d Wucha faht ja guet an...

Mentig Morge, we de Wecker git hani ds Gfüu i sig doch ersch grad ga lige...
Auso uf, ds Morge nä u ab is Auto richtig Murte ga schaffe.... doch ds Salvenach, churz vor Murte, isch scho mau fertig demit. "Strasse gesperrt" Na bravo! Fahri zum Polizist häre wo det stit i frage wärum de da gsperrt sigi... "Wü gsperrt isch" Super! Antwort des Tages! De haut... u wie chumi jetz da am eifachschte nach Murte? "Zrugg bis Düdingen uf d Autobahn" Gaaahts no? Das isch e riese Umwäg, gits nüd nöchers? I sett eigentlech scho fasch afah schaffe.... "Isch nid mis Problem", mint de Freund und Helfer... super, danke! Isch mega nätt vo däm! Genau i däm ironische Underton sägi das däm ***** o bevor i umchere u vollgas devo fahre. Settigs bruchi eifach am Morge nid scho!!!!! Aber es chunt no besser: Ir Bank luft ds Hauptprogramm nid... das bedütet: De ganz Tag de Chunde erkläre wärum sie hüt nid vöu anders chi mache aus Gäud bezie, izahle oder wächsle... Klar gits da einigi wo nid so begeisteret druf reagiere... aber da chani o nüd defür! U natürlech hets hüt grad umi mau bsunders vöu Lüt wo uf d Bank chäme.... Zu allem Überfluss gibi bir Parkplatzmieti woni no ha müesse ga mache ds fausche Autokennzeiche an, aber das passt ja prima ids Konzept vo däm Tag... u dass am Abe d Kasse wägere Kursdifferenz vomene Check in Euro nid stimmt isch ja beinahe scho es Detail... auso nomau aus korrigiere bis es stümmt... Am haubi sächsi gani fangs zur Bank use. Für d Heifahrt muessi de Umwäg über Büchsle nä, u dass det e Baustell mit Ample isch wo die ganz Zyt uf rot staht... Details... uf jede Fau hoffi mau, dass die Wuche nid so witergit wie si agfange het! *lach*