Donnerstag, 30. Oktober 2008

Schnee!

Letscht Suntig het de Smart siner Winterfinke becho. Zum Glück, wie sech usegstöut het!

Damit de Smartie nüme so muess usgseh am Winter:

hets für ihn no grad es paar brandnüi Radchappe gä. Hasse zwar die Dinger, aber gseh allemal besser us aus die nackte Stahlfäuge u extra Aluräder chufe magi irgendwie doch de o nid.

Gseht gar nid so übel us, oder was minet ihr?
Bim MINI hani natürlech unbedingt no die grosse Summerfäuge welle druf lah. Dä muess aber jetz deswäge zwungenermasse e Pouse mache. Zwar his ja d Prognose vorusgsit u am Mittwuch Morge hets scho liecht gflöcklet woni bü ga schaffe, aber das Böud wo sech präsentiert het woni am Abe am 20.00 usem Schuelgebüde ds Bärn use bü hetti auso nid für möglech ghaute.
Schnee so weit das Auge reicht!!!!!
Uf de Heifahrt hets ihm grad no mau so richtig gä. Vo luter Schneegestöber het me d Strass chum no gseh, aber Foto mache git natürlech immer no *lach*


Smartie het de ganz e pudereti Nase ghäbe woni dehei acho bü *lach*

Das het natürlech füre Vater umi Sonderschichte bedütet, de kört ja (no) zu däne glückliche wo aube gö ga de Schnee wegruume.
Hüt Morge hets nomau e Portion meh Schnee ghäbe im Garte usse, defür si d Strasse wieder meh oder weniger suber gsi u de Smart isch ohni Problem am Ziel acho ;-)

Dienstag, 28. Oktober 2008

Rallye du Valais

Am Samschtig Morge am 07.00 büni bereits wieder ds Tafers gsi u ha de Michael Rumo abghout. Zäme mit ihm, de Chantal u iras Fründ Pascal simer richtig Wallis losgfahre, a grösste u international angsehendste Rennsportalass vor Schwiz: Rallye du Valais!

Die ersti Location isch in Nax. Vo det himer zersch mau die troumhafti Ussicht müesse gniesse. Schliesslech sie die arme im Flachland de ganz Tag im Näbumeer versunke gsi. We nume die blödi Strasselampe nid im Wäg gstane wer! *lach*


Aber mit de Rueh isch es de baud mau verbi gsi wo die erste Rennautos düregraset si! Aaaaaction! =)



video


ungloublech wie cm-gnau die ihnes Bolide müesse durch die enge Strasse zirkle, u das bi atemberoubende Gschwindigkeite! Respekt!


De zweit Rennlouf isch de in Nendaz gsi. Auso nüd wie zrugg is Outo, de Bärg ab u de nächscht Hügel wieder ufe. Da het o für üs die eint oder ander cooli Kurve usegugget!

In Nendaz acho isch es de grad witergange!



video


Nachdem in Nendaz de Rennlouf fertig isch gsi, si sie de scho wieder in Nax gfahre, auso si o wir wieder det zrugg gfahre u hi nis det zersch mau ufenere Terrasse öppis ds Ässe gönnt.



O da wieder: Die Ussicht! Aber irgendwie büni a dem Tag ifach chli uf Chriegsfuess mit de Strasselampe gsi... uf jede Fau isch mer da scho wieder sones Teil im Wäg fürs Foto.... ;-))


Hie nomau as chlis Föumli vomena Rennbolide:



video


Nachdem o da wieder fertig isch gsi simer de umi zrugg is Outo u nach Martigny wo am Abe die grossi Siegerehrig isch gsi.


Mitsamt Outo si die Beste ufs Podest gfahre.



Während dinne die erste Sieger vo de einzelne Kategorie gfieret wärde het sech dusse es chliners Drama abgspöut. Toll, wie hutnah dass me da de Rallyesport het chöne miterläbe.

So gseht dä Subaru ja no rächt akzeptabel us....



vor wenige Sekunde isch aber vore rächts no die Felge dran gsi:



U mitere leichti Fresse schräääg het sech das Auto richtig Siegerträppli begäh.



Vor anderi Site hets de so usgseh:



Jaaa, genau a so:


Vom Fahrer himer zuefälligerwis mitbecho was passiert isch: Irgendwie so: Nacheme Sprung isch ds Auto imene Loch glande u debi hi sie ds linke Vorderrad verlore, das paar Meter vorem Ziel. U was macht da sone richtige Rallyefahrer: Genau, dä fahrt eifach witer!

Allerdings het er sech so no vom Ziel bis uf Martigny müesse rette. Ke Ahnig wie ner das uf 3 Räder gschafft het wovon er uf eim Rad no mit de Felge gfahre isch... uf jede Fau het me schlussendlech vor links nid nume ds Rad sondern die ganz Achs gföut! Krassi Story!!

Allerdings het er ganz offesichtlich ging no meh Glück ghäbe aus dä Kandidat da:



Mi hi nume öppis vernoh vomene Auto wo sech mehrmaus überschlage higi... das würd öppe dä gsi si! Meine Güte!


Uf jede Fau isch es sehr e spannende Tag gsi u wir his so richtig guet ghäbe ds viert! Woni am Abe acho bü, büni jedoch kaputt gsi! =)

Alltag

Am Donschtig Abe nach de Schu simer no paar zäme uf Bärn is Pickwick-Pub is ga zieh. Das isch aube no gmüetlech. Leider aube nid ds lang, schliesslech isch am Fritig aube o no a Arbitstag.


Fritig Abe büni de no schnäu mitem Vater uf Bösinge ad Gwärbusstellig bevors mit de Madlen, Fabienne und Co nomau ad GUS-Party bir Süri gange isch. Ir Dance-Hall isch es so richtig abgange. U Bekannti Gsichter si äbefaus det gsi. D Sabrina, de Niccu, de Stu, und und und.... Allerdings hani nid au zu lang gmacht, schliesslech hani gwüsst dass i umi mau uf muess am Samschtig.... Schlussendlech hets glich no für knapp 4 Stund Schlaf glängt. ;-)

Donnerstag, 23. Oktober 2008

HFW, ds 2. Jahr

Vor 1 Wuche isch es umi losgange mit de Schu. Im 2. Jahr stöh ganz anderi Fächer an aus no letscht Jahr: Volkswirtschaft, Organisationslehre, Human Resources, Projektmanagement, Betriebliches Rechnungswesen, Marketing, Deutsch & Kommunikation u Englisch.

Bis ufe Dozent wo üs Vernetzung git, sis aus setig womer bishär no nid ghäbe hi. De isch natürlech d Spannig aube gross, wär jetz da is Zümmer chunt zum Unterrichte. De Hammer isch de Dozent vom betriebliche Rächnigswese: Leider nüm dä womer letscht Jahr im Finanzielle Rechnigswese ghäbe hi... E junge Dütsche... u weni gä gseh chunt mer eifach nume no die Werbig i Sinn:


Geht 1:1 so us, ehrlech! U het o d Händ ging so! I cha aube fasch nüm.... ;-)

letscht weekend

Am Fritig Abe büni uf Murte. D Chantal het ersch grad züglet u wohnt jetz det, mit Seesicht u ds Fuess nume öppe 2 Minute vom BB wäg. Eigentlech himer o det häre wölle, aber da d Silvie bereits mitere Kollegin im Chesery (http://www.chesery-murten.ch/index.asp) gsi isch, simer de o mau det ga gugge. Cools Ambiente det inne! U aus wo usgstöut isch chame chufe, sogar de Tisch ud Stühl vom Restaurant säuber. Das ergit de ganz es amüsants durchenander. Während die Einte gmüetlech ufem Sofa hocke u am Wyy triche si, lufe die andere mitem Messband (oder "Zollstock" wie d Silvie würd säge... ;-)) umenand u mässe ob de Tisch o i ihnes Wohnig würd passe.

Am Samschtig het mini Mueter Geburtstag ghäbe. U wie das bi üs so isch, touche ging öppe die Eint oder Andere uf zum Gratuliere. U das isch o dismau nid anders gsi. Aber vorher hani am Morge nomau zum Dokter müesse wägem Zeckebiss. U ds Fazit vor Ärztin isch alles andere aus super gsi: Da me de Biss ging no gseht chani grad wieder afah mit Antibiotika... dismau nid für 10 Tag, o nid für 20 Täg, sondern grad für 30 Täg, u we me bis denn no öppis gseht gits grad i dem Stil witer... De Biss sig sehrwahrschinlech ebe scho lenger här, das chön o scho vor 2 Jahr gsi si... drum göngs jetz so lang zum dä Seich ds bekämpfe... Heja... houptsach es chunt guet, git ja schlümmers aus Medis näh....

Wieder zrugg dehei, isch de öppe bis am 14.00 ruhig gsi, u de hets uf ds mau nüme ufhört lüte ar Türe. Churz später isch d Stube vou Lüt gsi. Isch ging schön wievöu Lüt das chäme we öpper Geburtstag het!

Am Abe büni de mit de Fabienne, Claudia u no paar anderne ad Süüri. Das isch sones Fest wo au Jahr vo G.U.S i grosse Zäut organisiert würd. Det himer de gfieret bis öppe am drü am Morge! =)

Samstag, 18. Oktober 2008

Schnäppchen des Tages

Hützutags gits fangs nüd meh gratis... jetz muess me sogar für d Morgelatte zahle... ;-)

Donnerstag, 16. Oktober 2008

The other way...

... to the Höck, oder so ähnlech! ;-)

Fritig, de 11. Oktober, It's Höck-Time!!!!!

De Pascal, Rotsch hi sech entschide mau de Stau uf de A1 hinder sech ds lah u über Umwäge a Höck ds fahre. Da i grad no Ferie ghäbe ha, het das ja super passt u bü o mitgange.


Am 11.00 hi wir üs bir Autobahnraststätt Münsingen troffe u de simer richtig Meiringen gfahre. Vo det us isch es de übere Sustenpass gange. De Cheib macht eifach extrem Spass! =)





Det hi wir üs de e Mittagspouse gönnt. Bi strahlender Sonne himer uf de Terrasse de Herbst gnosse.

Üsi Route isch witergange. Nächschti Station: Klausenpass! Endlech mau! Wie mengisch weri scho gär mit de anderne MINIs det drüber u es het eifach nie sölle si... I cha die Jungs sehr guet verstah, da reiht sech Kurve um Kurve, gradusfahre exisitert praktisch nid! =)

die zwe Poser-Machos kenni nid! ;-))

Vor Passhöhi us himer e wunderbare Blick ufs Näbumeer ghäbe. Allerdings schint grad Fluet gsi ds si. De Näbu isch immer höcher cho u bevor mer hetti müesse d Näbuschinwärfer bi de MINI alah, simer de umi witerzoge.

Vo det us simer via Urnerbode nach Glarus womer schnäu bir Garage Röschmann e Haut gmacht hi u am Reto si ga sälü säge.

Die letschti Etappe bevors richtig Mühlau gange isch hets no mau so richtig in sich ghäbe. De Sattelegg isch ja o abartig! So vieli u engi Kurve uf inisch, da schlaht jedes MINI-Härz höcher! Obe acho wi wir drü üs einig gsi: Uf däre Strecki schlaht kes Auto uf de Wäut üser MINIs! =)


Cool: Die Brügg führt üs ds mitz übere Sihlsee!

et voilà! Überpünktlech wie no nie träffe mer churz nach de 19.00 in Mühlau i. Es paar si scho det. Drunder o ds Nicci wo ires MINI ganz früsch optisch ufpeppet het:

De Höck isch wie immer es Spektaktel für sech gsi. Vorusse 30 MINIs u dinne e Huufe MINI-Freaks, da luft jetz eifach immer öppis! Leider isch jetz scho wieder früh dunkel, dahär gits kes schöns Gruppefotos vo de MINIs, aber glubet mer: Es het eifach geil usgseh!!!!

Samstag, 11. Oktober 2008

Ds Westside isch offe!

Am 8. Oktober 2008 het ds Westside zum erste Mau siner Tor göffnet. Nume 1 Tag später hani doch das Miesterwärk o scho müesse ga gugge. Scho nume d Architektur isch faszinierend. Alles im Innere isch immer agschräget, egal ob Wänd, Glasflächene, oder was o immer... Sehr schön gmacht! Respekt!


d Lüt ströme i grosse Masse i das riesige Center

ds stylische Hotel

Westside im Innere....

55 Läde, 11 Kinosäu, es grosses Erlebnisbad u 10 Restaurant warte uf d Bsuecher



Roma

Am Suntig, 4 Oktober, simer ab Genf mit EasyJet richtig Rom gfloge. Wir, das hisst: I, miner Eltere, d Rita u de Max, beidi Bekannti vo üs. D Rita isch a ehemalegi Lehrtochter vo mir Mueter.

ds Hotel: Prinicpessa Tea. Nid überwäutigend, aber zum Übernachte längts...

Fontana di Trevi

die spanischi Treppe


d Sicht vor Treppe obeabe

mis nüe Lieblingsrestaurant: Coole Style!


das wer o no es hübsches Hotel gsi... aber awäg nid ganz die glichi Prisklass... ;-)

am zweite Tag himer de e Sightseeing Tour miteme Doppelstöcker-Bus gmacht wo obe offe isch. So het me e schöne Überblick uf d Sehenswürdigkite vor Stadt. Zudem fahre die Busse zümlech regumässig. So chame bi de verschiedene Statione usstige u sech so vöu Zyt nä wie me wott für die einzelne Sache ds besichtige. Isch auso nid sone Touristetour wo öpper mitem Fähnli vorusluft, vo dene hets o sehr vöu ghäbe in Rom. Aber das wer nüd für mier! ;-)

ööööehm.... ou... was isch ächt das jetz schomi gsi... wiss es grad nüm! ;-)


e riese Bunker, aber schön gmacht! =)

vo dem wisse Prachtsbau us het me e schöni Sicht uf ds antike Rom

eeeet voilà, endlech! Mi persönlech Höhepunkt: Ds Kolosseum! Da himer natürlech umbedingt iche müesse. Dinne isch zwar fasch alles zerstört. Vo usse gsehts emu besser us. Aber uf jede Fau isch es zümlech idrücklech!

e Bewis defür dass die aute Römer wahnsinnig modern si gsi: Die hi ganz offesichtlech scho denn per Handy mitenand telefoniert! *lach*


de Vatikan mitem Petersplatz u de Basilica S. Peitro.


ds Grichtsgebäude ufem Piazza dei Tribunali


....u wieder mau sones schöns, durchgstylets Restaurant! Wow!


Blick ufe Piazza del Popolo

Am dritte Tag simer de mit de Metro uds Fuess underwägs gsi u hi Rom uf eigeti Faust entdeckt.


die spinnen, die Römer.... oder was genau het die Pyramide in Rom ds sueche??? ;-)


Bocca della Verità
D Legende besit dass we me d Hand is Muu streckt u lügt, schnappi das Teil zue... troue där Sach nid so ganz! ;-)


die malerischi Ponte Fabricio wo uf d Isola di Tevere führt


Piazza Navona


det ufem Platz hi Musiker für Unterhautig gsorget



Blick ufe i inere vo vielne riesige u prächtige Chöuchene
(Chöucha = Kirche, für die wo jetz nid gwüsst hi was i mine! ;-))


ds Pantheon



ds Quirinale, sodsäge ds "Bundeshuus vo Italie", de Berlusconi hani allerdings nid atroffe det! ;-)


abermals e grosse Brunne ufem Piazza della Repubblica


u nomau e Blick uf das wisse grosse Gebäude wo anschinend ke Name het... ha emu nüd gfune....

Am vierte u letschte Tag simer de langsam richtig Termini, de gross Houptbahnhof vo Rom. Vo det us himer nomau ufe Piazza della Repubblica chöne u de simer de mit Metro u Bus zrugg zum Flughafe


u scho si die 4 Täg ume u wir umi zrugg in Genf. Muess a däre Stöu nomau säge: Bü jetz scho mehrmaus mit EasyJet gfloge u ha no nie erläbt dass öppis nid klappet hetti oder d Flugzüg verspätig ghäbe hi. Immer schön pünktlech u alles luft wies setti. Cha EasyJet nume empfähle!