Sonntag, 29. Juni 2008

Jura-Usfahrt

Hüt isch es sowit gsi. Ds erste Mau gani uf Entdeckigsreis düre Jura. Spaci u i hi das ir Nacht vo Fritig uf Samschtig am Morge am drü so entschide! ;-)

Jura-Ausfahrt - the first, starring:

ääääh... dä komisch Kauz kenne mer nid....
d Sandra mitem GP

de Pascal

Rotsch

Raphi (orange MINI!!! Hup Oranje! ;-))

Chrigu
u wü de Spaci die Fotos gmacht het, het er kes vo sech säuber... stellverträtend für ihn hie es Archivbild:

;-)))


...und los gits!

Am 10.00 hi wir üs bim Flugplatz ds Grenche troffe u scho mau es ersts Pöuseli gmacht!



churz druf fahre mer übere Wissestei




u aschliessend witer quer düre Jura: Moutier, Reconvillier, Tavannes, Saignelégier, Montfauçon,...



In Soubey ässe mer öppis chlises. D Sunne brennt gnadelos uf d Terrasse, aber troumhaft, das Wätter!!!

Womer det umi wi witerfahre hautet üs de Nachbar vom Resti uf. Är hig o sone MINI, aber no de aut. Ob mer dä schnäu welli gseh. Ja klar, was füre Frag! =)
U das isch er:

stöni leider nume ume u wer ds verchufe... ;-)

Es paar Kurve witer, u mi nähme bi Les Rangiers no es Dessert.....

u de git de d Reis witer via Bassecourt, Belleley richtig Biel wo mer üs de vonand tüe verabschiede. Hammer Strecki det! Voller Schluchte und Tunnel wo me so richtig cha sounde! Me het nume no Kompressor-Pfiffe kört i däre Gägend! =)

Underwägs für hei hani de no das Prachtsexemplar vor mer:
Aston Martin Vantage V8, eifach wow!!!!!!

Isch a super schöne Tag gsi, u o we d Strasse nid ging so super si gsi, i has so richtig gnosse!

Donnerstag, 26. Juni 2008

MINI-Shots

nüi Böuder vom Tüüfu!








De Summer isch da!

Endlech, endlech, endlech!!! De Summer isch da! O Klein-Smartie hets gmerkt, u zigt voller Stolz an, dass es dusse 33°C isch! =)

Fotoautomat

Zwüsche Düdingen u Flamatt hets e uf de Autobahn A12 e nüe Fotoautomat gä wo unerwünschti Böudli schiesst... u vorallem sölle die Fotos schins no rächt tüür si.... :-(


Isch übrigens bi beidne Fahrtrichtige sone Blitzer installier worde. U ds gemeine: Vo beid Site här hets es Gfäll, das hisst, da isch me no baud mau chli ds schnäu underwägs, o we mes gar nid wott.... Abzocke nenni das!!!

Sonntag, 22. Juni 2008

Holland - Russland

Viertelfinal. Holland trifft uf Russland. Ha scho zum Vorherein deicht, dass das brisant chönti wärde. Beid Mannschafte hi ja bishär extrem guet gspöut. Trotzdäm hani doch ganz fest miteme Sieg vo de Oranjes grächnet. Wie mer ja alli wüsse, hets leider nid sölle si. D Chantal, d Silvie u i hi üs aber wäge däm die gueti Lune nid la verderbe. Nachdäm mer ds Bärn ufem Wiesehusplatz ide Fanzone de Match gugget hi, simer no chli witerzoge u hi üs bire EM-Bar vor de Räblus.


PS: We der mi vo letscht chli vöu mitem orange MINI-Shirt gseh hit: Ke Angst, das isch regumässig gwäsche worde, has haut immer grad wieder agleit we d Oranjes gspöut hi! ;-))

Moléson

Am Samschtig simer bi däm troumhafte Wätter ufe Moléson gange. Hie paar Böuder devo:





Ganz toll hani ja die genaue Agabe uf de Schilder gfune.....

"andere Richtungen"... aha... u wo genau isch das?!

Umi dune im Tal acho, entdecki no öppis ganz geils:


e zwäggmachte Opel Speedster. Dä basiert ja uf de Lotus Elise... u das gseht me! Eifach geil, ds Auto!!!!

SLR vs. Cooper S Cabrio

Fritig Abe in Murte, endlech Fürabe. Nume no zrugg zum Auto lufe u ds weekend cha afah.... doch momänt... was isch das wo det parkiert isch? Tatsächlich! A Mercedes SLR, wahnsinnig tüür u extrem säute... ...aber weni ehrlech darf si: A Mercedes isch für Lengwiler u mier persönlech würd ja ds Cooper S Cabrio näbedran mindestens grad so guet gfalle... U mit de Prisdifferenz chame es paar mau ga tanke für über schöni Päss ds hize, u das ersch no mit offenem Dach... I würd säge 1:0 füre MINI! ;-)

BCF Karting

Am Mittwuch nach de Schu büni grad diräkt uf Muntelier gfahre. De alljährlich Kart-Event vor Friburger Kantonalbank isch ufem Programm. Am 21.00 startet üsi Gruppe mitem 10-Minütige Warm-up. Später fahre mer nomau ide gliche Gruppe 10 Minute Qualifikation. Insgesamt sie dismau 4 Gruppe am Start. Früener sis aube no meh gsi! Dernah wärde alli Zyte vergliche u nüi Gruppe bildet. Mit de zweitbesti Zyt vom gsamte Fäld chani bi de "schnäuschti" Gruppe als 2. Starte. Tönt guet, de Sieg möglich! ;-)
Denn aber bim Start d Misere: Zersch verpasst dä uf de Pole de Start u wes de endlech losgit stöut bi mim Kart eifach de Motor ab u i blibe uf mim Startplatz stah.... Bravo! Jetz muess i warte bis au wäg si u mier ine vom Personal umi de Kart startet. D Ufholjagt begint.... De Sieg chani natürlech jetz vergässe, aber am Schluss het immerhin no de 7. Platz usegugget. Heja, i fahre ja eh lieber MINI! ;-)

Allerdings chani die Kartbahn in Muntelier nume empfähle! Isch ds erste Mau wo bi mier öppis nid klappet het. Süsch isch es a tiptopi Strecki mit gnauer Zytmässig und Rangliste etc. Hie de Link: http://www.expodrom.ch/frameset.php?Flash=1

Die letschte Gruppespiel

Hie nomau paar Idrück vom Oranje Dorp in Neuenegg wo ni am Dsischtig bü ga de Match gugge:




Sonntag, 15. Juni 2008

MPC-Jubiläumsweekend in Sedrun

De MPC fieret dieses Jahr sis 5 jährige Bestehe, ganz klar: Das git es Fest! Drum himer für am Juni statt e normale Höck es Jubiläumsweekend in Sedrun (GR) organisiert. Am Fritig, de 13. notabene, nachem Mittag büni losgfahre. Zäme mitem Dome u em pinki simer de bis uf Ennetbürgen u det het sech no de Spaci üsem Konvoi agschlosse. Via Oberalppass isch es de bis nach Sedrun gange.

ds Schnutli-Putli

Huch, i wärde vomene pinkige MINI verfolgt! ;-)

Was me da in Sedrun nid so aus gseht... Me achte sich uf ds Kennzeiche vom Audi...

et voilà, üsers Huus für die nächschte 2 Nächt

ds Huus "Casa spinatsch" würd zur MPC-Hochburg, oder zum "Luststoff", wies jetz mit de MINI Fahne agschriebe isch... *hüstel*


So vöu MINIs het Sedrun garantiert no nie gseh! ;-)

Uf die 20.00 Uhr himer im Dorf binere Pizzeria für 30 Persone reserviert. Dumm nume dass es d Wirtin vergässe het dass wir ja scho hüt uftouche.... Mi hi üs aber die gueti Lune nid la verderbe wäg däm, wärum o? Wir hi ja alles richtig gmacht, aber i glube die Bsitzer vom Restaurant si grad churz chli is Schwitze cho! =)


Em Spaci's u winti's Vulkana-Pizze het üs spontan zumene "Happy Birthday" Gsang bewoge.

Zrugg i üsem Huus chimer no chli virtuell mit de MINI Challenge race, dank Beamer miteme riese Bild! Scho chli anders aus dehei ufem chline Fernseh! ;-)
Töggeli-Chaschte hets o zur Verfüegig ghäbe....

....oder me tuet sech ganz eifach no chli mitenander unterhaute!

Am nächschte Morge isch de d Rätselrallye ufem Programm gstane. In zweier Teams miteme Roadbook bewaffnet isch es losgange. Underwägs hets immer wieder Frage ds beantworte gä.

Slapp uf abwäge: Nee, da hinder simer definitiv ned richtig um die nächschti Frag ds beantworte! ;-)

Underwägs hets zum Teil no ganz anderi Hindernis ds bewältige gä...


In Ambri hi wir üs de wieder für d Mittagspouse troffe. Im gliche Restaurant wo mer mitem Vorstand vor paar Wuche o scho gsi si. D Grössi vo de Portione het sech ir Zwüschezyt no nid gänderet. Eifach riesig! ;-)


witer gits via Gotthard. Huch scho wieder d Schnute... *lach*


Ufem Gotthard obe acho träffe mer de no uf Verwandti: D Classic Minis sie dises weekend o underwägs. So vöu i mitbecho ha, hi die es Träffe im Tessin ghäbe.


Irgendwenn nach de 16.00 Uhr simer de wieder zrugg in Sedrun. Für am Abe himer e Grillplausch vorgseh. Leider isch es aber nid sooo warm u o ds Wätter isch chli unsicher. Glücklicherwis het üs de Metzger e Hütte vo ihm zur Verfüegig gstellt, so chimer dine schön im Trochene und Warme d Sache vom Grill gniesse. 1 chline Hacke hets aber: Das schöne Plätzli isch 10 Auto-Fahrminute witer wäg als de ursprünglech plant Ort, und ds Strässli det häre isch alles andere als MINI-tauglech. Churzerhand stellt üs de Metzger o no grad sis Auto (oder wie me das nennt) zur Verfüegig. Chum ds glube, aber dä chli schmal Wurf bietet Platz für 7 Persone. Let's go! De Winti spielt Chauffeur und de Subaru mutiert zum MPC-Shuttle-Bus. Nach und nach wärde alli bis zur Hütte chauffiert.


hie isch das Prachtsexemplar


...und das üse Grillplatz. Besser git nid!


Und scho chäme die erste am Ort des Geschehens an!


de Lochhammer het für Unterhaltig gsorgt u o dine isch de scho baud mau d Post abgange.

Ke Ahnig wie me däm Spiel sit, aber uf jede Fau isch es geniau gsi. Zum Zuegugge und zum Mitmache!

churz druf isch de ds Buffet eröffnet gsi!

dusse sorgt Grillmeister Spaci für Nachschub


de Markus alias Rivabella versuecht sich als Alp-Buur ;-)

Nachdem mer alli satt si und es dusse scho lang dunkel isch starte mer de wieder die gstaffleti Rückreis zum Huus an. Natürlech mitem MPC-Shuttle-Bus! ;-)

Wo de die meiste scho im Bett si, löhs de Spaci, ds pinki, d Ariane, de Dylan u i no mau so richtig la krache. I glube wir hi so lut gröölet dass mer die ganzi Mannschaft wieder gweckt hi! Sorry a däre Stell! ;-)

Es git ja Lüt, wo no ds Zahnbürstli im Muu hi we sie gröle, das gseht de öppe so us:

Näme wärde säubstverständlech kiner gnennt! ;-)


Nachere churzi Nacht trifft me sich die wieder bim Zmorge. Dernah hisst es de leider schomi packe und ufruume. Isch es super weekend gsi wo mer sicher no lang devo wärde rede.


d MINIs rund ume Tüüfu si scho au wäg, Zyt äbefaus mau heiwärts ds fahre.


Mitem Spaci, Pinki u reni gits die via Oberalp wieder zrugg. Bir Gotthard-Raststätt no es lötscht Foto, und fertig isch üsers 5-Jahr-MPC-Jubiläumsweekend....



da chame nume no säge: Let's MPC!