Friburger Fraktion

Immer wieder Sonntags....

Nei, i stümme da nid irgend e Schlagerparty füre Hans an, sondern mine d Usfahrte vo mier, em Rotsch, em Päscu u immer öfters o vom Spaci, üsers Ehremitglied ir Friburger Fraktion! ;-))

Isch ächt cool, macht är de leng Wäg ging uf sech, nume um chli mit üs chöne ds race. Aber Spass hets umi mau gmacht! Über Umweg simer richtig Schalleberg (da Gurnigel u Jaunpass leider no im Schnee versinke...) gfahre u vo det us no über ds Chuderhüsi (hisst würklech so!!!). Hammer Strässli det! Da chönti tagelang fahre! De Abt-Audi A6 het emu ke Chance ghäbe gäge üs, genau so wenig wie de Töff wo mer hindernache isch übere Schalleberg! ;-))

Hie no as paar Fotos:

Nachdem de Rotsch no richtig Kirchbärg abboge isch u de Pascal für hei d Autobahn gno het, si de Spaci u i no dür d Stadt Bärn u aschliessend no chli hinderdüre em Forst entlang bis zu üs hei.

Het ächt Spass gmacht, ha dä grell Pfiffton vom Kompressor no ging i de Ohre, ach so schööön! ;-)

Donschtigstour

Donschtig Nami, i ha bis am 17.00 Zyt, dernah muess i no uf Friburg ane Sitzig vor Kantonalbank. Ds Wätter zigt sech usnahmswis umi mau vor schöneri Site u o ds Thermometer stigt langsam gäg die 10 Grad... Das schreit dernah, wieder mau de MINI füre ds hole. Nachdem i schnäu no uf Flamatt öppis gange ga erledige, machi es chlis Tüürli querfeldein mitem MINI. Eifach mau vor Houptstrass abbiege und d Näbestrasse näh, ohni Navi, ohni Plan, nume de Wägwiser nache. Zwüsched Bern - Neuenegg - Mühleberg gits tonnewis settig kurverichi chlini Strässli. Hie chline Fotobricht:

d Boustell vom nüe Shopping-Center Bern West. Ganz im Stil vo Sihlcity enstit da es Mega-Center

Let the rallye begin! =)

Troumhaft, nume de Tüüfu u i u die Ussicht. Ke Vercher, eifach Fahrspass pur!

Fotoshooting in Gümmenen:

Zwüsche Gümmenen u Laupen hets e markanti Brügg wo d Zuglinie drüber füehrt. Kurzentschlosse biegi det mau uf ds Feldwegli ab, stelle de MINI zwüsche zwe Pfilere vo dere Brügg u knipse los. Leider isch de Tüüfu aus andere aus suuber u d Cam isch nume die vom Handy, het aber glich es paar schöni Fotos gä:

Nach däre Exkursion ufem Fäudwäg isch am Samschtig definitiv Wäschtag füre MINI! ;-)

Es isch Früehling!!!!

Woran erkennt me am beste, dass vor wenige Täg de Früehling agfange het? Geeeenau, am Wätter! U am Mentig Morge het das bi üs eso usgseh:

sovöu Schnee hets glubi de ganz Winter nid ghäbe

Obwou de MINI im Unterstand isch, hets ne tüchtig zuegschneit.

D Schlussfolgerig: MINI Fahre isch momentan nid möglech, da bereits d Summerpneu druf si, de muess haut de Smartie Sonderschichte mache! ;-))
...u o dä isch chli is spuele cho woner bim Parkplatz ds Murte i Tiefschnee het müesse. Het de chli Cheib gross bluffet und drifted wiene grosse mit sim Heckatrieb! ;-)

allerlei

De Tüüfu ds Murten ufem Parkplatz

Bir Bern Are.. ääääh... Postfinance-Arena stit zurzit de grösst Kran vor Schwiiz.

Bean Teddy am Relaxe bi mier dehei ;-)

pinki het o e Smart us Zweitauto???

...u was macht sie eigentlech ds Murte? *überleg*

Happy Birthday, Tüüfeli!

Hüt vor genau 4 Jahr hani dörfe mi MINI id Garage ga abhole. Wow, i mag mi no erinnere wie narvös i denn gsi bü. Am Nami hani no Mathprüefig ghäbe, bü glubi bi jedere Ufgab uf d Lösig "Cooper S" cho! ;-))

Am Abe isch es de sowit gsi, diräkt nach de Schu ab id Garage. Nachdem de Verkäufer mier sämtlechi Funktione erklärt het darfi de Schlüssu dreihe u heifahre. Natürlech no mitem blaue "L" hinderdra. Ha e riiiiiiese Respäkt vor däne 163 PS ghäbe. Woni dehei zuifahre warte scho d Nachbare u rüefe "De MINI chunt!!!!!". Am Abe het de Vater nomau mitmüesse. Ha das Auto nid ifach ufem Parkplatz chöne lah stah, ha unbedingt welle fahre. Ds Wätter isch o denn nid so toll gsi. Het liecht gflöcklet u de MINI isch natürlech mit Summerpneus usgliefert worde.

Hie es paar Fotos wo ner no fasch nüü isch:

U hie Fotos wie ner jetz usgseht:

Im Verlouf vo däne 4 Jahr hi sech es paar Sache veränderet. Bitz tiefer, im Summer anderi Fäuge, Facelift-Xenonschinwäfer, Zuesatzschinwäfer, wissi Blinker hinder, Aero-Heckschürze, harman/kardon Soundalag, Chrominterieur, Leistigssteigerig uf ca. 210 PS, Works-Bremse und und und.....

Was sech i däne 4 Jahr nie veränderet het: De MINI macht eifach extrem Spass! Das ging no wie bim erste Mau! IS IT LOVE?

Ostere

ds Osterwuchenänd wer o besser Wiehnachte gsi. De freut me sich, we me vom Fritig bis u mit Mentig mau es paar Täg fri het, u denn das: Ds ganze Wuchenänd grau in grau u ging umi falle Schneeflocke. Da blibt de MINI mit Summerpneus leider im Unterstand stah. Debi wers doch so toll gsi, mau chli ganes Ründeli ds dreihe...

Heja, da chame nüd mache.... Schad um die frie Täg, aber was sölls....

22. Geburtstag

17.03.08: Mi 22. Geburtstag.

Gfieret hi mer ja gester scho chli. Hüt schaffi ganz normau. D Kollegin isch säute schlächt glunt u fasch de ganz Tag hinder bi de Maschine am Bancomat uffülle, Münz rolle oder was es süsch no grad git. I bü praktisch de ganz Tag allei am Schauter. Was söus... isch ja eigentlech a Tag wie a andere o.

Am Abe büni grad zur Tür iche lütets scho. Das isch normau bi üs. I freue mi jedes mau wievöu Lüt dass am Geburtstag verbi chäme öppis cho triche u chli cho plaudere.... Nachbare, Verwandti u Bekannti, isch jedes mau gmüetlech!

Hie no ds Video....

Extra füre Winti! *lach*

Hie no ds langersehnte Video wo mer am Sunntig bi üs dehei losgfahre si für üsers chline Ründeli rund um Murten:

Füürio in Flamatt

Ir Nacht uf Hüt hets ds Flamatt mitz im Dorf bronne. Hie es Böud us 20min.ch:

Ir Region Bern / Fribourg hets ja vo letscht scho paar Brandserie gä wo ganz offesichtlech Brandstifter am Werch si gsi, hoffe mau schwer, dass es hie nid de Fau isch, süsch machi mer de scho langsam Sorge, es chunt immer nöcher!

(no nid) Geburtstag

Churz vor 14.00 träffe die erste ii. Spontan hani gfune, chönti doch es paar MINIs ilade für mi Geburi, isch zwar ersch moor, aber am Mentig git so schlächt! ;-)
Leider macht ds Wätter nid ganz mit, aber das hautet üs vomene chline Usfährtli nid ab. Nid lang u nid wit, aber immerhin!

We doch nume au Täg so vöu MINIs bi üs ufem Parkplatz würde stah! ;-)
Winti het de Bean-Teddy u de MINI-Bulldogge als Bifahrer, natürlech agurtet wie sechs kört! *lach*

Traumpaar winti u speedy

wow, ds nüe MINI-Badetuech!!!!!

Nachem Usfährtli hi mer bi üs dehei uf Raclette-Öfeli Pizza gmacht.
Hie no Böuder vor ganze Truppele....




Isch a super Tag gsi, Danke aune wo cho si! Het mi ächt gfreut!
Am liebste hetti de ganz Club iglade! =)