Bestande!

Fritig, 8. Oktober 2010.... ab de viertu ab sächsi wird uf de Site vor Schuel die Kandidtatenummere ufgschaute wo d Prüefige bestane hi. Mini Kandidatenummere: 47765! Aso nix wie z pdf lade u das Nummero uf dere Liste sueche... de Puls raset, schliesslech hani jetz 3 Jahr i die Schuel investiert.... und siehe da! 47765 isch tatsächlich uf de Liste! Was so viel bedütet wie: I bü ab sofort diplomierte Betriebswirtschafter... aso... z mindest fasch! Am Samschtig hani de d Iladig für d Diplomfiier im Stade de Suisse becho. Z Diplom hani de abem 29. Oktober ide Händ! :-)

Blog wiederbeläbig!

Ja, isch a Moment här sit i da z letschte Mau dri gschrübe ha. Isch einiges gange i däre Zyt.

Weni d Agenda düre gange sit em letschte Itrag.... De Bengel isch ir Werkstatt gsi wüner ja bir Bergbuiretour wieder die Elektronikmeldig gha het. Det isch z Turboabblasventil gwächslet worde ide Hoffnig, dass es das isch gsi. Mittlerwile hani die Mäudig nüm ghäbe, aber ha natürlech o ke 5-Pässe-Tour meh gmacht....

Z DJ BoBo Konzert isch o gsi... u i bü ehrlech gsit a chli enttüscht gsi. Klar, d Shows si ging guet gsi, drum isch es Motze uf hochem Niveau, aber er het definitiv scho besseri Shwos ghäbe wo meh Action isch gsi aus bir aktuelle Tour.

Zwüschedür hi mer mau e Dütsch-Prüefig gha wo füre Abschluss zöut het u amene schöne Suntig büni mit de Chantal a Lac de Joux usgfahre, mitem Cabrio natürlech!

Dernah isch d MPC Herbstusfahrt cho... ohni mi! Ja, isch ke eifachi Entscheidig gsi, aber i ha d HA lah suuse, irgendwie hani die Zyt ifach für mir brucht...

Afang September isch de d Fallstudie usecho wo sech bi jedere Prüefig ca. 50 % vo de Ufgabe druf bezieh.... d Aspannig isch aso definitiv gstige, jetz gilts ärnst!

Am 11. September no z U2 Konzert (Booah, s geilste Konzert woni je erläbt ha! Sorry Madonna, BoBo, Pink und Co., aber die Jungs hi eifach die geileri Bühni u Show!), u de isch es am Mentig druf losgange. Leider hani deswäge o de MPC Event uf de Alp Scheidegg verpasst.... 88 MINIs hi sogar d Presse azoge. I ha de aber 2 Wuche mit 6 schriftliche u 3 mündliche Prüefige vor mer ghäbe.

Direkt aschliessend si mer de mit de Klass uf Barcelona, vo Suntig bis Mittwoch... moment! Da hi wir d Rächnig ohni d Spanier gmacht. Die hei nämlech am Mittwoch e Generalstreik akündet u so hi wir de ersch am Donschtig chöne zrugg id Schwiz flüüge!

Und zack hi wir scho Afang Oktober. D Zyt isch wie im Flug vergange!