Sunntig

Hüt het de Sunntig sim Name alli Ehr gmacht, u das bi Früehlingshafte Temperature. Ds Mittag himer churzerhand dusse gässe. Dernah büni schnäu uf Bösingen ad Honda-Usstellig wü d Chantal o det isch gsi. All zu lang hani aber nid gmacht, da de Michu no gsit het är chäm verbi. Mi si de anschliessend uf Aarberg gfahre womer bimene Strassecafé chli de Lüt zuegugget hi. U wär gseh ni da uf inisch verbilufe? D Chantal mitem Fründ! Churz speter stösst de no d Silvie zu üs. Ds Füft himer de jedes Auto wo a üs verbi gfahre isch kritisch beguetachtet u debi d Sunne i volle Züg gnosse.

Alpamare

Am Samschtig um 15.00 hi sech de Winti, ds speedy, de slapp, ds Nicci u i üs bim Alpamare troffe. Nachere chlineri Usenandersetzig miteme Ford Escort bir Chrüzig inkl. Hupkonzert u wildi Handgeste büni de als Zweite ufem Parkplatz itroffe. Ds Nicci het mer fründlicherwis es Plätzli reserviert! ;-)


Churz speter trifft de de Räscht vor Bande o no ii, und denn hets chöne losgah. I bitte um Verständnis dassi d Kamera nid mit uf d Bahne gnoh ha, drum git kiner Fotos! *lach*

Nach 4 Stund Wellebad, Rutschbahne und Jod-Bad simer zwar K.O., aber zum Usruhe isch ke Zyt. Grad aschliessend himer in Rapperswil bimene Italiener reserviert wo no de Reni u de Hans zu üs stosse. Isch ganz e gmüetliche Abe worde mitem übliche Klatsch und Tratsch! ;-)

Bir Heifahrt hani de no es chlis Jubiläum dörfe fiere:

ööööehm.... für die wos jetz nid erkenne: Km-Stand 70'000! ;-)

Wucherückblick

die zweitletscht Wuche in Murte. Am Mittwuch Morge hani no mau uf Friburg i Houptsitz müesse wäge de Witerböudig woni mache. Allgemeinwissenstest u es Gspräch mitem Personalchef. Wär wiss.... villicht klappts ja bim zweite Alouf ud Bank zaut mer öppis ade Schuelchöschte. Vom Chef in Murte wärdi uf jede Fau unterstützt! Am Nami hani de o scho wieder Schu. Am Donschtig Nami hani fri, Zyt, d Ufgabe ds mache, bi däm troumhafte Wätter natürlech gmüetlech ufem Baukon.
Am Fritig Abe gani mitem Kolleg uf Muntelier ga bowle u aschliessend no uf Murte is BB, woni jedes Mau jede Mengi bekannti Gsichter träffe. Isch ifach cool det!

Statt Dütschland ufe Jaunpass

Eigentlech weri letscht Weekend mitem Mike, Sven u Winti uf Dütschland gange, aber vom DO Nami an büni uf ds mau nüme würklech fit gsi. Am Fritig büni glich extra mitem MINI ga schaffe u ha ds ganze Gepäck für ds weekend im Kofferrum ghäbe, wer auso startklar gsi. Aber am 17.00 büni eifach nume no froh gsi dass endlech Fürabe isch u i hei cha. So hettis ke Sinn gmacht no so wit ds fahre. Schade, sehr schade! :-( Aber es anders mau wieder!

De Samschtig verbringi demit, mi chli ds kuriere u endlech d Ufgabe vor Schuel ds mache woni jetz 3 Wuche defür Zyt ghäbe hett. Aber so isch das haut: Ma schiebt ging aus bis zum letschte Moment use.

Am Suntig hani de aber definitiv gnue vo dehei ume hocke. Bü o scho wieder chli fitter, auso muess e Usfahrt mitem MINI häre. Zäme mitem Rotsch, Spaci u em Dome gömer wieder richtig Jaunpass.

d Kurve si zwar no die gliche wie letscht Wuche, aber es isch haut ifach cool, die Strecki!!! =)

Mis nüe Velo

Et voilà:

Woni das Bike in matt-schwarz gseh ha, hani mi entschlosse, dise Summer umi mau chli ga ds radle. ;-)

Prada

Nei, i bü nid bi Prada gsi ga shoppe, aber ha jetz glich Prada..... Yokohama Prada, um gnau ds si! ;-)

Gester Abe hani de MINI bir Garage Scheidegger häregstöut u hüt hani de mi Tüüfu mit de brandnüe Sumerreife chöne ga abhole!






de frii Nami u das schöne Wätter nützi, um de MINI umi mau intensiv ds pflege. Mitem Chnät vo Meguiras wärde Insekte- u Teerfläcke entfernt, denn aus schön mit Quick Wax u Quik Detailer uf hochglanz bracht. Dezue d Reife u alli Kunststoffteili gschwärzt u d Schibe putzt. Ds Ergäbnis cha sech la gseh. Fasch schad, das Auto umi ds bruche! ;-)

Jaunpass

Und wieder mau isch Suntig, u wieder mau träffe sech de Rotsch, de Pascal, i u de Spaci zumene chline Usfährtli. Da mer de Schalleberg mittlerwile fasch uswendig kenne, sueche mer nachere Alternative. Schlussendlech mint de Pascal, dass mers jetz mau chönti wage übere Jaunpass ds fahre, es setti ke Schnee meh ha uf de Strasse. Gesagt, getan! Via Ueberstorf, Schwarzeburg, Riggisberg, Stockenthal fahre mer zum Jaunpass. Ds Wätter isch herrlech, d Strasse troche u de Tüüfu git aus! Läck, das het mer doch scho lang gföut! De Jaunpass isch eifach gigantisch! Macht Spass wie ke Zweite! Obe acho, gönne wir üs a chlini Pouse im Restaurant.

De Tüüfu isch scho da....

de Rotsch bir Ankunft.

Spacemaschine: Anwesend!

Pascal: Anwesend!

Opel Blitz: Anwesend!

ööööh... Moment! Dä kört doch gar ned zu üs?! ;-)

die flotti Viererbandi ufem Jaunpass

u hie die dezueghörige Driver:

Vom Resti us himer stets diräkte Blick uf üser MINIs ghäbe. Köstlech, wie d Lüt stundend um üser Autos glüfe si. Egal ob Töfffahrer oder Sunntigsfahrer: Irgendwie hi hüt alli üser Racemaschine bewunderet.

bir Raststätte Gruyères mache mer nomau churz Haut für üs vom Rotsch ds verabschiede wo witer muess. Chum simer ufem Parkplatz, knipse o scho wieder d Kameras vo wildfremde Lüt. Bü mer de scho baud wie ne V.I.P. vorcho! ;-)

hmmm.... de Pascal hett jetz die wunderschöne glanzgedrehte 105er Fäuge! *sabber*

Tüüfu u Spacemaschine ufem Gästeparkplatz bim Pascal, de Simone u em Noah.

Nachdäm mer det bimene Kafi no chli diskutiert hit, isch es de uf ds mau scho 20.00 gsi, Zyt sich mau ds verabschiede. Isch super gsi hüt! Het mega Spass gmacht! Bis baud wieder!

Samschtigs-Programm

Nachem Mittag gö de Michu u i ds Schönenwerd i Fashion-Fish chli ga shoppe. Allerdings hets nid vöu Schlaus ghäbe. Wider zrugg, gniesse mer bi ihm dehei ds Bärn ir Altstadt es Kafi im Gärteli hinderusse. Nachem Znacht träffe wir üs umi u gönge sit langem wieder mau uf Murte is BB. So gäg die 23.30 lande mer de schliesslech no ds Tafers ar G.U.S.-Party, woni mit Madlen, Fabienne und Co. abgmacht han. Zuefälligerwis träffe mer det no d Sonja wo o mit üs id Bruefsschu cho isch. Die himer beid scho uh lang nüme gseh, da hets natürlech einiges ds rede gä! :-)

April-Höck

Fritig Nr. 2 des Monats.... Es isch Höck-Zyt! Schad nume, dass ds Wätter em Monet April alli Ehr macht. Es schiffet usnahmswis umi mau..... Am 17.05 hani mitem Rotsch ds Murte bim Parkplatz abgmacht. Wü aber am 16.56 tatsächlech no a Nüüchund d Bank betritt wo no dieses und jenes wott, längt mer das nid ganz. Hallo???? Fritig, 4 Minute bevor mer zue tüe chunt me doch nüme so öppis cho mache! I rege mi villicht uf!!!! Schlussendlech isch öppa 17.15 bis i ufem Parkplatz bü. Im Radio mäude sie scho überall Stau. Rotsch u i entscheide üs, in Schönbühl de Autobahn de Rügge ds chehre u versueche üsers Glück über d Houptstrasse. U tatsächlech: Pünktlech am 18.50 simer bim Treffpunkt Aarau West, wo no de Pämsu u de Raymond zu üs stosse. Zäme fahre mer de uf Mühlau bis zum Höck.

Eigentlech wer Fototermin gsi für ds MINI-Scene, aber bi däm Wätter gits ja himmutruregi Fotos! Egal, de Parkplatz gseht glich cool us: 27 MINIs! Nid ganz Rekord! Vor paar Mönet simer mau 28 Stück gsi! ;-)

Übrigens: Ds Copyright für die Fotos ligt bim winti, i ha kiner Fotos gmacht! ;-)

Isch a super-gmüteliche Abe gsi, mi his guet ghäbe, wie jedes Mau! Bir Heifahrt fahre i, ds pinki u de Microcar im Konvoi. So gäge die 03.00 büni umi dehei.

Freue mi schomi ufe Mai-Höck, denn hoffentlech mit besserem Wätter!

Krach Boom Bäng

Hüt hets bi üs de ganz Tag wie us Chüble gosse.... Ussert grad am 17.00 woni zur Bank use bü hets schüüch d Sunne möge dedür drücke. Churz speter hets de wieder gschiffet. Begleitet mit Blitz u Donner... Hallo?! Das Afangs April??? Isch doch nid soooo extrem warm gsi hüt... Hoffe mau das Wätter blibi nid bis i Summer iche so, wer ja schad! So wies usgseht würd o de Höck moor e zümlech nassi Aglägehit gä.... We will see! ;-)

Welcome to Berlin...

Per Easy Jet isch es am 05. April richtig Berlin-Schönefeld gange.

vo det us mitem Zug bis is Zentrum... Leider isch scho dunkel gsi, aber hie glich no paar Böuder vom Kurfürstendamm:


Am nächschte Morge ufem Wäg zum Bahnhof entdeckt:

Troum Classic Mini!!! *sabber*

Berlin Houptbahnhof
es riese Ding! Aber schön gmacht!

de Reichstag

de Platz devor isch chli grösser aus üse Bundesplatz...

ds Brandenburger-Tor ufem Platz des 18. März

Ds Holocaust-Mahnmal zum Gedenke a die ermodete Jude im 2. Weltchrieg

uf 19'073 m2 stöh 2711 Betonsteine, gseht idrücklech us!

de Potsdamer-Platz

die bekannte Ampelmännchen vo de Ost-Berliner Ample!

per S- und U-Bahn gits witer zu anderne Sehenswürdigkite...
Gendarmenmarkt
...mitem dütsche Dom

vordra probiert e Musiker ds spiele, würd aber vom Hund näbedra übertönt wo die ganz Zit brüellet wie am Spiess!

...während im Dom inne imene klassische Orchester bi de Probe cha zueglost wärde.
Checkpoint Charlie, a ehemalige Grenzposte zwüsche West- u Ost-Berlin

typisch Ostberlin: Trabbis

e Töu vor Berliner Muur wo d Grenze gsetzt het
undedrah isch ufeme Wäg die ganz Gschicht beschrübe. D Lüt wo det dedür glüfe si u gläse hi, si alli ganz stöu gsi, e bsunderi Atmosphäre!
zrugg vorem Reichstag, wo o ds Gebüde vom Dütsche Bundestag isch.

d Kupple ufem Reichstagsgebüde isch für jedermann zuegänglech.

de Spiegelturm ir Kupple inne.

zrugg in Ostberlin gömer ufe 368m hoch Fernsehturm ufe. Allerdings isch d Panoramaetage ir runde Kupple "nume" uf 203m obe, aber d Ussicht isch glich toll.

de Fernsehturm by night

ds Berliner Rathuus, o "Rotes Rathaus" gnannt.

de Alexanderplatz mit de Weltzytuhr u Blick ufe Fernsehturm
de Berliner Dom
das isch vorem Chrieg mau es Schloss gsi, guet ds erkenne oder?! ;-)
d Stadt het leider momentan ds wenig Gäud füre Wiederufbou, drum gsehts jetz eher trist us! ;-)

d Nikolaikriche im Nikolaieviertel.

d East-Side-Gallery, ds längste Mahnmal füre Friede. D Berliner Muur im Ostteil voll besprayt mit Botschafte.



d Unterschied zwüsche Ost u West si zum Töu zümlech krass u sehr guet ersichtlech. Klar, mitterwile gits im Ostteil o vöu Neubaute, aber bi ältere Sache gseht mes sehr guet, wie zum Bispöu bi däm triste Bahnhof:

per Zug gits witer zu de Häckische Höfe


d Siegessäule

o a däre gseht me wie a vöune andere Gebäude no Schusslöcher vom Chrieg här

285 Stufe witerobe isch me grad under de Figur u het a schöni Ussicht

....zum Bispöu ufene Classic MINI wo vomene 53er MINI verfolgt würd! ;-)

d Kaiser-Willhelm-Gedächtnis-Kirche wo bis ufene Töu vom Turm o total zerstört worde isch
die Täg in Berlin si wie im Flug vergange. Am 08. April gäge Mittag si mer de wieder zrugg bim Flughafe-Schönefeld gsi u hi de Rückflug nach Genf aträte.

Het mer super gfalle in Berlin, git sehr vöu ds gseh!