Samschtig

Gester Morge büni schnäu bir Garage Marti verbi und was gseh ni det.... es One Cabrio mit U-Nummerschild umestah. Aso nix wie häre u frage obi demit schnäu dörf gane Rundi dreihe, ds Wätter het ja o grad mitgspöut. Und somit hani grad 2 persönlechi Premiere hinder mi bracht: Ds erste mau e MINI One gfahre, u ds erste mau es MINI Cabrio gfahre!

Am Nami hani de mitem Nicolas abgmacht. D Idee isch gsi ufe Vully ds fahre u de no chli am Murtesee entlang. Zersch hi wir aber no e Moment uf sini Kollegin, d Bianca, müesse warte wo o mitcho isch, die isch nämlech im Stou stecke blübe. Wo mer de komplett gsi si, isch de Cooper S / Starlet / Golf I Cabrio Konvoi losgfahre richtig Vully. Sehr wit si wir aber nid cho. D Strasse zum Vully ufe si no voll Schnee gsi u je steiler ufe dass es gange isch, desto meh het ds DSC vom Tüüfu Leistig weg gnoh bis i schlussendlech fasch bi blibe stah. Jaaa, eigentlech hettis ja o chöne usschaute. So het mi das aber grad chli agschisse det ufe ds fahre, u o de Bianca isch die ganz Sach nüm so rächt wohl gsi. Auso hi wir uf hauber Strecke wieder umkehrt u si de no chli Querbeet dür ds Seeland gfahre bis mer in Avenches glandet si wo mer de no ines Resti si gange.

Am Abe büni de mit de Chantal, am Pascal u de Claudia no chli uf Friburg. Eigentlech hi mer bir Altstadt ad Fasnacht welle ga, aber nachdem mer e chlini Rundi dür d Menschemengi gmacht hi si wir de schlussendlech inere nüi coole, stylische Bar glandet. So chas ga! ;-)

MPC GV

Am Fritig isch es umi mau sowit gsi. Die alljährlechi GV vom MINI-Club het stattgfunde. Dismau im Restaurant Bären ds Niederbipp. Am 18.00 het sech de Vorstand troffe um no einigi Details ds bespräche, am 19.00 isch es de losgange mit de GV. Ds meiste isch reini Formsach gsi wo haut o muess erlediget wärde. Dementsprächend schnäu isch die ganzi Sach über d Bühni gange. De ganz Vorstand isch wiedergwäut worde, das hisst de Spaci isch witerhin Präsi, de Guido Vize-Präsi, de Sven üse Aktuar, de winti de Adventure-Eventmanager, de Mike kümmeret sech witerhin ums Forum u Marketing, mini Wenigkit blibt Kassier u de Denny mi Revisor. Merci vöumau a däre Stöu!!! =)
Dezwüsche hi wir de mau gässe u dernah isch es de spannend worde: Es isch um ds Höck-Lokal gange. Ob wir witerhin üs jede Monet in Mühlau wi träffe, oder ob de Bären in Niederbipp üse nüe Treffpunkt wird. Mitere grosse Mehrheit isch Niederbipp agnoh worde. Das hisst ab nächscht Monet wird de Höck det stattfinde. U das isch ja scho zümlech baud, nämlech am Fritig, de 13. (!) März. Nachdem mer no paar Details für ds United besproche hi, si wir de zum gmüetleche Teil vom Abe cho, mitem übliche Klatsch und Tratsch. I freue mi ufenes witeres Jahr mitem MPC mit hoffentlech vöu schöne Moment u unfallfreie Events.

Tina - Simply the best!

Letscht Suntig isch ds Tina Turner Konzert ufem Programm gstane. Aber zersch mau vor agfange... nachem Mittag büni de mau gmüetlech losgfahre richtig Aargau. Spontan hani no mitem Teri abgmacht für nach Muri zäme is ga ds triche. Isch super gmüetlech gsi! Dernah si wir de no schnäu zäme zum Reni, dem hi wir doch de neu pepper-white Cooper vom Teri müesse ga präsentiere! ;-) Aschliessend si de Reni u ig no is Molino ganze Pizza ässe bevor mer de richtig Hallenstadion gfahre si.


Konzertbeginn isch offiziell 20.00 gsi, 20.13 isch es losgange. Nid öppe mitere Vorgruppe oder so, nei nei nei! D Tina Turner het grad direkt losgleit: "Steamy window". Us luftiger Höhi chunt sie ufere chlini Plattform vo obe ache. Obowhl es füres Konzert ungwöhnlech nur Sitzplätz ghäbe het, isch sofort e super Stimmig gsi. Die grande Dame het Lüt i ires Bann zoge.

Was fougt übertrifft mini Erwartige bi witem. Vore 69-jährige Dame heti niemaus sone riese Show erwartet. De Reni het glubi über 15 Kostümwächsle zöut, d Miniröck zum Teil so churz dass grad mau ds nötigste abdeckt wird, d Bühni wandlet sech mehrmaus, es het akrobatischi Tanzilage, Showeffekte, Fürwerk, ifach ds ganze Programm!

und natürlech reiht sech Megahit an Megahit. Allei scho ires Powerstimm isch bewundernswärt, das tönt live no vöu besser aus uf de CDs. Vielfach isch es ja grad umgekehrt.

"The Best" (Video), "River deep mountain high", "What you get is what you see"...

Züschedür suecht si ging umi de Kontakt zu de Lüt u foderet zum mitmache uf.


"I can't stand the rain", "Private Dancer", und churz vor de Pouse "We don't need another hero", da chunt sie wieder ufere anderi Plattform schwebend hinder füre, miteme pompöse Kostüm und kleopatraähnleche Perücke. Zum Schluss vom Song e riese Knall wo d Pouse akündet.

30 Minute später gits witer.

zum Bond-Knüller "Goldeneye" (Video) toucht sie usem bekannte Bond-Aug uf und d Bühni wandlet sech zure riesige Treppe wo sie elegant abelouft, wie ging mit atemberoubende Absätz bi de Stögelischueh.

"What's love got to do with it", "Better be good to me" si witeri Hits wo folge, insgesamt git d Show zirka 3 Stund.

Wo zum Schluss no de Oldie "Proud Mary" (Video) chunt, isch ds Publikum scho längst totau usem Hüüsi, uf de Plätz hocke nur no die wenigste.

D Zuegab isch meh aus nume es churzes Comeback, es fouge nomau 3 Songs...

...drunter o "Nuthbush City Limits" (Video), da git sie nomau vollgas. Us de Bühni wird uf ds mau e grosse Arm wo sie druf übers Publikum schwebt. Ungloublech, die Energie wo d Tina immer no het. Uf ds mau springt und tanzt sie no uf dem Arm hindere u füre, de Reni u i hi langsam chli angst um sie, we das nume guet chunt! ;-))

Am Schluss si alli eifach begeisteret vo somene Konzert wo i persönlech niemaus vo ire erwartet hetti. O weni süsch eigentlech eher anderi Musig lose: Tina live - Simply the best!

Umi mau im BB gsi

Gester Abe hani sit langem umi mau d Chantal gseh. Zäme mit de Natalie, am Michael u am Päscu si wir ds Murte is BB gange. Bimene Drink hets so einiges a Neuigkeite ds verzelle gä. Später hi wir de no de Abe bir Chantal dehei la usklinge.

Roadstop

Eigentlech hetti ds Möni u ig letscht Suntig mit paarne zäme ufe Schalleberg welle ga, aber ds Wätter het üs wieder mau e gröbere Strich dür d Rächnig gmacht. Bi so viel Schnee hi mer die Idee ganz schnäu umi chöne vergässe, mi MINI het nämlech am Morge usgseh aus ob er es nüüs Spoilerkit becho hetti!


de neu Heckflügel gseht aber no extrem aerodynamisch us, oder?! ;-))

Uf jede Fau hi wir üs de müesse umentscheide. Treffpunkt 13.00 Grauholz hi wir fangs mau so lah stah wie abgmacht. Nachdem mer det zersch mau es Kafi gno hi, hi wir üs de entschide umi mau is guete aute Roadstop nach Lohn ds ga.

Aso nix wie ab id MINIs und losfahre richtig Roadstop. Sogar uf de Autobahn si d Strasseverhältnis zu dem Zytpunkt grad chli kritisch gsi, aber das het üs o nüm chöne ufhaute!

Am Ziel acho, hi wir de üser MINIs grad mau stinkfrech mitz vor d Hütte gstöut, det wo am Summer eigentlech aube d Garteterrasse isch. So hi wir emu vom Resti us jederzyt e tolle Usblick ghäbe! ;-)

Hie die ganzi Truppe am betrachte vo üsne Renner.
Dine hi wirs üs de lah guet ga bimene Zmittag.


Spaci, Winti, Smu ud Manu...

....u natürlech no s Möni u de Thomas (de het offesichtlech nid so freud am Foto ghäbe! ;-))

wie ging we wir zäme si vergit d Zyt wie im Flug, schliesslech hets ja nach däre lengi Winterpouse o rächt viel ds verzelle gä! ;-)

Irgendwenn hi wir üs doch de entschide, umi mau voruse ds ga, aber hei hi wir irgendwie glich no nid möge. Nur de Smu ud Manu hi sech fangs verabschiedet. De Räscht isch de no witerzoge nach Langnau, immerhin müesse mer doch no irgendwo es Dessert ga ässe, oder?!

Ds Langnau hi wir de grad ds Parkhus in Beschlag gno.

Det isch de o no d Chiara zu üs gstosse, d Tochter vom Möni. Die isch würklech super härzig u scho e totale MINI-Freak!

Winti, Tömu, Chiara, Möni u Spaci

Wieder zrugg im Parkhus hi wir öppe no 10 Minute mit üsne MINIs gspielt... wie das git? Eine nachem andere tuet sis Auto mit de Fernbedienig uf und wieder zue, und klaar, das blinket jedes mau. Am Schluss isch es de e richtegi Blinkshow gsi u nid nur d Chiara het e riese Freud dra ghäbe, typisch MINI-Fahrer äbe! Irgendwie nid ganz au Tasse im Schrank (ohni öpper demit welle ds beleidige! *lach*), aber genau das isch es wo ja so Fun macht! ;-)) Als Abschluss si mer de no ga teste wievöu ds Möni ires MINI no cha tieferlege ohni undeuf adscho bi ires Tiefgarageifahrt. Fazit: Spaci chunt no grad knapp drüber, winti u ig chäme am Bode an....

Lüt, ums churz ds mache: Es isch eifach umi mau e Hammer-Tag gsi mit euch!!!!!

Management-Game

Vom Donschtig, 5. bis Samschtig , 7. Februar hi wir vor Schuel us ufem Appenberg es Management-Game ghäbe. Donschtig Morge am 08.00 hi wir müesse vor Ort si. Appenberg hani vorher no nie kört, nid mau ds Navi het de Ort kennt... isch ja eigentlech o nur ds Hotel wo so hisst. Aso.. Hotel isch ds falsche Wort, das si alles verschiedeni auti Hüüser wo sie det wieder ufbout hi, u i dene verschiedene Hüüser hets äbe de vieli Zimmer für Seminar, diversi Sääl zum Ässe u e grossi Anzau Hotelzimmer. Vo all dem hi wir aber zersch nid vöu mitbecho. Wir si ja schliesslech nid zum Plousch det, sondern simuliere 9 Jahr Gschäftstätigkeit. Es het 5 Gruppe gä wo alli i verschiedene Länder tätig si gsi. Jedes Land het anderi Vorussetzige ghäbe, ganz wie ir Realität. Ds Ziel isch es gsi, dass wir als Führig vo dem Unternehme mit de richtege Strategie und Expansion so erfolgrich si, dass wir am Schluss vo dene 9 Jahr die grössti Steigerig vom Aktiekurs hi. Das ganze isch es Programm gsi wo jedes Land ufeme Laptop im eigete Gruppezimmer ghäbe het.


I bi bir Gruppe Frankrich iteilt worde.


äbefaus zu de Franzose het d Sandra kört wo mit mir ir Klass isch.


de Reto, äbefaus ir gliche Klass wie ig....


d Géraldine vore anderi Klass...



...u no de vo üs zum "CEO" erkorene Benno vor Paralellklass.

Nach jedem "Jahr" si de wieder alli zäme cho u de Dozent het üs d Resultat vo üsere Tätigkeit ahand vo verschiedene Charts und Zahle präsentiert. Alles het me müesse beachte: Personal, Produktion, Chöste, Lager, Prisentwicklig, Werbig, etc., wie bimene richtige Unternehme haut. Zwüschedür het me no müesse e Roadshow organisiere, e Pressebricht erfasse und e Präsentation vorbereite. Das Ganze isch nacheme strikte Zytplan gange wo bewusst knapp gsi isch, d Zyt isch uf jede Fau verbi gange wie im Flug. Üsi Gruppe isch vo Afang an rächt guet gstartet u die erste 3 Jahr si wir sogar ar Spitze gsi, dernah hi üs aber die Dütsche no überholt u am Schluss hets füre guet 2. Rang glängt. 2 Länder sie uf de Strecke blibe u hi Konkurs gmacht.

Aber o fürs ganze drum u dra isch gsorget gsi. Jede Tag hi wir verschiedeni Menus zur Uwahl ghäbe, immer mit Vorspeis, Houptgang und Dessert. Am erste Abe hi wir ire Art Grottehöli wo o zum Hotelkomplex kört es Fondue gässe, am zweite Abe simer ufene Fackelwanderig gange wos uf halber Strecki Zopf und Glühwyy gä het. Das ganze isch auso rächt abwächsligsrich gsi und wir hi viel u guet gässe. Ds einzige Manko: Nachem Abeesse isch nüd los gsi det u e Bar hets leider o keni ghäbe ir Nöchi... Nur de "Bäregrabe", das isch e usboute Keller wo Self-Service isch. Aso hi wir üs det haut bedient u de Abe mit Poker oder andern Chartespiel verbracht. Allzu lang hi wir ja eh nid chöne mache, am nächste Tag isch scho immer früh wieder Programm gsi! Uf jede Fau isch es es interessants Seminar gsi!

Hie no paar Böuder wie das ufem Appenberg so usgseht:

Fondue-Abe

Am 31. Januar (ja, i wiss, isch scho chli lenger här! ;-)) hani endlech am reni si Wunsch erfüllt. Er het scho lang mau es Chrüterfondue, aso es Fondue Marseillese, welle usprobiere. Zäme mitem Spaci, Pinki u Demi hi wir de e gmüetliche Abe bi üs dehei verbracht. Mit Fondue ässe, mitem ferngstürete MINI umekurve, de neust Klatsch und Tratsch verzelle... es isch üs emu nid lengwilig worde! ;-)