35.9 Grad

Bimene Blick ufe Thermometer wo 35.9 Grad azeigt chunt mer grad spontan das Lied i Sinn:

Ferrari-Day Aarberg

Alle Jahre wieder....

Immer inisch im Jahr isch ds Aarberg im Stedtli Ferrari-Träffe. Zümlech gnau am 12.30 hani mi mitem Chrigu det troffe. De Pascal, d Simone u de Noah si o scho det gsi. U wü ds Wätter so wunderprächtig isch gsi, hets Ferraris en Masse gha. Egal ob älteri Modell wie de Testarossa, 348er oder die neuere wie d Modenas, 430er, Scaglietti oder California. Es het so zümlech aus ghäbe. Drunder o ine vo de sehr säutene F40!

Am 13.00 isch de e grosse Teil losgfahre zunere Konvoi-Fahrt richtig Westside, wo d Ferrari-Garage Néhmet e Niederlassig het. Das het zum Teil ganz schön dröhnt im historische Brüggli vo Aarberg! =)

August-Höck

Am Fritig isch wieder Höck-Time gsi. Das bi strahlendem Wätter u heisse Temperature, auso hani nomau de Bengel füre gnoh u bü richtig Lyss losgfahre.

Bir Autobahnifahrt isch no de Chrigu dezuegstosse. U scho isch es losgange. 3 MINIs zäme underwägs, u d Autobahn wird zum Spielplatz. D Lüt um üs ume hi emu zum Teil scho chli komisch gugget. U bi jedem Tunnel hets es Soundkonzert gä. ;-)

De Parkplatz in Niederbipp isch wie jede Monet ziemlich mit MINIs gfüllt gsi.

De nächscht Höck wird de am 11. September si (zum Glück gits in Niederbipp kener Hochhüser, süsch wer mer de Termin chli unheimelig...), denn hani de scho alli schriftleche Prüefige hinder mer u no 3 mündlechi vor mer. I wer froh wes scho sowit wer! ;-)

Spaci und die Turbos

Hüt isch umi mau sone richtegi Usfahrt ufem Programm gstane. Am 09.00 si de Pascal u de Rotsch bis zu mir cho u de simer zäme richtig Meiringen gfahre wo ca. am 10.15 de Treffpunkt zum Start vo üsere Pässetour gsi isch. Mit debi gsi isch no de Spaci wo das ganze ufgleiset het, de Slapp ude Demi. Ds Resultat: De Spaci isch mit 4 Turbo-MINIs konfrontiert gsi. Aber ums vorweg ds nä: D Kompressor-Maschine schint das überhoupt nid beeidruckt ds ha. D Spacemachine isch in Topform gsi u chas no längstens mit de Turbos ufnäh! U weni d Spacemachine ha ghöre pfiffe, hets mi o grad umi chli packt. S nächschte Mau büni mitem Tüüfu am Start! =) Aber de Bengel het natürlech o si Reiz: De Cheib het o e Saulärm gmacht hüt! *sabber*  ;-))

Ds erste Etappeziel isch d Passhöhi vom Grimsel gsi. Obe acho, si wir uf d Terrasse ga ds Mittag ässe.

Leider het de Demi nachem Mittag nüm chöne mit üs witerfahre. Irgend e Kontrolllüchte vom Motor het ufglüchtet, und um uf Nummer sicher ds ga, het är de entschlosse lieber zrugg ds fahre u id Garage ds ga, anstatt no witer uf Kurvejagd ds ga. Hoffe, es sig nüd schlimms u nur d Elektronik wo e Streich gspöut het!

Da warens nur noch 4 MINIs...

Nachem Grimsel simer de via Furkapass uf Andermatt. Spontan hi wir üs entschlosse, vo det us no schnäu übere Oberalp ds fahre. Det obe hi wir de e Kaffihaut gmacht bevors witer bis Sedrun gange isch. Vo det us si mer de umi umkehrt u wieder zrugg übere Oberalp nach Andermatt. Det de "Schluss vom Gotthard" abe u när grad witer übere Sustenpass. De isch eifach es Sahnestück! Vorallem Spaci u ig hi umi mau voll im Element gsi, de Pass macht eifach brutal Spass!

Uf de Passhöhi isch de das Foto entstane:

Chline Rückblick: Vor chli meh aus 1 Jahr (um genau ds si am 25.07.08, das isch o a Fritig gsi...) si wir scho mau det obe gsi. O denn hets sones cools Foto gä, das het allerdings denn no so usgseh:

Nachdem mer chli witer une vom Susten nomau es Pöuseli gmacht hi, si mer de umi zrugg uf Meiringen, wo sech de Spaci ude Slapp verabschiedet hi u via Brünig hei zue si.

D Friburger Fraktion isch ufem Heiwäg no gröber ines Gwitter cho. Churz vor Bern hets uf ds mau wie usem nüd e heftige Platzräge gä. Natürlech hi alli Autos uf de Autobahn sofort verlangsamt. Aber bis i s Dach vom Bengel zue gha ha, bü ig ude Innerum vom MINI scho lang pflotschnass gsi. ;-))

Dehei acho, het de Bengel de grad no e Innerumtröchnig becho u o ds Windschott hani um Abtrochne wäggnoh. Isch ja zum Glück nume Wasser! ;-)

Het uf jede Fau extrem vöu Spass gmacht mit euch, Jungs! Hoffentlech baud mau wieder!!!!

Stresa

Vom 30. Juli bis 1. August büni paar Täg in Stresa gsi. Das isch uf de italienische Site vom Lago Maggiore.

D Fahrt det häre het üs übere Simplonpass gführt.

In Stresa acho, si wir natürlech imene standesgemässe Restaurant ga ässe. Name: MINI!  =)

De pompös Kronlüchter isch leider nid i üsem Hotel gsi, aber in Stresa hets es paar vo dene ganz grosse u luxuriöse Hotel gha.

Blick vom Balkon us

de Bengel het o es schöns Plätzli becho. E guet gschützte u deckte Parkplatz. Näbe ihm si Erzfeind 500er Abarh... glube am MINI One uf de andere Site het er sicher meh Freud ghäbe ;-))

Grad bi Stresa hets ufem See 3 Insle wome mitere Schiffrundfahrt cha ga bsueche, das hi wir üs natürlech nid lah entgah.

interessanti "Briefchäste" gseht me det... ;-)

wieder zrugg ufem Festland, hets am Abe im Stedtli no es Live-Konzert gä.

Am letschte Tag hi wir de uf de Heifahrt no e Haut in Domodossola gmacht wo aube e grosse u bekannte Märit isch.

denn isch es de o scho wieder heiwärts gange.

Ah ja... Gepäck entlade bimene Cabrio git übrigens so:

 Ha ging gmint die Luckevergrösserig sig total überflüssig, bü aber eines besseren belehrt worde. Das isch nämlech no cheibe praktisch!  ;-))