R'n'B Night im Liquid

Für gester Abe hi de Päscu u ig planet ghäbe wieder is Liquid ds ga. Auso hani mau chli umegfragt wer süsch no würd mitcho. Schlussendlech simer de e ganzi Gruppe gsi: Ig, de Päscu, Nicci, Tömu, Daniel u de Kilian wo no grad si Geburtstag gfieret het. De einzig Hacke a dem ganze: Es isch R'n'B glüfe, wo doch süsch a 95 % vo aune Aläss det inne die ganz Zyt House ufgleit wird. D Musig isch de o die gröscht Töu vom Abe nid würklech de Hammer gsi, das het aber nüd a üsere Stimmig chöne ändere. Uf jede Fau isch umi 03.15 gsi bis i dehei gsi bü. Isch auso trotzdem no e coole Abe gsi, aber wi si üs glubi alli einig: Nächscht mau gömer definitiv we wieder House-Party isch!!! ;-)

Wiehnachte

Am 24. Dezember hani no gschaffet bis am Mittag. Es riese dürenand gsi, das wü sit am 23. d Informatik nid so het welle wie si sett. So öppis passiert natürlech ging grad i där Zyt wo am meiste los isch, isch ja klar! Jänu, was söus.... Zum Glück hi wir ja am Nami zue ghäbe. Am Abe ha ni de mit de Eltere u de Grossmueter dehei Wiehnachte im chline Kreis gfieret.

Am 25. Dezember fiere wir traditionell mitem Brueder vor Mueter wo glichzytig mi Getti und sini Frou d Gotte isch. Wir si immer abwächslend inisch bi ihne u de wieder bi üs. Dieses Jahr si wir bi ihne iglade gsi. Mini Cousine, d Christa, isch o dehei gsi. Nachem Ässe hi wir de no d Fotos vo Berlin u Rom agugget u no chli über dieses und jenes diskutiert.

Westside + Liquid = Samschtig-Abe

Am Samschtig si ds Pinki, de Demi, de Päscu u ig zäme im Westside is Kino gange. Lut erste Hochrächnige mi 7. Bsuech im Westside... (u wahrschinlech nid mi letscht gsi *hüstel*)

Nachdem die 2 Suchtis unter üs no schnäu id Smokers-Lounge welle hi, si wir de usgstattet mit Getränk u 2 riese Packige Popcorn im Pahté Kinokomplex ufe Saal Nr 8 zuegstüret. De Film womer si ga gugge hisst "The day the earth stood still." Chli Action, chli Fantasy: Ganz e gueti Mischig, o we die ganz Story e liecht grüen-politische Touch het. Über das hani jetz mau hinwäg gseh, d Botschaft isch nichtdestotrotz glich acho: Me sett meh Sorg zur Umwelt trage.

Nachem Film hi de Päscu u ig no nid grad umi hei welle. Auso hi wir üs entschide no chli uf Bern ds ga während Pinki u Demi sech verabschiedet hi. Da scho nach de 23.00 gsi isch himer grad ohni Umweg is Liquid chöne wo ja um die Zyt o langsam aber sicher siner Tor öffnet. Det chasch jetz ga wenn du wosch, es louft us Prinzip immer House-Musig. O dismau isch das natürlech nid anders gsi. Aber oha: Was fürne Überraschig! Nid irgend e unbekannte Platteufleger isch det gsi, sondern de DJ Antoine! Umrahmt vore Liechtershow, Windalag u silberige Konfettiräge het är sis Set-up präsentiert. Bi paar Dose Red-Bull (wir si ja beid mitem Auto det gsi...) hi wir no bis öppe am 03.30 chli quatschet, danced u die fette Bäss gnosse.

Schnee, Schnee u nomau Schnee!

Shiiiiiiiiit! So vöu Schnee hani bi üs glubi no nie gseh!

Am Mittwuch hets abeglöst was abe het möge. De ganz Morge hets ununterbroche gschniit. Kes Wunder hani de am 11.30 woni ds Courtepin zur Bank use bü für id Schu vo luter Schnee scho fasch de Smart nüm gfune.

Aber da isch de d Story ersch richtig losgange. Eigentlech hani ja nur d La Sonnaz wui müesse für uf d Autobahn u de weri schnäu mau ds Flamatt gsi für e Zug richtig Bern ds nä. Aber nei, es het nid sölle si. D La Sonnaz isch e berüchtigte und stotzige Teil mit enge Kurve zwüsche Courtepin und Granges-Paccot wo d Autobahnifahrt wer. Natürlech het e LKW glich probiert bi däne Strasseverhältnis det dedür ds fahre. Logisch isch er kläglich gschiteret bi dem Vorhabe. Quer über beid Fahrbahne het er alles blockiert u isch nüm witercho. D Autos vor mir si alli umi umgehrt. Ja bravo... u was mache ig? Blibt mer ja nüd anders übrig aus o e anderi Route ds nä. Auso die ganz Strecki umi retour und via Courtaman, Cordast, Gurmels, Schiffenen, Schmitte u Mühletal nach Flamatt. Vorallem bi Cordast het me zum Töu gar nüm gseh wo dass d Strass isch. Das hie isch normalerwis e guet usbouti, 2-spuregi Houptstrass:

U das mitem Smart wo bi setigne Situatione gär de Macho spöut. Aus ob er aune wetti zige dass er e Hecktriebler à la BMW isch schwänzlet er bi jedere Kurve närvös mitem Heck. ;-)

Uf jede Fau isch es de zümlech lang gange bis i ds Flamatt acho bü. De Zug woni eigentlech ha welle näh hani natürlech lengstens weg gsi. O füre nächscht hets nüme glängt, auso büni schlussendlech 2 Züg später richtig Bern gfahre u haut dementsprechend o ds spat ir Schuel acho, aber who cares, houptsach isch nüd passiert! ;-)

Suntigs-Uisflug

Zum Glück hani de grad bim Spaci chöne übernachte. Obwou... bü ganz überrascht gsi! Bi ihne hets überhoupt gar ke Schnee ghäbe. Komisch, u bi üs hets so vöu gä! Alles grüen gsi in Nidwalde! Da gaaaaht doch nöööööd! ;-))

Auso simer de am Suntig glich no chli i Schnee: Gäge Mittag simer de no churzentschlosse "uife" Schalleberg gfahre. Ganz spontan isch o no de Reni mitcho. Er isch ja e Fan vom Resti det uf de Passhöhi obe! Über d Location vom Träffpunkt chame sech natürlech strite, aber het emu interessanti Fotos gä! ;-))

Uf de Passhöhi acho, hi wirs üs de so richtig lah guet ga. Nachem feine Houptgang hets de no es üppigs Dessert gä. U nachem übliche Klatsch und Tratsch isch de o scho fasch wieder füfi gsi. Zyt langsam wieder hei ds ga. Ufem Rückwäg hani die wunderschöni Landschaft chöne gniesse:

A Quantum of Solace

Nachdem i am Nami mi 6. Bsuech im Westside gmacht ha (eeeh ja, muesch ja o umi mau det gsi si, oder?! ;-)) büni de so öppe am haubi füfi mau losgfahre richtig Nidwalde zum Spaci. Zäme mit de Cindy u am Spaci büni de ds Emmen is Maxx ga de nüü Bond-Streife gugge. D Meinige über dä Film si ja gspaute. I ha ne nid so schlächt gfunde, o we oder grad wü einigi typischi Bond-Gadgets dismau fehle. Dernah simer de no id Ranch is ga zie.

Ha mi mega gfreut d Cindy nach langer Zyt umi mau gseh ds ha. Isch e super Abe gsi mit euch beidne! =)

gut gelaunt

Letscht Fritig Abe hi sech d Fabienne, de Fabian, ig u d Madlen umi mau troffe für öppis ds undernäh. Eigentlech wer ds Bierhübeli e Option gsi, aber da det Hip-Hop Abe isch gsi, himers de lah si. D Fabienne wer gär ane Rollerparty gange, het aber nid gwüsst wo genau dass es isch. Sie het probiert per SMS vore Kollegin usedsgfüne wo die Party stigt. Ir Zwüschezyt simer de scho fangs mau bis uf Bern is "gut gelaunt" gange. U det simer de o grad blübe. Erstens het ires Kollegin nid gantwortet u zweitens isch es uh gmüetlech gsi det. Wir hi emu de ganz Abe immer öppis ds verzelle gwüsst u hi üs bestens amüsiert. O ab dene am Tisch näbe üs. Ds dritt hi die am Schluss e Rächnig vo Total 27 Flying Hirsche u no paar Stange Bier becho. Wir si üs zwar jetz no nid sicher ob das tatsächlech 27 Hirsche si gsi oder ob sech da de Kellner nid doch chli verzellt het. Die si nämlech no ganz schön wacker uf de Bei gstane für dass sie so vöu Drinks intus setti ghäbe ha. Egal, üsi Rechnig het am Schluss vom Abe uf jede Fau gstumme. Het ächt Spass gmacht mit euch! Müesse mer wieder regumässiger mache! ;-)

Es wiehnachtet...

....o bi üs ir Bank.


Hie paar Impressione vo üsere Wiehnachtsdeko i de Filiale Courtepin.

MPC goes Käpten Jo's Aarfähre

Samschtig, 6. Dezember 2008. Füre MPC chunt nid de Samichlous, da si wir awäg ds wenig brav defür gsi, ganz im Gägetöu... Gester Abe si wir ganz bösi Jungs und Mädels gsi. Üsers Wiehnachtsässe het üs uf Biberstein zum berüchtigte Piratefrass ir Käpten Jo's Aarfähre gfüehrt.

Am 19.00 hi wir üs det ufem Parkplatz troffe. U aus ob mi MINI o no e Töu zum Bad-Boy Image hetti welli bitrage git 200m vorem Ziel de Kat kaputt. Jetz röhret de Tüüfu wie blöd u macht e saulärm. Sportwage mutiere zum Leisetreter näbedra.... shit! Jänu... gömer haut am Mentig wieder mau id Garage mitem.....

Aber jetz zum Piratefrass:
D Location isch detailgetreu amene Pirateschiff nachempfunde u d Gäst hi alli als Pirat verchlidet müesse atrabe.

Bim 1. Gang hets Fisch u Riis gä u für d Vegis Omelette. Das het me vo Hand müesse ässe, vornehmts Getue isch nämlech strengstens verbote bim Piratefrass u wird büesst. Äbefaus muess me stets mit de linki Hand trinke, wer de Becher mit de rechti Hand nimmt muess mitere Straf rächne. Im Gsamte hets glubi 7 Regle gä wo me sech het müesse dra haute.

Vom MPC si 28 Lüt awesend gsi u hi sich sichtlech amüsiert abem Piratefrass.

Matrosin Pinki im Korsett

Event-Pirat winti (dä links!! ;-))

ds Teri in Nachufnahm

Eigentlech si mer meh oder weniger de ganz Abe am Ässe gsi. 2. Gang isch e Suppe gsi wo sie useme Nachthafe usegschenkt hi, die het me ganz eifach müesse schlürfe, Löffle hets keni dezue gä. D Servierdüse si miteme riesige (sicher öppe 3m lenge) Baguette umenand glüfe wo jede eifach het müesse abrisse sovöu er het welle.

3. Gang isch glubi de Salat gsi.

4. Gang hets de Fleisch- u Pouletplatte mit Biilage gä, da hets jetz o Bsteck dezue gä. Für d Vegis hets Häpere, Tomate, Rüebli, Bohne u Vegi-Plätzli gä.

d MPC-Piratebandi am Schmatze

ööööehm...wie nenne mer dä?! Säge mer mau de Tresorpirat....

Pirate-Oberhaupt Spaci

d Sidewalk-Sabrina

Svennyboy

Roger "Fresse schräääg"

d Tanja

d Appezeller-Pirate Dylan und Petra

Ahoi Pät!

Nicci ud Landratte Reni

d Kampfschachtle uds Danimüüsi

d Jaye

Jaye's Begleitig u üse Österrich-Import butzvarrukt (isch gar nid varruckt gsi sondern ziemlich guet glunt! ;-))

Rennfahrer-Pirat Hans mit sire Tochter Svenja

de fleigendi Holländer Mike mit de do*MINI*que het natürlech o nid dörfe fehle!

Na, der Björn is auch mit an Board!

d Chaotefraktion happy slappy ud Shorty

Demi u pinki

Crazy Dome

Kaaaste winti ud Piratedame Teri

Nachem Houptgang hets de Kafi-Rum gä (Gang Nr. 5?!), churz später si sie wieder mit riesige Früchteschale (Nr. 6) umenand glüfe wo me sech het chöne bediene u zum Schluss hets als 7. Gang no Sorbet als Dessert gä.

Zwüsche de einzelne Gäng hets immer wieder Unterhautig gä. Sigs jetz musikalischi Unterhautig, e Live-Uftritt, e Salsa-Tänzerin, oder die zwei wo mit echte Schlange um üsi Tische tanzet hi. Mengisch himer de o grad säuber sölle mitsinge u inisch hets spontan no e Bolognese gä. Gäge Schluss het natürlech de legendär Sturm auf hoher See nid dörfe fehle! Lengwilig isch üs uf jede Fau nid worde.

Glube schlussendlech simer so um Mitternacht wieder vo Board gange. Duss himer de no chli über ds erläbte diskutiert u de si au MINIs langsam aber sicher wieder i die verschiedene Richtige verschwunde.

Danke a alli wo cho si, isch super gsi! Danke o am Dome wo die ganz Rückfahrt hinder mir usgharret het (bü nid sooo schnäu gfahre zum chli de MINI schone wo e Heidelärm gmacht het ;-)).

Pirate Ahoi, see you soon!

Jubiläum

Hmmm... no nid ganz... nei no nid.... immer no nid...

Huch! Jetz!! *sniff* *heul*

Happy 80'000 km, MINI!!!!

De MINI isch ready...

Am Samschtig isch ja üsers MPC-Wiehnachtsässe bir Käpten Jo's Aarfähre. Da müesse wir alli als Priat verchleidet atrabe. De Tüüfu het sech scho mau ready gmacht defür!

...sogar de Pimboli woni zum 18. Geburi vo de Kolleginne becho ha u sit Afang an im MINI sitzt fahrt im Pirate-Style mit...

Fazit: De Samschtig cha cho! ;-)

HFW Seminar

Vom 27. bis u mit 29. November himer ir Kaserne ds Bern as Seminar ghäbe wos ums Thema Beschaffung & Logistik / Produktion gange isch. Obwou die allermeiste vo üs imene Dienstleistigsbetrieb schaffe, sig das dennoch öppis wichtigs hi d Dozente gfune. Ende Januar gits bereits d Prüefig über das Fach.

Ds Spezielle a dem Seminar: Es isch zäme mit de andere sogenannte HFW-Premium Fachschuele: Mit dere vo Baden, Aargau u ebe Bern.

So si schlussendlech am Donschtig Morge ca. 150 Lüt a dem Seminar erschine. D Rümlichkeite hi Uni-Stil ghäbe, wir si alli schön ufeme grosse Podium ghocket wo gäg hinde agstige isch, u unde uf de Bühni isch de Dozent mit Mirko gsi und 3 Bildschrime wo d Power-Point-Präsentatione drüber gflimmeret si.

Am Fritig Namitag simer de d Praxis ga besichtige, das i 5 verschiedene Betriebe. I bü bir Comet AG in Flamatt iteilt worde. Das isch no zimlech interessant gsi ds erfahre, was genau die herstelle u das für Herusforderige sech debi stelle.

Am Abe isch de ds grosse HFW-Premium-Fest gstige. Dadefür het d Schuel ds ganze Liquid gmietet, ine vo de agseiteste Clubs in Bern woni früher praktisch jedes Wuchenänd abtanzet ha. Det hets allerlei Häppchen gä u de DJ het Clubsound ufgleit. E Fotograf isch o no umgeschwirrt, aber die Fotos si no niene online... ;-)

Weniger schön isch gsi dass mer am Samschti wieder hi müesse atrabe... zum letschte Tag Seminar. Me hets de Lüt zimlech agmerkt. Es paar hi ersch gäge Mittag de Wäg usem Bett zur Kaserne gfunde! ;-)

Defür hets ide Morge-Pouse jeweils verschiedeni Gipfeli, Kaffee, Orangesaft u Tee gä, am Mittag het me zwüsche 3 Menus chöne uswähle u ir Namipouse hets aube süsch Gebäck gä. So het me doch die 3 Täg no rächt guet chöne überstah. ;-)

Vorstandsässe

Ar letschte GV isch ja beschlosse worde dass de Vorstand 1x pro Jahr es Ässe uf Chöste vor Clubkasse ds guet het, sodsäge d Entlöhnig für d Arbeit. Aso hi wir das o gmacht.

Am 15. November simer in Vorderbalmberg (SO) ganes Fondue ässe. Guido het das Resti vorgschlage. O de Treffpunkt isch vo ihm cho: 47°14'12"N, 7°35'16"O, 18:00 Uhr... okee... irgendwie hi wir üs emu de alli gfune u si det uf de Hügel ufe ga ässe. Isch ganz gmüetlech gsi det. Ganz näbebi hi wir de no grad paar administrativi Sache erledigt.

Smiiiiileeee! ;-)

Nachdem mer de no die einzige im Restaurant gsi si, hi wir üs de mau beschlosse ds zahle u ds Wirtepaar i Füürabe ds entlah. Guido, Spaci u ig si de no ds Wangen an der Aare is ga triche u de isch es de o für üs wieder gäg hei zue gange.

PS: Für alli wo sech jetz Sorge umd Clubkasse mache: Ke Angst, wir si relativ sparsam gsi u hi ds Budget nid überstrapaziert! ;-)