Spontan-Pizza

Da mi d Medis woni momentan muess nä chli lahmlege hani am Samschtig Namitag no nid rächt gwüsst wasi am Abe wott mache. Dehei blibe isch o lengwilig u gross u Usgang ga magi glich nid. Da chunt am Renis spontane Idee dass mer doch chönti gane Pizza ässe grad wie bstöut. Sofort wird e SMS-Rundi gstartet u am Schluss simer ds füft wo sech us aune richtige ufe Wäg nach Langenthal mache. Irgendwo muess e Lotus-Challenge oder so gsi si... underwägs hani grad 5 Stück vo dene Traumautos überhout.... aber nume ine devo isch gfahre, die andere si au jewils ufeme Ahänger glade gsi... Si haut scho schöni Rennmaschine! *schwärm*

Tatort Restaurant: "Mamma-mia" in Langenthal. Die übliche Verdächtige: Spaci, Möni mit Thomas, de Reni u mini Wenigkit....

D Pizzas si hammer gsi, säute sone gueti ghäbe! Wir hi üse Spass ghäbe wie immer ud Serviertochter isch o putzmunter gsi. Sie het zwar d Häufti nid verstane wo wir gsit hi u umgekehrt, aber emu bsunders am Reni schint sie Gfalle gfune ds ha. ;-)

De Reni het die ganz Sach kritisch gseh... vorallem wes de ums Zahle gange isch.... Zu Recht: Die gueti Frou het uf ds mau es totals Blackout ghäbe u het öppe drü mau nachegrächnet. Wir hi sicher e haub Stund brucht bis mer zaut ghäbe hi. Des Rätsels Lösung wiso die Rächnig so lang nid ufgange isch: Uf de Abrächnig isch no e Pizza druf gsi wo gar niemer vo üs ghäbe het. Die am Tisch näbedran si emu o scho skeptisch worde u si zur Sicherhit nomau ga d Charte hole u hi grad säuber usgrächnet wievöu es bi ihne kostet het. Wir hi üs uf jede Fau köstlech amüsiert.

Nanu, Spaci mit Heiligeschin? Das cha doch fasch nid si, oder?! *grins* Neee, es isch nume d Lampe im Hintergrund! ;-)

Westside

ds Westside, is vo de gröschte Shopping- u Vergnüegigscentre ide Schwiz, nümmt langsam aber sicher Form an. Afang Oktober söu ja schliesslech scho d Eröffnig si. Bü ja extrem gspannt druf, das liegt ja praktisch vor mire Huustüür. Optisch machts emu scho mau öppis här!

isch so vöu wiss die lengscht Wasserrutsche vor Schwiz! Me gönnt sech ja süsch nüd imene Shoppingcenter.... *hüstel*

De Mückestich....

...wo gar kine isch!
Eigentlech hets ja zersch nacheme ganz normale Mückestich usgseh. Wo aber de rot Kreis drumum ging grösser isch worde u sech het afah verfärbe büni de am Mittwuch Abe glich mau id Apothek gange um s ga ds zige. Die hi mer allerdings nid chöne witerhäufe u hi gfune i söu zumene Dokter. Ja klaaar gani wägeme Mückestich zum Dokter, so wit chunts no! Wo de rot Fläck aber immer no grösser worde isch büni de am Donschtig glich gange... et voilà! Es isch haut glich e Zeckebiss gsi.... wiss zwar nid woni dä ufgläse ha, u de Zecke säuber isch o niene... aber uf jede Fau muessi jetz starchi Antibiotika nä ide Hoffnig dass es würkt. Nächscht Wuche muess is nomau ga zige u gange Zecketest mache....

MPC Brunch in Brütten

Hüt isch de scho fasch traditionell (findet ja o scho zum zweite Mau statt...) MPC Brunch in Brütte gsi. Das bedütet für üs Westschwizer, dass mer mau us de Fädere müesse. Am 07.00 stah ni uf u fahre gäge Lyss... da hets de underwägs o scho zum erste Mau Hindernis uf de Strass ghäbe... allerdings nid soo breit dass me nid dran verbi cho wer... *hüstel*

In Lyss het de Tüüfu ds Schlafplätzli vom Schnutli dörfe ha. Hüt simer in pink underwägs gsi! Ab Deitingen laht mi s Pinki as Stüür vo irem MINI u de gits mit Schnute-Power ab nach Brütten.




MINI-mania vorem Stars and Stripes!


Später hi de no de Dylan ud Petra schnäu verbigugget.

d Ratte (sorry, sie nennt sech im Forum säuber so.... ;-)) isch mit de Lotus Elise cho. Nachem Brunch simer de no schnäu uf Kloten bim Flughafe is Runway34 gange. Bis det häre hani bir Lotus dörfe mitfahre. Isch haut scho cool so knapp überem Asphalt über d Strasse ds fäge!

Päscu het mengisch voll Fresse schräääääg ;-)

Reni, Pät (Keep smiling! *top*) ude Demi

Shorty u Happy Slappy

D Bedienig im Runway het nid grad Flugzüg-Gschwinigkeit erreicht, aber immerhin hi mer schlussendlech doch no alli öppis becho, u wär de MPC kennt wiss: So öppis bringt üs überhoupt nid usem Konzept!


MINIs!!!!!!!!!!!!

de schönscht isch no zum Schluss cho. In Deitingen macht de West-CH-Express no e letschte Haut. Was mer det für Lüt troffe hi toppt eifach nüd. Die eint het usgseh aus ob sie früsch usem Sarg chunt, de Zweit isch anschinend nüm ganz nüechtern gsi u het bir Autobahnraststätt gsünnelet, die Dritt isch glüfe wie de gröscht Idiot u de Viert isch miteme riesige Stei dür ds Resti glüfe... da söu no mau ine drus cho! ;-)

Isch ifach umi mau a super Tag mitem MPC gsi! Het mer wie ging sehr vöu Spass gmacht, isch eifach e coole, totau verstraute Huufe!

JCW, das Nonplusultra?

Samschtig Nami, ds Wätter isch guet. Eigentlech chönti doch mau de nüü JCW ga Probefahre. Auso lüti mire Garage an obi schnäu chön verbi ga. "Ouuu, wir hi hüt grad Usstellig u de JCW isch im Showroom, das git grad zümlech schlächt." Usstellig? Schomi? Ah ja, ds Facelift vor 3er-Reihe wird präsentiert, stümmt, hani totau vergässe! Aber da chunt mer i Sinn...bir Garage Marti ds Niederwangen hi sie 2 JCWs.... da isch doch sicher ine dusse zum ga Probefahre. Auso fahri mau los u gange no schnäu uf Flamatt de Tüüfu ga wäsche u tanke. Grad woni bir Tankstell bü rast uf ds mau e rote MINI dedür. Heee, das isch a JCW!!!! Hööö? Am Stüür niemer gringers aus de Rotsch u näbeinne de Pascal. Ds Auto isch vor Garage Marti, auso genau vo det woni grad häre ha welle. Auso nüd wie hindernah mitem Tüüfu. Nacheme churze Schwatz isch es de a mier. I schnappe mer de Schlüssu u los gits mitem brandnüe, 211 PS starke MINI John-Cooper-Works.

wobi, muess ganz ehrlech säge: De Z8 näbedran het mi mindestens genau so greizt. Das isch eifach is vo de allerschöschte Autos wos je gä het. Geeeeeeiiilllll!!!!!!! =)

Nachdem i chli chrüz u quer dür Gägend gfahre bü, büni no schnäu dehei verbi. Muess säge, de Cheib passti scho no guet uf mi Parkplatz! *lach*


Aber wie isch er tatsächlech, de nüü JCW? Hie mau chli mis Fazit, vergliche mit mim Tüüfu:

Fahrwerk: Ds Original-Fahrwerk isch de Hammer. Het zwar minim meh Siteneigig aus mis KW2, aber git grad so guet id Kurve. O d RunFlats si mer nid negativ ufgfalle.

Sound: Aus JCW isch er dütlech lüter aus als Cooper S. Zudem blubberet u fuchet er ganz schön u chlöpft richtig hinderuse bim Gaslüpfe. Im Innerum isch er aber trotzdäm ging no lisliger aus mine. U das obwou i bi mim ging no de Originaluspuff ha.

Motor: De Turbo isch es Sahnestück, ganz klar! Het Kraft bis zum Abwinke. O im 6. Gang luft das Teil ging no abartig. D Steigerig gägenüber am Cooper S Works het mi aber nid so wahnsinnig tüecht. Im Gägetöu. Het mi eher tüecht de Turbo bim JCW sprächi chli verzögeret an. Villicht isch es aber o dran gläge das ds Testfahrzüg no nid so vöu Kilometer ghäbe het.

Kupplig, Getriebe, Brämse, Länkig: Irgendwie isch de 56er ifach vöu meh BMW-like. D Kupplig isch weicher u lenger aus bi mim, d Länkig fasch frei vo Atribsiflüss, ds Getriebe weniger knochig, d Gäng flutsche wie vo säuber drin. Aber genau das liebi a mim so: Da Klackets so schön we me d Gäng drin tuet, de Schaltweg muess me richtig sueche, d Kupplig isch hert u churz, i de Lenkig vibriert jedi Unebehit vor Strass... ds Feeling isch im 53er ifach intensiver! Bi de Brämse gits hingäge ke Diskussion: D JCW-Brämse vom Nüe packe gnadelos zue!

Design: D Front vom 53er gfaut mer haut ging no as Müü besser, aber vorallem grad mitem JCW-Aero-Kit gseht er bullig u fräch us. Gfalle würd er mer auso scho, a däm ligts nid! ;-)

Speed: Mitem JCW isch me ständig ds schnäu. Me merkt d Gschwindikit gar nid. Mau chli gas gä u de Tacho zigt scho wit über 100 km/h an. Innerorts brav 50 fahre isch e Qual, de reizt ihm ständig bis ufs Bluet zum schnäller fahre. (okee, das macht mine zwar o, hihi!) Vorallem het me mit 50 km/h oder 60 km/h ds Gfüu ma stöni stöu, so ruhig chame demit fahre! Da isch mine o bi niedrigere Gschwindigkite dütlech närvöser.

Fazit: De nü JCW isch eigentlech nahezu perfekt. Aber villicht isch es grad das wo mi chli enttüscht het. Ha meh Action erwartet. Mine isch zwar nid so schnäu, aber macht grad so Spass. Isch haut eifach komplett anders zum Fahre. Bi mier pfiffts, lärmets u isch öppis los. Nid fausch verstah, de Turbo-Works isch Hammer, u i würd ne natürlech sofort nä, aber eifach nid us Ersatz für mi Tüüfu, dä möchti definitiv nid härgä. Woni umi i mi MINI istige bü isch es ifach so es "Willkommen Zuhause" gsi. Dä sitzt wie ne Massazug u bereitet mer nach wie vor jedes mau es riese Grinse. Me setti eifach beid chöne ha! ;-)

s Weekend

Am Fritig Abe büni mitem Säbi gmüetlech uf Murte is BB. Fasch scho Tradition, hi wir üs beidi Gingerellos bstöut. Die dritt Rundi het sogar no de Barkeeper spendiert, wärum o immer... das wüsse mer o nid so gnau! *haha* De Aläää oder äbe nid Aläää hani o no atroffe det. Ehemalige MINI Fahrer, jetz Subaru Fahrer miteme Lamborghini Shirt, alles klar? ;-))

Am Samschtig Abe isch Kino-Time gsi. Mit de Chantal büni uf Bärn ga de nüü Föum mitem Vin Diesel gugge. Babylon oder so hisst er.... irgendwie hani d Handlig chli vermisst, aber egau, isch emu öppis glüfe! *haha* Dernah simer no is GutGelaunt as feins Kaffi ga nä bevor mer umi langsam hei zue si.

spontan übere Gurnigu

Donschtig, öppa haubi zwöufi am Mittag.... am Nami hani fri. Spaci Ferie. Wir si am PN schriebe u am Überlege was am Nami chönti lufe.... Spaci: Du chöntsch ja übere Gurnigu... okee, schribe zrugg: Du ja o! U scho isch us Spass ärnscht worde! Am Nami toucht e hellblaue MINI mit NW Kennzeiche bi mier dehei uf. Zäme mitem Nicolas näme mer via Seelibühl üse Lieblingshöger i agriff.

1x Toyota Starlet, 2x MINI Cooper S

Nicolas u Spaci

was gits ächt da interessants ds gseh?! ;-)

De Z4-Wahnsinn

De Pascal het mer umi mau tüchtig Honig ums Muu gschmieret. Nichts ahnend toucht er uf ds mau miteme BMW Z4 3.0si uf. Sis Ersatzauto wü de Clubby e Halt ir Boxegass vor Garage Marti macht.

Shiiit! Setig Ersatzautos hani no nie becho!

3.0l Reihe-6-Zyl, 265 PS u 315 Nm bi 1'385 kg Leergwicht, doch die Zahle drücke nid annährend ds Gfüu us wo das Auto uslöst we me drin hocket u de Sound vom Motor kört, irre!!!!!

i darf a churzi Probefahrt mache. Dach uf, Sportchnopf drückt und los gits! I cha mi nume wiederhole: De Sound isch eifach de Hammer! De 6 Zylinder schreit, fucht u blubberet ide schönschte Tön! Ungloublech! Hammer! Geniau

Nume bir Kurvehaftig cha ner sech es Bispöu am MINI nä, ds Heck wetti sech ging chli säubständig mache.... aber es macht eifach irre Spass mit däm BMW! Es het mer umi mau bewise, dass BMW haut scho die faszinierendste Autos uf d Bei stöut, de MINI natürlech inklusive! Sone Z4 würdi sech scho no guet mache näb mim Tüüfu.... *träum*

Tamis Geburi

Am Mentig het s Tami Geburtstag ghäbe u i has doch vou verpasst wüni Prüefige ghäbe ha..... Himmu! Aber defür het sie am Samschtig ires Geburi no nahgfieret. Zäme mitem Spaci u am Reni bü o i uf Matzedorf (SO) gfahre um no nachträglech uf das Ereignis adsstosse. Isch a gsellige Abe gsi! Het uf jede Fau umi vöu ds lache gä! :-)

September-Höck

Yes! Wie hani uf dä Moment gwartet! Vo Mentig bis Fritig hani jede Morge ghäbe... Mentig Managementlehr u Finanz- & Investitionsmanagement, Dsischtig Statistik, Mittwuch Rechnigswäse, Donschtig Wirtschaftsinformatik u am Fritig no Recht.... Da hani mer de Höck glubi tatsächlech verdient! Zersch simer aber no es paar vor Klass zäme ga astosse uf d Prüefige wo hoffentlech guet gange si... bis mer d Resultat bechäme gits no e Moment.... Aber jetz mau fertig a das deicht, ab i MINI u los richtig Mühlau!!!!!!! *megafreu*

Im Grauholz hani mier mitem Rotsch u am Pascal troffe, zäme isch es zum nächschte Träffpunkt gange. In Deitingen stosse ds pinki, d Evelyn u de Demi zu üs.

Witer gits bis Gunzgen wo no ds Tami sech am Konvoi aschliesst. Bi Aarau West mache mer vergäbe e Haut, aber bi Lenzburg vergrössert sech de Konvoi no mau zümlech, dpp, flying Dutchman, Raphi, Yves, Minipu und und und..... MINImania!!!!!!

De Höck isch amüsant u churzwilig wie ging gsi. D Zyt git verbi wie im Flug. Aber de nächscht Höck chunt gaaaaaanz bestümmt!

Gurnigel-Renne

De ominös Schlüssu woni am Samschtig becho ha....

... isch für nüd gringers als fürne brandnüe BMW X6!!!
Mit däm hani am Suntig dörfe Corso fahre bim Gurnigel-Renne. Zwüsche de einzelne Renne fahre jeweils Wärbefahrzüg vo de Sponsore d Strecki ab. U i eim vo däne Autos hocke hüt äbe jetz i u de Rotsch!

sone X6 isch minim grösser aus e MINI....

4.9m leng, 1.7m hoch u 1.9m breit....

cool: Ds Head-up Display wo d Gschwindigkit und d Navi-Infos grad diräkt uf d Frontschibe projiziere!

De Rotsch i mim MINI gseht me im Rückspiegu fasch nid.

si äbefaus Corso gfahre: E Classic-MINI-Club!

Renntaxi mitem Dähler sim Wiesman, es Troumouto!

X6 und Rotsch si bereit!

de Felix Marti mit sim Challenge-MINI

schnälle u säutene BMW M1!

ds noble Interieur vom X6

bööööööse Blick

obwou üsers Modäu "nume" de X6 35d mitem 3.0l Bi-Turbo Diesel isch gsi, git das Ding abartig ab! 286 PS u 520 Nm sei Dank!

leider isch ds Wätter nid ging toll gsi u d Lüt wo is Fäud use hi müesse ga parkiere si ganz schön blöd dran gsi. Da ig chli früener ha müesse ga, hani de MINI mitgnoh. D Organisatore hi gsit i müessi aber zu de Bsuecherparkplätz ga. Wie das mit de tüüfe MINIs so isch, isch das nid grad ideal gsi. Ha mi fürchterlich ufgregt. Bü scho bim härefahre im Schlamm blibe stecke. De hani däne Herre mau d Postordnig düre gä u verzeut ob mi MINI i dä Dräck use git ga parkiere oder nid. Fazit: Da me mier ke andere Parkplatz het welle abiete, büni stinkesauer wieder umgekehrt. Bimene Huus ir Nöchi büni de häregfahre u ga lüte zum Frage obi mis Auto bi ihne dörf härestelle. A älteri Dame het ufgmacht u gsit das sig kes Problem. So isch de mi MINI schön am trochene u subere Ort abgstöut gsi, danke nomau vöu mau a die liebi Dame!!!!!

allerdings het die Fahrt düre Schlamm glich so siner Spure hinderlah....



Uf jede Fau büni no am gliche Tag schnäu ga de MINI wäsche! =)

Abgseh devo isch de Tag de Hammer gsi! De Rotsch u i his gnosse mit däm riese BMW de Grunigu unsicher ds mache. Ungloublech wie das grosse Auto souverän u schnäu um d Egge zieht. Het uf jede Fau mega Spass gmacht!