Just enjoy...

23. Dezember, Mittwuch Namitag,

2.0 °C,

no chli Schnee uf die Wiese....

Cabriofahre cha sooo schön si!

schad isch es scho wieder verbi.

MPC Wiehnachtsässe

De 12. Dezember isch bi mir scho lenger fett ir Agenda agstriche gsi. Schliesslech isch das de Termin fürs traditionelle MPC Wiehnachtsässe gsi. U für das hets zersch mau chli Vorbereitig brucht.

Die erst Idee isch scho paar Mönet här, je nöcher de Termin grückt isch, desto konkreter isch die ganz Sach worde. U denn isch es uf ds mau sowit gsi....

Bereits am Donschtig Namitag büni diversi Sache ga hole, so zum Bispiel d Getränk.

de Kofferrum isch pumpevolle gsi, het aber niene häreglängt. De Toyota vo de Eltere isch äbefaus bis uf die letscht Ritze gfüllt gsi. So tief isch de hinder no nie gsi wie denn! ;-)

Am Fritig hani de ganz Tag es Seminar in Baden gha, da hani auso nüd füre Club chöne mache. Aber am Samschtig Morge si de winti, ig u miner Eltere berits am 10.00 bim Schloss Laupen gsi. Schlüsselübergab mit de Abwartin füre Rittersaal.

Zu dem Zytpunkt isch de Rittersaal no e grosse, leere Ruum gsi.

Und los geht's!

De Rittersaal bechunt e ghöregi Portion MINI Style verpasst! Vo de Tischdeko mit Kerze, Nüssli, Mandarinli, Schoggeli über e Wiehnachtsbaum bis häre zum grosse Cherzelüchter u de dekorierte Wänd u Erkere.... Nach paar Stunde isch d Verwandlig geglückt gsi, wir si ready fürs Wiehnachtsässe!

Dank diverse Gabe vo MINI Schweiz, BMW Sauber u Ware wo mer süsch no im Club hei, hi wir sogar e huufe Sache für undere Wiehnachtsbaum ghäbe, es het auso niemer mit leere Händ heimüesse.

Am 19.00 isch es de sowit gsi. I bü die Gäst ga abhole. Vom Treffpunkt bir Comet in Flamatt us si wir imene riese Konvoi losgfahre richtig Schloss Laupen. Det hets de zersch mau es Apéro mit Wyy, Brätzele u Orangesaft gä. Anschliessend het Fondue à discretion in 3 verschiedeni Sorte u es Dessertbuffet für volli Mäge gsorget.

Agmäudet hi sech insgesamt 54 Lüt für de Alass. Allei vo de 3 Fonduemischige si 30 kg gässe worde. Es isch wie immer mitem MPC e gmüetliche u gsellige Alass gsi. Die anfänglechi Skepsis, ob de o alles wird klappe, isch schnäu verfloge gsi, u i glube, o bi de Lüt isch de Abe mehrheitlich guet acho.

Die letschte si am Morge öppe am haubi drü zum Schloss use.

Gäg die 03.00 bi de o ig im Bett glandet. Guet 7 Stund später si wir de wieder im Rittersaal gsi. Zyt, die ganz Sach wieder ufdsruume. So het sech d MPC-Hochburg nach und nach wieder i de gross, dunkel u leer Ruum verwandlet wie ner vorher gsi isch.

Eigentlech schad... mir het de Rittersaal im MINI-Style definitiv besser gfalle!

Aber alles het es End... so o die paar intensive Tage rund ums Wiehnachtsässe. Im Rückspiegel nomau e Blick zrugg u de hissts Abschid näh.

Danke winti für alles, danke o a alli andere wo mitgholfe hi, dass das Wiehnachtsässe o in Realität zimlech genau so usgseh het wie igs mir vorgstellt ha, u danke natürlech a alli, wo debi gsi si. Hoffe es hig euch o gfalle! Bis bald, bim nächschte Event vom MPC! :-)

MINI Center Muri

D Garage Marti isch ja eigentlech in Niederwange.... u mi Bengel chunt o no vo det. Jetz isch aber alles anders! D Garage Marti het nämlech am weekend vom 5. u 6. Dezember in Muri ds brandneue MINI Center eröffnet!

Aber wie so oft muess me zersch schaffe bevor ds Vergnüege chunt. So o a dem weekend. Am 5. am Morge hani nämlech wie zahlrichi anderi vor HFW dörfe atrabe für d Englisch Prüefig fürs BEC Vantage-Diplom. Am 08.30 isch es im UNIA-Gebäude ar Weltpoststrasse losgange. Zersch Reading, denn Writing u zum Schluss no Listening. Das ganze isch bis am Mittag gange. Aber kooomisch... ufem Parkplatz hets überall MINI Fahne gha.... Zuefälligerwis isch grad näbe dem Gebäude de Parkplatz gsi wo me het müesse parkiere für ad Eröffnig vom MINI Center ds ga. Naja, wenigstens hani de scho grad gwüsst wo i de am Nami häre muess! ;-)

Am 15.00 hi sech de de Winti, s Pinki, de Chrigu, de Yves u ig üs bir Raststätte Grauholz troffe. Zäme si wir de wieder zu dem ominöse Parkplatz....

... det het bereits e Shuttlebus uf üs gwartet. Mit däm isch es de zum brandneue MINI Center gange.

Nachdem wir det üsi Wundernase hi chöne füetere si wir de id Stadt gfahre wo mer si id Grissino gane Pizza ässe. Dernach no es Dessert "bim Grosi", u de si wir wieder zrugg uf Muri is Center wo Lounge-Abe isch gsi.

de mattschwarz JCW het churzerhand als DJ-Pult müesse häreha u ide obere Etage isch e Candy-Bar igrichtet worde. Dezue Fatboy wo d MINI Fans bereits vo de MINI United här kenne...

ar Bar hets vier verschiedeni Shots gä. 2 devo si ohni Alk gsi, di hi wi natürlech grad fläschliwiis müesse usprobiere! ;-)

Nachem gmüetliche chille im MINI Center si de Chrigu, de Yves u ig de no witer is Liquid wo wir dank de MINI Party gratis inecho si. Det hi wir de no chli witergfieret! ;-)

Am Suntig büni de nomau mitem Rotsch, sinere Jungs u de Chantal uf Muri. De Wäg hani ja jetz bereits uswendig kennt! ;-)

Äbefaus det gsi am Suntig: De Pascal, d Simone u de Noah u o de Smu mit de Manu.

cool natürlech o die grossi Schlaufe wo ufem Dach gsi isch. Typisch MINI halt! =)

U was wer MINI ohni sini Goodies! Natürlech hets o bir Eröffnig öppis für d Fans gä:

e coole Union-Jack-Chugelschrieber, e Schocko-MINI, MINI-Gummibärli u öppis füre frisch Atem. ;-)

Really Always open!

Samschtig, 28. November 2009, dusse si knapp meh als 10 Grad.... de Bengel öffnet sis Verdeck! Herrlech! Isch richtig schön gsi, die Sunnestrahle ohni Dach überem Chopf chöne ds gniesse!

Am Abe bini de mit Winti, Pinki, Spaci, Schäggu u are Kollegin vom Schäggu is Westside ga "2012" gugge. Isch eh chli mis Westside u Kino Weekend gsi. Scho am Fritig büni mit de Chantal is Westside ga "Love Happens" gugge u am Samschtig Nami mit de Eltere is Westside ga shoppe.... ;-)

FKB Seebezirk

Am 20. November hi wir vor Kantonalbank Seebezirk us ds Wiehnachtsässe gha. Seebezirk isch i üsem Fau die drü Filiale Murten, Courtepin u Kerzers.

Zersch si wir uf Friburg ga Bocchia spiele. Wott me das richtig spiele, gits zimlech viel Regle ds beachte, gar nid gwüsst! Isch aso chli komplexer als das wo me öppe aube im Summer am Strand spielt!

d Carmen (Kerzers), ig, de Willi (Kerzers) u de Walti (Murten)

Nach dem Turnier wo niemer rächt wiss wer jetz gwunne het, wü die beide Herre vo dem Boccia-Center anschinend nüm ganz nüechtern gsi si u drum d Spielergruppe chli falsch zämegstellt hi, si wir de witer uf Misery ga ds Nacht ässe.

Das Restaurant det ghört am Ehemaa vor Fabienne wo in Courtepin arbeitet u isch bekannt für feins u exklusivs Ässe.

Chantal (Kerzers), Daniel Werro (mi Chef in Courtepin), d Pat wo am Serviere isch, de Sébastien ud Fabienne (beid Courtepin) u de Andreas Spring, Regionaldirektor vom Seebezirk wo in Murte schaffet.

d Anne-Marie, Adrienne, Luc (alli Murten), d Iris (Kerzers), d Gaetana ud Fabienne (beidi vo Murten)

d Virginie (Courtepin) u nomau d Anne-Marie ud Adrienne

de Carla isch prompt es Malheur passiert wo sie mit de Carmen wo uf de anderi Site vo mir ghocket isch het welle Ässe ustuusche. Das de wo ide Mitti hocket ds Opfer isch, isch ja o klar! Aber das hi wir de schnäu mit de nötige Mitteli usbesseret gha. ;-)

de Alain (Murten), d Ingrid (Kerzers), d Gatena, d Fabienne...

....ud Chantal.

As isch würklech a gmüeltiche u unterhaltsame Abe gsi. Leider hani nid all zu lang chöne mache wü ni am Samschtig Morge wieder uf Bärn a Englisch Kurs ha dörfe ga....