Autosalon zum Zweite

Hüt gits nomau a Autosalon uf Genf.

Mi hi am Morge am 08.00 in Flamatt bir Autobahnusfahrt abgmacht. Genau so wie ni planet ha stah ni uf, gange no ga dusche, wott gmüetlech ds Morge näh u aschliessend füre Winti, Spaci us Nicci no ga Gipfeli chufe, da lütets uf ds mau ar Tür. Gopf, wär isch das um die Zyt??? Ja wär ächt?! Stöh doch die drü scho am 07.40 bi mier vor de Hustüür. Schnäu ds Morge fertig ässe, Gipfeli chufe fällt auso eh dahin, u scho gits los. Mi entscheide üs mit zwü Autos ds ga. No bevor i cha säge dass i fahre, drückt mer de Spaci si Schlüssu id Händ: "Chum, fahr Works!"
D Fahrt uf Genf würd auso zur reini EB-Sach! ;-)

Bir Raststätte Gruyères gits e erste Kafihaut, bevors witer bis uf Genf git. Parkplatz choschtet satti Fr. 20.00!!! Das isch ja Wucher! Heja, zum Glück si mer nid mit 3 Autos gange..... Am Salon schlendere mer vo Stand zu Stand u bewundere die nüe Modell.

Ds Rolls Royce Phantom Coupé würdmer definitiv o gfalle, ligt aber nid im Budget, drum hie glich nomau as paar Fotos vo de MINIs, da büni scho eher dehei! ;-)

MINI John-Cooper-Works Clubman. Rasante Kombi mit 211 PS. Ds Highlight isch aber immer no die ungwöhnlechi Türkombination. Vo obe gsehts bsunders guet us! :-)

Hach... pepper-white... eifach schön u passt guet zum MINI!

d EB-Fraktion schwärmt degäge eher für ds nüe Oxygen-Blue:

Irgendinisch am Nami träte mer wieder d Heireis an. U wü ds Nicci so gär Doppelrahm het, mache mer no a chline Abstächer zum richtige Greyerz, nume d Autobahnraststätte chas ja nid si! ;-)

Im historische Städtli gönne mer üs no as Dessert. Aber wo mer uf ds mau uf d Uhr gugge, chämer no fasch chli i Stress. Schliesslech setti am 17.30 schomi in Bern ir Schu si. So blibt leider nüme vöu Zyt u mi fahre umi zrugg richtig Wünnewil. Wüs mer nüme ufe Zug längt, schnappi mer de Tüüfu u fahre grad diräkt mit ihm bis uf Bern. Nachdem i endlech e Parkplatz gfune ha, schaffis grad ufe letscht Drücker no is Schuzümmer.

Het Spass gmacht mit euch am Salon!!!!

PS: No vööööu meh Böuder gits hie:
-http://minielectricblue.blogspot.com/2008/03/autosalon-in-genf.html
-http://winticoopers.blogspot.com/2008/03/autosalon-2008.html