MINImania

Himmu! ;-)
Eigentlech hani ja nume schnäu zur Garage Bühler uf Neuenegg welle ga, wü bi mier letscht Wuche 3 Clips vo de Kunststoff-Kotflügle broche si u i nüi bruche. Da aber ds Auto vo de Heifahrt gester Abe umi mau extreeem dräckig usgseht machi e churze Abstächer zur Wäschalag. U uf was triffi det? Bi de Innerumstoubsuger stöh doch tatsächlech grad 2 MINIs näbenand. E nüe Laserblue Cooper S u as Astro-Black Cooper Cabrio. I zögere nid lang u lufe mit Flyers bewaffnet diräkt zu däne Ladies. U scho simer mittedrin im Gspräch. Totali MINI-Freaks haut! ;-) Die eint isch sogar o in Zandvoort gsi u wott nächscht Jahr unbedingt debi si we ds MINI United in England isch. Nachdem mer no e Moment über MINIs gfachsimplet hi, hani de mi Tüüfu glich no schnäu gwäsche. Grad woni vo de Usfahrt losfahre chunt mer e Darksilver Cooper S entgäge... Heeee! Dä kenni doch! De Mathis alias Lac! *lach* Sone Zuefau! Churz druf lütet ds Telefon und siehe da! Es isch tatsächlech ihn gsi! Dä hani scho mega lang nüme gseh. Er isch miteme Kolleg underwägs für ga ds bade u wartet jetz witer vor u mier damit mer nis schnäu chi Sälü säge. Auso fahri umi ar Wäschalag verbi wo mer die Frou mitem Cabi zuewinkt. E churze Schwatz mitem Mathis u de starti nomau de Versuech bis zur MINI Garage ds cho *haha*
U woni det mitem Mechaniker grad dran bü die abbrochne Clips durch nüi ds Ersetze fahrt wieder die Dame im Cooper Cabrio verbi u winkt mer nomau usem offene Dach zue. Bim dritte mau chostets de süsch aube öppis! *haha* ;-)
Churz druf woni grad am Bancomat bü fahrt no de blau Cooper S mitem Union Jack ufem Dach verbi wo ni o scho mengisch gseh ha. Heee, so vöu MINIs in so churzer Zyt! Das hani da bi üs no nie erläbt! =)

Mittwuchs in Wangen...

Es isch umi Tuning-Treff in Wangen.... dismau hanis is MINI Forum gstöut und siehe da: Es endet imene MINI-Träffe mit zwe, drü Ussesiter. ;-)

Satti 14 MINIs träffe sech ufem Platz. Eifach geil! Drunder sogar d Ruth mit Belgeitig im brandnüe John-Cooper-Works Clubman, wow, gseht dä us! Hammer! Gits bi üs ersch ab September. Äbefaus am Start: Es paar "nüi" wo ds erste mau debi si. Cooli Sach!

Mi hi bir Bar vor e gmüetlicha Abe verbracht, allerdings nid soo lang, so gäg die 22.00 isch de es Gwitter im Anmarsch gsi u wir hi üs vonand verabschiedet u d Heireis aträte.

"Die graue Eminenz"

Bir Heireis vom Bodesee här hani doch unbedingt no e chline Abstecher nach Bischofszell müesse mache wo d Garage mit de vöune Classic MINIs isch. Ohni Amäudig trudleni det eifach mau ii, u de Verchäufer nümmt sech sofort Zyt. Mit de graui Eminenz darfi nach Kradolf fahre wo d Halle mit de Classic MINIs isch.

Hie Böuder us Autoscout vo dem Schmuckstück:

Und moi-même i däm chline Flitzer:

Eifach cool, mit däm ds fahre! Git zwar scho nid so ab, aber de Sound isch Hammer uds Feeling einmalig! Leider chostet er o e ganzi Stange Gäud....

Ide Halle hets aber no ganz vöu anderi vo däne Kultdinger! *sabber*

sogar 2 Cabrios hets!

...u es Stuefeheck mit Fresse schräääg! ;-)

Jaja, die cheibe Classics... si haut scho cool! We sie nid so tüür weri, hetti doch scho lang so eine als Zweitauto! =) Aber wer wiss... villicht eines Tages... die wärde ja nid älter, nume schöner! *g*

Lindau

Am Mentig Morge simer richtig Bodesee losgfahre. Ziel: Lindau. Bis det het me vo bi üs us guet 3 Stund mitem Auto.

Et voilà, so gsehts uf däre chlini Insle ufem Bodesee us...



Lindau liegt bim 3-Länder-Eck Schweiz - Dütschland - Österrich u kört zu Dütschland, ganz genau zum Bundesland Bayern.

Ds Hotel vis-a-vis grad bim Bahnhof

Lindau by night

Am zweite Tag gits de no chli witer via Friedrichshafen nach Meersburg. Das isch ebefaus es chlis alts Städtli mit Charme.

Mitem Schiff gits de no nach Konstanz

A Zeppelin überem Bodesee

Zrugg in Lindau.

Det isch am Mittwuch Morge scho früh e grosse Umzug.

...u de gits de mit Umwege wieder gäg hei zue.

Hie no paar Impressione vo Appenzell

Chaos mit Happy-End

Isch scho lang planet gsi, dass mer hüt öppis wi mache, aber was genau isch no unklar gsi. Gester im Europapark hi de Spaci u i beschlosse mi chönti ds Flamatt oder so abmache u de entweder i Schwarzsee oder uf Seelibühl ga. Womer dehei gsi si, isch aber alles dürenand grate, u es paar hi lieber öppis ir Region Solothurn welle mache u de isch es los gange mitem Hin- u här. ;-)

Am Morge isch no schnäu de Pascal verbi cho u het gmint wes da ir Nöchi isch, werener o debi, aber schlussendlech hi sech de die andere entschide, sich in Lohn (SO) bim RoadStop ds träffe. Glube isch schliesslech de fasch 15.00 bis i det iträffe. Spaci, Winti, speedy, Möni u Thomas mit de Chiara si scho det.

Sobaud de Reni itrudlet isch, gits de im Konvoi witer richtig Wyssestei...

Dobe im Resti isch d Organisation meh aus schlächt, aber was sölls, mache mer ds beste drus! ;-)

Ha ging gmint es gäb nume schöni MINIs, aber dä hie würd mer jetz ganz ehrlech gsit nid so gfalle... lieber e normale Classic aus dä! *duckundweg*

...da gfalle mer üse Bijous scho besser! =)

Cools Foto: MINI durch und durch.... Vo vore: Spaci, Reni, Möni, Winti u speedy!

Europapark

We amene Samschtig Morge bi mier de Wecker am 05.40 lütet, muess scho öppis bsunders los si. U das isch es o. Hüt git de MPC i Europapark... oder ds mindest e Töu devo, wü würklech vöu simer dismau nid. Paar hi no churzfristig müesse absäge. Am 06.30 büni bir Daniela wo hüt o mitchunt, u de gits de witer bis zum Rastplatz churz nach Egerkinge, woni mitem Spaci abgmacht ha. Zur grossi Ueberraschig isch no d Danimuus debi. Die zwü hi sech gester Abe spat no ir Chatox troffe u d Danimuus het sech spontan entschide, o no mitdscho. Witer gits bis Pratteln, wo de Pät, de Slapp sini Fründin, d Pascale, bereits uf üs warte.

Pät het die gliche Fäuge wie i! ;-)
U das vor mim Auto isch übrigens d Daniela! =)

Uf de dütsche Autobahne hets de relativ vöu Verkehr, de chimer die Strecketeili ohni Tempolimit nid würklech usnütze.... :-(

huch, no e vierte MINI wo zuefälligerwis grad näbe üs stit ufem Parkplatz vom Europapark

Ganz toll findi ja d Beschriftig vo de Parkreihe im Europapark... gseht doch verdächtig nacheme MINI us, oder?! =)

Im Park inne hani de kiner Fotos gmacht, mi si eifach zuu beschäftigt gsi mit üsne tiefgründige Diskussione! *haha* Het zwar mega vöu Lüt ghäbe, aber mi hi emu bi de Wartezyte ging gwüsst was ds verzelle... o wes nid vöu schlaus isch gsi, uf jede Fau hets umi mau vöu ds lache gä! D Zyt isch wie im Flug vergange. Glube nach jedere Bahn himer umi e Trink- u Ässpouse gmacht, de Tag isch eifach voll tschütt gsi! =)

U d Heifahrt o!!! D Daniela het zwar nid so freut ghäbe näbeine, aber mi his churz ganz schön la krache u d MINIs hi sech uf de Autobahn chöne ustobe! Hihi!

Irgendwenn nach de 23.00 büni de todmüed aber glücklech wieder dehei. Super Tag gsi! Git sicher umi Muskelkater vom Lache! ;-))

Pässetour

Fritig Morge, öppis nach de 11.00... de Pascal, de Rotsch u i träffe üs bi mier dehei für zäme nach Meiringe ds fahre. Det wartet de Spaci uf üs, u üsi Pässetour cha afah. Zersch hani aber no mini schwarzi Plastikleiste bim vordere Kotflügel notdürftig müesse repariere, det si 2 Clips broche, wahrschinlech vo gester Abe womer uf Murte si... det hani bire Baustell überne riese Absatz müesse, de het ds Rad awäg degäge gschlage... anders chani mier das nid erkläre....

Als ersts isch de Grimsel ufem Programm gstane. Herrlech, die Kurve! Dobe acho mache mer es Mittagspöuseli u gönne üs öpps ds Ässe.

Dernah gits witer richtig Furka. Ds Panorama isch schlicht atemroubend!

Nachdem mer über d Furka si, mache mer churz nach de Passhöhi es Kaffeepöuseli, o hie isch d Ussicht fantastisch!

Im Tal une pfupferet e Damplok verbi....

... ds Bächli bahnt sech sie Wäg dür d Landschaft...

u üser MINIs strahle wie neu

Spaci het sine nid grad diräkt näbe üsne chöne stelle wü e Ford Galaxy mit dütschem Kennzeiche dezwüsche gstane isch... Üsers grose Glück wie sech speter usstellt! Denn während wir uf de Terrasse d Sunne gniesse fahrt e chline Abschleppwage häre u wott vis-a-vis vo de MINIs uf de anderi Strassesite parkiere. Woner merkt, dass ds Feld ds chli isch für ihn, fahrt er wieder rückwärts use.... u streift debi mit sire Laderampe ds ganze Heck vom Galaxy, dä gseht dernah us als ober im Chrieg gsi wer. De absolut Hohn: De Fahrer vom Abschlepper tuet so als ob er nüd gmerkt hetti u fahrt vollgas devo!!!!! "Das huere verdammte Arschloch" rüefi no vor Terrasse us.... isch mer ifach grad usegrütscht. Das macht me doch eifach nid. Aber de het d Rechnig ohni üs gmacht. I ha gseh dass ds Kennzeiche mit SZ afaht, öpper am Tisch näbedran het gseh dass d Nummere mit 67 afaht u 5-Stellig isch, u de Rotsch schlussendlech het sech de Name vor Abschleppfirma chöne merke. Die Infos zämegsammlet gömer is Resti iche u mäude das em Personal damit die de Polizei chi alüte. Zuefällgerwis kört de Bsitzer vom Galaxy die Konversation u fahrt sofort mit sim Kolleg los um dä Abschleppwage idshole. Himmu, wie imene Krimi!!!! Nachdem wir üser Personalie u Telefonnummere für eventuelli Rückfrage vor Polizei no hinderlah hi, fahre mer de o mau witer. Im Tal une gseh mer de die zwe Dütsche wo d Verfolgig ufgnoh hi wieder, näbe ihne d Tatwaffe, de Abschleppwage, vom Fahrer jedoch fehlt jedi Spur.... Aber d Polizei sig bereits underwägs, so eifach chunt dä nid devo, hoffe, dass dä sini grächti Straf bechunt!

Nach dem Schock widme mer üs de aber wieder üseri Route. Nachdem mer bi Andermatt verbi si, gits de no witer übere Sustenpass. Det chimer de so richtig d Sau uselah, wenig Verkehr u tolli Strecki, Fun pur!!!! Dobe gits de nomau es Fotoshooting u es Pöuseli...

Haha, mi hi no schön glachet... es riiiese Theater we mer ds Auto am Strasserand abstelle u e Abschlepper verbi chunt, aber d MINIs vore riiiiiese Gerölllawine abstelle? Kes Problem! Würd ja wou nid grad e Stei obe ache cho..... haha! ;-)

Schöne Lotus Super Seven isch o dobe gsi!

....u abermals e einmaligi Landschaft!


Dernah simer de umi gäg Meiringe zrugg gfahre wo sich de Spaci via Brünig vo üs verabschiedet het u o wir umi de Rückwäg is Friburgerland gmacht hi.

Ganz e schöne Tag gsi! Het mega Spass gmacht mit euch, Jungs!!!!!