Vo det us si wir de via Schwarzenburg, Seelibühl ufe Gurnigel wo wir de erst Halt gmacht hi.

Vom Gurnigel us si wir de witer richtig Thunersee. Det hani für am Mittag bim Restaurant Stella del Lago reserviert. Allerdings si wir no chli früh det gsi, drum hani grad no e chlini Ehrerundi am See entlang ibout. Si zwar glubi nid all so ds fride gsi wo mer irgendwenn wieder Kehrtwende gamcht hi, aber d Akustik mit See uf de einte, u Felse uf de andere Site isch eifach wahnsinnig geil! Boah, het das mal wieder dür d Gasse pfiffe vom Kompressor!  ;-)

Am Mittag si wir de uf de Terrasse gsi wo direkt am See liegt. Herrlech!

Aschliessend isch de Schalleberg ufem Programm gstane. Da hani die lengst Zyt e Ferrari vor mer ghäbe. Ha mi scho gfreut dass i dä de chli cha "jage" bi de Kurve obe, aber 2 Ortschafte vorher überholt de dumm Cheib uf ds mau 3 Autos am Stück u de hani ne lah zieh. Schad, de wer mer auso nid entcho witer obe!  *lach*  ;-))

Ufem Schalleberg obe hi wir de es Dessert gnoh.

vo links: Denise, Kroki, Chrigu, Reni, Spaci, Rene, Rotsch, Dome (charmante Siech! *lach*), slapp ude trollmi. D Nadine u ires Fründ si da nüm debi gsi, die si nachem Mittag bereits weider hei zue wü si no abgmacht ghäbe hei.

Letschti Etappe isch de Jaunpass gsi. Die Kurve gfalle mer jedes Mau chli meh  ;-) Obe acho, wärde mer bereits vom Pascal, de Simone u am Noah empfange. Sie si grad direkt ufe Jaunpass gfahre um no mit üs es Kafi ds triche.

Nachem Jaunpass si mer de no churz i Stau cho wü in Bulle und Umegbig Slow up gsi isch. Nachdem mer vor Rossens no die letschte Kurve in Angriff gnoh hi si mer de über d Autobahn zrugg uf Flamatt wo wir üs de wieder verabschiedet hi.

Danke a alli wo cho si u natürlech ad Denise, mini charmanti Co-Pilotin! ;-)

Juni-Höck

Letscht Fritig isch wieder mau Höck-Time gsi. Feriezytbedingt si mer nid ganz so vöu gsi wie di letschte beide Mau, aber das het de Spass nid möge trüebe.

Ade Businessplan

Am 3. Juli isch Abgabetermin gsi vor Gruppearbeit wo mer e Businessplan als Diplomarbeit hi müesse schribe. Üsi 6-er Gruppe het sech die letschte 2 Wuche vor Abgab praktisch jede Tag gseh. Use cho isch am Schluss es guet 80-Site lengs Dokument wo hoffentlech jetz vo de Experte guet benotet wird.

Als "Belohnig" si wir de am Samschtig nach de Abgab i Europapark. Am 07.00 isch Abfahrt in Bern gsi. Es si guet zwe drittu vor Klass mitcho. Gange simer mitem Car. Det acho hi sech de zimlech schnäu mau zwei Grüppeli bildet. I bü mit de Annelies, am Urs, am Fränzi u am Tinu uf d Bahne. Agfange hi wir grad mit de Blue Fire, de brandneui wo i 2.5 Sekunde vo 0 uf 100 km/h beschleunigt, e Looping u mehreri Spirale het. Boah, das Ding git rächt ab! Natürlech hi wir o Bahne wie d Poseidon, Silver Star, Atlantica Super Splash, Euro MIR, Eurosat, Fjord Rafting, Windjammer und, und, und nid dörfe uslah.

Urs u Annelies ufem Crazy London-Taxi  ;-))

Am Abe nach de Rückreis si wir 5 de no ds Bern ide Stadt fein ga ds Nacht ässe.