Februar-Höck

Höck Nr. 2 vom 2010, de erst vom Jahr in Niederbipp u de letscht vor de GV.

Am 18.00 hi sech de Rotsch, de Pascal u ig troffe zum zäme häredsfahre.

Im Rotsch si Chocolate-Clubby isch scho parat gstane woni bim Pascal acho bü.

Über d Hauptstrasse si wir richtig Lyss gfahre wo bereits s Pinki u de Yves uf üs gwartet hi. Via Büren an der Aare gits nach Niederbipp.

Det si diesmau weniger Lüt gsi aus o scho. Zum Teil sig schins i töune Regione ds Wätter ud Strasse zimlech schlächt gsi. Verständlech, dass me da lieber dehei blibt. Dennoch isch es umi a gmüetlicha Höck gsi. De Dome het sini neuste Kreatione für d Standliechter vom 56er präsentiert, ds Ässe isch wie ging fein gsi, die Anwesende guet glunt ud Zyt isch im Eiltempo verbi gange.

d Heifahrt isch uf jede Fau frostiger gsi aus d Stimmig am Höck! ;-)

Ds Flamatt bir Autobahnusfahrt sis no -11°C gsi, de isch es im 10-Sekunde-Takt es haubs Grad abe gange bis am Schluss...

sagehafti -15.5°C!!! Wo blibt d Kimaerwärmig we me sie cha bruche??? Ha mer ja scho fasch müesse Sorge mache dass s Benzin igfiert! ;-)

Aber de Tüüfu isch tapfer u näheret sech ganz näbebi langsam aber sicher am grosse Jubiläum, d Schallmuur vo 100'000 km isch in grifbarer Nähi.

17.00 in Courtepin

Courtepin - det woni schaffe - isch mengisch scho chli speziell....

Es bsunders Phänomen isch d Kirche. Es isch Punkt 17.00, d Glogge lüte genau 5x wie sechs ghört. Aber e Blick vor Bank us uf d Uhr u me stunt nid schlächt.

Itz hets doch grad füfi gschlage... die eint Uhr zeigt aber 17.05, u die uf de anderi Site scho fasch 17.10 an.... was stümmt jetz???

Ds Beste dra isch: Das isch eigentlech ständig so bi der Kircheuhr. Die het glubi i däre Zyt woni jetz det schaffe no nie richtig funktioniert. Zum Teil het sie sogar komplett falschi Zyte azigt. Da isch es o scho vorcho, dass e Chund am 11.30 total usser Atem id Bank ds springe cho isch wü d Uhr bereits 11.59 azeigt het u er gmint het dass mer itz de grad zue tüe. ;-)

Aber irgendwie passts zu Courtepin: Chli anders als anderswo u scho gar nid perfekt, aber ufene Art sympathisch.

Vorstandssitzig

Gester Abe, Vorstandssitzig vom MPC. Eigentlech isch planet gsi, dass mer i guet alt Schore ds Mühlau gönge, det wo wir vorher aube de Höck ghäbe hi. De het allerdings nid offe gha, aso hi wir e Alternative gsuecht.

Die isch gsi ds Restaurant Reussbrücke, "s ewige Liechtli" in Wert-Rottenschwil. De Ort isch so chli wie de Name leng isch... Elswil schint e Grossstadt degäge ds si! ;-) Uf jede Fau hi wirs alli gfune, trotz zum Teil rächt abentürleche Strasse. Zytewis het me sech fasch blind ufs Navi müesse vertroue wü me nüm rächt gseh het wo d Strass eigentlech wer. ;-)

Schlussendlech isch es aber de e rächt gmüeltiche Abe imene herzige Restaurant worde. Ds Ässe isch glubi bi aune guet acho.

Mit debi o zwe potentielli neui Vorstandsmitglieder. Ja genau, es wird es paar Änderige gä im Vorstand. Aber meh wird momentan no nid verrate, d Iladig für d GV wird ja scho baud verschickt u de wird meh as Tagesliecht cho. ;-)

Uf jede Fau si wir alli voller Elan! Uf witeri cooli u schöni Moment mitem MPC! Es isch ifach geil mit euch! ;-)

Ingrids Geburtstag

Am 23. Januar het d Ingrid ires 50. Geburtstag gfieret. D Ingrid isch Niederlassigdirektorin ide Filiale Kerzers wo o d Chantal schaffet.

Zum das fiere, het sie e ganzi Mannschaft nach Thun iglade. Zäme mit de Chantal, de Carmen u am Phippu si wir de gäges Bärner Oberland gfahre.

Nene, normalerwis bruche wir kener Stöck zum Lufe. D Ingrid het sech statt Gschenk Darbietige gwünscht. Drum hi wir Sketche vorbereitet wo mer äbe unter Anderem o die Stöck brucht hi.

Zersch hets aber no i 3 Gruppe ds Fuess e 90-minütige Stadtrundgang mit Führig gä. Det het me üs die wichtigste Gebüde vor Stadt u d Gschichte dezue ufzigt. Leider isch es rächt chaut gsi, aber isch glich interessant gsi, die verschidene Anekdote zu de einzelne Gebüde ds ghöre.

Nachem Stadtrundgang isch es de zum gmüetliche Teil vom Abe gange. Im Hotel zum Freisinn si wir imene schön dekorierte Saal gsi.

Für d Vorspiis us Dessert hets es wunderbars Buffet gä, de Houptgang isch serviert worde. Ds Ässe isch natürlech i somene ghobene Hotel ersti Klass gsi.

Zwüsche de einzlne Gäng hets ging umi Uflockerige gä. So isch zum Bispöu e Musiker cho oder e Zauberer het üs siner beste Tricks vorgführt.

Am Schluss hi de Chantal u ig nomau üse Tanz us Dirty-Dancing vorgführt zäme miteme Remix womer no e chlini Hip-Hop-Choreo dezue ufgstöut hi.

Isch ganz a schöna Abe gsi! Aus Guete für die nächschte 50 Jahr, Ingrid! :-)

Sihlcity

Letscht Samschtig büni mau im Sihlcity gsi. Det hani ja scho lang mau häre welle. I muess säge, i bü nid enttüscht worde. We ds Westside nid grad bi mir ume Egge wer... i gibes ja zue: Sihlcity gfaut mer fasch echli besser! Vorallem ds Vapiano-Resti hets mer ataa! ;-)

Januar-Höck

8. Januar. De Winter het üs definitiv erreicht. Schnee wohin das Auge blickt. Es isch de zweit Fritig im Monet, das hisst MPC Höck-Zyt! Wü üsi Stammbeiz in Niederbipp no Betriebsferie het, hi wir üse Höck für einisch amene andere Ort ghäbe. Treffpunkt isch ds Restaurant Horner in Hendschiken gsi.

De Denny isch mit sim brandneue MINI cho: De limitiert World Championschip 50! So vöu i wiss isch er de erst ide Schwiz, wo mit so eim umefahrt. Cool!

...aber natürlech si o die andere MINIs nid ds verachte! ;-)

So gäg Mitternacht hi sech die meiste de wieder ufe Rückwäg gmacht. Die letschte wo hei si: Ig, de Reni u de Chrigu. D Strasseverhäutnis si leider nid grad so toll gsi, aber uf jede Fau isch aus guet gange u de Tüüfu isch heil heicho, o we ner underwägs chli Schnee ufgsammlet het. ;-)

Silvester

Am Silvester hi wieder es paar zäme bim Mike u de Dominique gfieret. Hie paar Impressione devo.

Danke a die beide fürs Organisiere u das feine Ässe!