Il Grissino

Gester, Samschtig de 27 Juli.

Eigentlech wer uf de Clubagenda Europapark itrage gsi. Da aber ds Wätter meh schlächt aus rächt usgseh het ud Prognose für Rust de ganz Tag "Schauer" akündet het, hi wir üs entschlosse, dass das wortwörtlech is Wasser gheit.

Statdesse hani vo 08.45 - 16.45 es Seminar über Sozialversicherige dörfe gniesse wo mer vor Schuel us ghäbe hi. D Dozentin hetti optisch de verchleidet Hape Kerkerling i inere vo sine Rolle chöne si u gredt het sie öppe so flüssig wie de Moritz Leuenberger. I ha mi uf jede Fau köstlech chöne amüsiere.  ;-))

Am Abe hi de ds pinki, de winti u ig spontan entschide, dass mer glich umi mau öppis MPC-mässigs chönti mache u so hi wir üs de am 19.30 troffe für ds Bern is Grissino ga ds ässe. Ufem Wäg det häre het de (B)engel no grad es chlis Jubiläum chöne fiere:

2'000 km!!! Das bedütet, d Ifahrtzyt isch jetz definitiv verbi u es dörfe ruhig o mau meh aus 3'500 u/min si. I frage mi eifach für was... meistens büni scho so ging rächt zügig underwägs gsi. ;-)

Uf jede Fau hi wirs üs im Resti so richtig lah guet ga. Ds Ässe isch, wie immer det, mega fein gsi. Ufs Dessert hi isch de no de Reni zu üs gstosse. Nachdem sich ds Restaurant nach und nach ging meh gleehrt het, hi o wir üs de o mau entschide, langsam ds zahle.

Zrugg im Parkhuus hi wir de no chli üser MINIs müesse bestune, schliesslech gits ging umi nüi Sache ds entdecke! ;-)

D Zyt isch umi mau extrem schnäu verbigange. Nachdem mer öppe no e Stund im Parkhus witerquatschet hi, hi wir üs de öppe am 01.00 langsam mau verabschiedet.

O weni das fasch jedes Mau am Schluss vomene Bitrag übere MPC schribe... Lüt, es isch ifach umi mau super gmüetlech gsi mit euch. Das het mer so richtig guet ta mit dem ganze Schuelstress woni momentan ha. I has so richtig gnosse mit euch! =)