Sportfahrtraining Interlaken

Am 02.25 büni dehei gsi vom Höck, am 06.15 het de Wecker scho wieder glütet. Zäme mitum Pascal gani hüt uf Interlake ads ACS-Sportfahrtraining. Das ganze findet ufem Flugplatz statt. Am 07.00 fahre mer los damit mer pünktlech am 08.00 det si. Us ersts gits mau d Startnummere ad Frontschibe. Nachere churzi Theorie gits de uf d Piste. Üsi Gruppe feht mitem Kreisfahre an. Zersch Kreis, denn Oval u zum Schluss im 8ti, alles möglechst noch u schnäu ade Pilone verbi. Vorallem bim Kreisfahre würd ihm nach de 6 oder 7 Rundi so richtig sturn im Chopf. *haha*

Chlis Video vom ewige Umgang im 8ti:

Zweiti Uebeig: Zwe preparierti Corsa A, de eint mit "Ichoufschärerli-Räder" hinder wo ständig usbreche u de zweit isch e "Falschlenker", auso ine wo me gäg rächts muess länke für gäg links ds fahre u umgekert. Ganz schön knifflig, aber macht Spass!

Witer gits mit verschiedene Slalom-Uebige

"Don't even think of touching my MINI" =)
De Bulldogge passt ufe Tüüfu uf während wir e Mittagspouse mache.

Am Nami fiele mer de ade richtegi Kurvetechnik u löhs mit abgschaltetem DSC so richtig la krache

Denn de erst Höhepunk: De chli Slalom-Parcours! De Tüüfu schreit wie am Spiess ud Reife quietsche dezue wie blöd. Darf gar nid ads Profil deiche! ;-))

Vorletschti Uebig: Vollbremsig uf nasser Fahrbahn mit Tempo 100 inkl. uswieche, da luft ganz schön öppis im Auto! =)

U als Grande-Finale no de gross Slalom-Parcours wome so richtig cha gas gä. Da gäbe mer nomau aus u jage d MINIs so richtig über d Piste. Natürlech stets ohni elektronischi Hälferli. Macht würklech meh Spass aus we me ständig vom DSC usbrämst würd.

U de isch de uf ds mau o scho fasch 18.00 u ds Fahrtraining isch fertig. Jetz umi schön brav heifahre u e super Tag neigt sech em Endi entgäge.

Autowäsche isch jetz dringend nötig! =)