Das feht ja scho guet an...

De Mentig hetti besser nid chöne afah....

Am Morge bü ni eh scho ging knapp dran, aber dismau het ifach grad gar nüd welle klappe. D Hustüür chlemmt... Die wo letscht Summer in Holland gsi si wärde jetz lache... det hani mi igschlosse u bü nüme usecho, dismau isch es umgekehrt: I cha d Hustüür nüme abschliesse wü ds Schloss nid funktioniert. Na bravo... hartnäckig wie ni bü gibi ersch nach über 5 Minute u nachdem i alli Husschlüssle usprobiert han uf. Ufem Arbitswäg hets nüerdings no e Buustöu mit Ample, det stah ni natürlech o no an.... U wüs grad so schön is Schema passt stümmt am Abe d Kasse nid. Bis am viertu vor sächsi sueche mer d Differenz. Die isch nid ganz ifach ds gfüne, wü sie sich us mehrere chline Sache zämmesetzt womer de Tag dür so gmacht hi. Nachdem mer beid Kassene, de Tresor ude Bancomat alles kontrolliert hi, chunts de zum Glück füre! Das änderet aber nüd meh ar Tatsach dass i ersch am 18.15 dehei achume. Usgrächnet Hüt! Wo doch ab de 18.00 mini Firmgotte mit ires Familie zu üs chunt cho ds Nacht ässe!

Het mi emu gfreut, sie umi mau ds gseh! Mi his gmüetlech u lustig ghäbe mitenand!

Grad aschliessend chunt no e Bekannti verbi wo momentan ds KV macht u gfragt het obi bimene Bewärbigsbrief chönt häufe. Am 21.30 chumi de schlussendlech no dezue, under d Dusche ds stah! ;-)

Sunntigsfahrer

Suntigsfahrer müesse nid ging Schliicher si.... es chi o zwe rasanti MINIs si! *lach*

Bi däm super Wätter ziehts ihm eifach use u de MINI sehnt sich förmelch nach Kurve. Zäme mit mim Cousin, em Pascal, u sire Familie hets üs richtig Thun verschlage.

Ds gemeine isch ifach dass är uf Summerpneus cha umekurve u i mit de Winterpneus hindernah düse, aber Spass macht es allemal!

Hie üser zwü Bijous in Thun:





Sogar füre Alain hi mer no öppis entdeckt! Nume no liecht tarnet fahre in Thun bereits die erste Exemplar vom brandnüe Subaru Impreza WRX STi ume! Dass die ihnes Erlkönige so gross mit "STI" tüe aschribe dass es de o ja jede merkt erstunt mi zwar scho, aber me cha di typischi Subaru Form doch zwifelslos erkenne, oder?! *grins*

Generauversammlig vom MPC

Am Fritig isch es sowit gsi. Die jährlechi GV vom MPC!

Zu dem Zwäck träffe mir üs scho am 19.00 bim Restaurant Schoren in Mühlau.

Ufem Wäg det häre gits aber no paar Zwüschestopps.

Zersch in Flamatt wo de Tüfu no chli Benzin brucht u gwäsche würd.

Denn in Deitingen, wo de Spacefiller scho uf mi wartet

u zu Gueter letzt in Aarau West, wo sich de Roger alias "Fresse schrääg", ds pinki, de Pämsu, de Raymond, de Boardripper Marc u de Microcar bi üsem Konvoi tüe aschliesse.

Leider hets uf de Strecki Bärn - Zürich wie üblich umi mau Stou ghäbe, wü di guete Lüt anschinend ifach nid wüsse wo sech bi ihnes Auto ds Gaspedal befindet u dass es ir CH es Rächtsfahrgebot git... naja... het ja schlussendlech glich no glängt!

De Fototermin hingäge isch chli is Wasser kit. Schad isch scho dunku gsi, het nämlech sicher guet usgseh, so vöu MINIs ufem Platz!

D GV an und für sich isch dises Jahr meh oder weniger reini Formsach gsi. Alles isch ohni Problem dedürgwunke cho. Sogar i darf mi Poste aus Kassier bhaute! ;-)
Danke!!!! Mache das gär u freue mi, e Töu vom MPC chöne ds si, u das ersch no im Vorstand!

Dass sich de Kassier u de Event Manager id Haar grate hauti für es Grücht *pfeiff*

Haha, zum Glück isch das Foto ja nume gstellt! ;-)


Isch a gmüetlicha Abe gsi!

De West-Coast Konvoi bestehend us mier, de pinki, em Spacefiller u im Boardripper het sech de irgendinisch nach Mitternacht o umi ufe Heiwäg gmacht.

Let's MPC!

D Wucha im Schnäudurchlouf

Mentig: Disi Wucha büni in Courtepin statt in Murte.... ha sogar uf Anhieb de richtig Wäg gfune! ;-)

Dsischtig: Irgendwie büni nid so fit.... d Grippe macht sech bemerkbar

Mittwuch: Wärum muessi ging denn MINIs uf de Strass chrüze weni mitem Smart underwägs bü?? *aufreg* Hüt sis sage und schreibe 5 Stück gsi, devo sogar e Clubby!!!! Zwe MINIs si ufem Parkplatz vor de Bank gstane. Zum Glück isch de Smart o mit MPC-Flyere versorgt, so hani ömu glich chli chöne Wärbig mache... ob öppis zrugg chunt? Ha sie ja im französische Teil vo Friburg entdeckt! Villicht hi sie ja glich öppis verstane! *lach*

Donschtig: Hüt Nami hani fri! Normalerwis wer ja Schu, aber disi Wuche isch Ferie. So chani mi no chli gsund pflege dass i fit bü für moor! Am Abe gani no chli uf Friburg ga shoppe.

Vorstandssitzig

Am 11.30 himer in Mühlau d Vorstandssitzig vom MPC. Wo de Spaci u i iträffe si die andere scho det. Bimene ds Mittag tüe mer de Kassaabschluss u anderi aktuelli Sache bespräche.

alli schön i ire Reihe: d MINIs vom Guido, Mike, Denny, Winti, Sven, Spaci u last but not least mine! *grins*

Da ds Wätter in Mühlau nid grad so de Hammer isch, mache mer üs uf d Suechi nacheme sunnige Plätzli womer üser lang fällige Vorstandsfotos chi mache

me achti sich uf das charmante Lächle vom Winti! ;-)

Zum Schluss fülle mer vorem Svens nüe Wohnig grad mau de Parkplatz mit MINIs u gnähmige üs bi ihm as feins Dessert.

U scho isch es umi Zyt d Heireis adsträte, moor isch schliesslech Mentig!

PS: D Vorstandsfotos folge, versproche! ;-)

Fasnacht in Luzern

Am Abe hani mitum Spaci abgmacht. Mi gönge i Chino ga "National Treasure" mitem Nicolas Cage ga gugge. Eigentlech wer d Cindy o mitcho, het aber leider müesse absäge.

Dernah gömer no chli d Stadt Luzern ga unsicher mache. Schliesslech isch doch dises weekend det no Fasnacht. Nächscht Jahr müesse mer det unbedingt verchlidet debi si! =)

Ah ja... sogar für ds Tami himer no öppis entdeckt inere Sitegasse:

Barstreet zum Dritte

Zum letschte Mau für dises Jahr isch dises Wuchenänd nomau ds Barstreet in Bern. Für am Fritig Abe hani vor Chantal 2 Gratisitritte becho. Zäme mitum Michu gö mer mau ga gugge was det so luft. Leider isch nid so vöu los, drum mache mer nid soooo lang....