(B)engel

Nach langem Hin- u Her u endlose Konfiguratione hani mi de am 16. März inere schwache Minute entschide, bir Garage Marti bim Antonio mi Troum definitiv ds bstelle: Es brandneus MINI John-Cooper-Works Cabrio! 211 PS, 280 Nm u kes Dach überem Chopf, was chas schöners gä?! Doch vorher isch ds grosse Warte losgange. Produktionswoche 20, das hisst, de MINI sett ide erste Wuche Juni bereit si zur Uebergab. Das hisst, es wird nüd für mitem Cabi uf Silverstone ds fahre....

30. April... i gange schnäu de Tüüfu id Garage ga ziige wü ni ds Gfüu ha d Kupplig sig irgendwie chli komisch, u i wett ja ohni Panne chöne as United u zrugg fahre... Nachdem de vor Werkstatt nachere Probefahrt mint, die sig no ok, gani schnäu am Antonio ga sälü säge. De sit er mir uf ds mau es gäb es Problem mitem Cabrio... jetz sig genau das passiert wo mer eigentlech hetti welle vermide... Was???? Isch ds Schiff undergange? Isch er vom Lastwage gheit? Was isch ächt passiert? Sini Antwort: Ds Auto sig vorem JCW-Aero-Kit da... "Kes Problem", säge ig. De chani ja am Afang haut no ohni Aero umefahre... Antnio: "Es isch ebe so..... ds Auto isch scho da...." WAAAAAAAS? 30 April? De wer doch eigentlech no gar nid produziert! De Zuefau hets welle, dass de Termin gäg vor verschobe isch worde, jetz isch "mis" Cabi bereits in Niederwange! U so het das denn ir Lagerhalle vor Garage Marti usgseh:

irgendwie no ganz brav u unschinbar.... 

Paar Wuche später hets de chli anders usgseh... Am 29. Mai, aso praktisch e Monet später, isch de gross Moment da: I darf de (B)engel ga abhole! Jetz inkl. Aero-Kit, iPod-Aschluss und Carbon-Interieur, die drü Sache hi sie nämlech ir Garage no nachträglech müesse montiere wüs nid Sonderusstattig, sondern Zuebehör isch.

25 km ufem Tacho u bereits 7 Minute ufem Always-Open-Timer, so faht hoffentlech e lengi u schöni Story an.

Dehei acho, wird grad Bekanntschaft gmacht zwüschet em Tüüfu u am Bengel... die beide dörfe näbenand blibe, i has eifach nid übers Härz bracht, de Tüüfu wäg ds gä. Jetz müesse sie sech haut ds Kennzeiche mitenand teile! :-)

Paar Täg später wird de Bengel scho mau offiziell i Club ufgnoh. Näb de "John Cooper" Unterschrift bechunt er o grad es MPC-Nümmerli.... MPC 0017!

Bi gspannt wie de wird abgah we ni die erste 2'000 km hinder mer ha. Vorher gits nid meh aus 3'000 u/min, oder im Unahmefau we ner schön warm isch o mau bis zu 4'000 u/min. Im Handbuech stit dass me sogar bis 4'500 u/min dörft... aber irgendwie hani no gar nie so wit chöne dreihe ohni dass i nid wieder ihne vor mer ghäbe ha woni fasch hett müesse astosse.  ;-)

Uf jede Fau gniessi ds oben-ohne fahre extrem, macht riesig Spass!!!!  =)